ବରଗଡ: ବିଶ୍ଵ ପ୍ରସିଦ୍ଧ ବରଗଡ ଧନୁଯାତ୍ରାରେ ଦୌଡରାଣୀ ଦୂତୀ ଚାନ୍ଦ । ମଥୁରା ନରେଶ କଂସ ମହାରାଜଙ୍କ ଦରବାରରେ ହେଲେ ସମ୍ମାନିତ । ରାଜ ଅତିଥି ଭାବେ ସେ ଯୋଗଦେଇଥିବା ବେଳେ ତାଙ୍କୁ ମହାରାଜ କଂସ ସମ୍ମାନିତ କରିଛନ୍ତି ।
ଦୂତୀଙ୍କ ସହିତ ପ୍ରଶିକ୍ଷକ ଶିବ ମିଶ୍ର ଏବଂ ସମ୍ବଲପୁର ରେଳମଣ୍ଡଳ ପ୍ରବନ୍ଧକ ପ୍ରଦୀପ କୁମାର ମଧ୍ୟ ରାଜ ଅତିଥି ଭାବେ ଯୋଗଦାନ କରିଥିଲେ । ଦୂତୀ ଚାନ୍ଦ ଦୌଡ ପ୍ରତିଯୋଗିତାରେ ମଥୁରା ନଗରୀର ମାନ ସମାନ ରକ୍ଷା କରିଥିବାରୁ ମହାରାଜ କଂସ ଦୂତୀ ଚାନ୍ଦଙ୍କୁ ରାଜ ଦରବାରରେ ସମ୍ମାନିତ କରିଥିଲେ । ସେପଟେ ଡିଆରଏମ ପ୍ରଦୀପ କୁମାରଙ୍କୁ ମଥୁରା ନଗରୀରୁ ଭୁବନେଶ୍ବରକୁ ସକାଳୁଆ ଟ୍ରେନ ସେବା ଯୋଗେଇଦେବାକୁ ନିର୍ଦ୍ଦେଶ ଦେଇଥିଲେ ।
ସେହିପରି ମହାରାଜା କଂସ ମଥୁରା ନଗରୀରେ ମହିଳାମାନଙ୍କୁ କ୍ରୀଡା କ୍ଷେତ୍ରରେ ଅଧିକ ସୁଯୋଗ ଦିଆଯିବାକୁ ଦୂତୀଙ୍କର ପ୍ରଶିକ୍ଷକ ଶିବ ମିଶ୍ରଙ୍କୁ ନିର୍ଦ୍ଦେଶ ଦେଇଛନ୍ତି । ଯେପରି ଦୂତୀ ଚାନ୍ଦ ମଥୁରା ରାଜ୍ୟର ନାମ ରଖିଛନ୍ତି ସେହିପରି ଅନ୍ୟ ମଥୁରାର ଅନ୍ୟ ମହିଳାମାନେ କ୍ରୀଡା କ୍ଷେତ୍ରରେ ଆଗକୁ ଯାଇ ମଥୁରାର ନାମ ଉଚ୍ଚ କରିବେ ବୋଲି କହିଛନ୍ତି । ଦୂତୀଙ୍କୁ ମହାରାଜ କଂସ ବିଶ୍ଵ ଦରବାରରେ ମହିଳା ମାନଙ୍କୁ ନିଜର ଅଭିଜ୍ଞତା ଓ ବାର୍ତ୍ତା ଜଣାଇବା ପାଇଁ ସୁଯୋଗ ଦେଇଥିଲେ ।
ବରଗଡରୁ ରାଜେଶ ସରାପ୍, ଇଟିଭି ଭାରତ
