ବରଗଡ: ପ୍ରଧାନମନ୍ତ୍ରୀ ଫସଲ ବୀମା ଯୋଜନାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ଲାଗିରହିଛି । ଗତ 10 ତାରିଖରୁ ବରଗଡରେ ଚାଷୀ ବୀମା କମ୍ପାନୀକୁ ତାଲା ପକାଇ ରଖିଛନ୍ତି | ତେବେ ଆଜି ସୁଦ୍ଧା ଚାଷୀ ଓ ବୀମା କମ୍ପାନୀ ମଧ୍ୟରେ କୌଣସି ସମାଧାନର ବାଟ ଫିଟି ନାହିଁ । ବରଗଡ ଜିଲ୍ଲାପାଳ ଅଫିସରେ ପ୍ରଶାସନ ଓ ଚାଷୀ ମାନଙ୍କ ମଧ୍ୟରେ ପୁଣି ଏକ ବୈଠକ ହୋଇଛି ।
ଜିଲ୍ଲାର ଚାଷୀ ସଂଗଠନ ସମନ୍ବୟ ସମିତି ଫସଲବୀମା ନେଇ ବିଭିନ୍ନ ସମସ୍ୟା ବିଷୟରେ ଦୃଷ୍ଟି ଆକର୍ଷଣ କରିଛନ୍ତି । ACF ଓ YCF ଆଳରେ ବୀମା କମ୍ପାନୀ କିପଋ ଚାଷୀଙ୍କ ସହିତ ଖେଳ ଖେଳୁଛନ୍ତି | ଫସଲବୀମାର ପ୍ରିମିୟମ ଭରିବାର ଦୁଇମାସ ପରେ ନୂତନ ନିୟମକୁ ଲାଗୁ କରିବା ଚାଷୀ ମାନେ ବେଆଇନ ବୋଲି କହିଛନ୍ତି | ଯଦି ପ୍ରିମିୟମ ଭରିବା ପୂର୍ବରୁ ନୂତନ ନିୟମ ଘୋଷଣା ହୋଇଥାନ୍ତା ତାହେଲେ ଚାଷୀ ନିଜ ମୁତାବକ ପ୍ରିମିୟମ ଭରିଥାନ୍ତେ।
ତେବେ ଚାଷୀ ସଂଗଠନ ପକ୍ଷରୁ ଆହୁରି ପାଞ୍ଚ ଦିନ ସମୟ ଦିଆଯାଇଛି । ଆଗାମୀ ପାଞ୍ଚଦିନ ମଧ୍ୟରେ ବୀମା କମ୍ପାନୀ ଚାଷୀଙ୍କ ସମସ୍ୟାର ସମାଧାନ ନ କଲେ ବୀମା କମ୍ପାନୀ ଅଫିସରେ ପଡିଥିବା ତାଲାକୁ ଖୋଲାଯିବ ନାହିଁ ବୋଲି ଚାଷୀ ମାନେ କହିଛନ୍ତି । ଚାଷୀଙ୍କ ବିଭିନ୍ନ ସମସ୍ୟାର ସମାଧାନ ପାଇଁ ଜିଲ୍ଲା କୃଷି ଉପନିର୍ଦେଶକଙ୍କ ଅଫିସରେ ଏକ ସ୍ଵତନ୍ତ୍ର ସେଲ ଗଠନ କରାଯିବାକୁ ବରଗଡ ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନ ନିର୍ଦେଶ ଦେଇଛନ୍ତି |
ବରଗଡରୁ ରାଜେଶ ସରାପ, ଇଟିଭି ଭାରତ
