ବରଗଡ଼: ଜିଲ୍ଲା ପ୍ରଶାସନର ଉଚ୍ଛେଦ ପ୍ରକ୍ରିୟା ଭିନ୍ନ ମୋଡ ନେଇଛି । ଲଗାତାର 2 ଦିନର ଉଚ୍ଛେଦ କାର୍ଯ୍ୟ ପରେ ବନ୍ଦ ହୋଇଯାଇଛି ଉଚ୍ଛେଦ ପ୍ରକ୍ରିୟା । ସ୍ଥାନୀୟ ଲେଙ୍ଗୁ ମିଶ୍ର ଛକଠାରୁ ନୂତନ ଜୀରା ବ୍ରିଜ ପର୍ଯ୍ୟନ୍ତ ଶତାଧିକ ଜବରଦଖଲକାରୀଙ୍କ ବିରାଟ କୋଠାଘର ଏବଂ ଦୋକାନ ଗୃହ ରହିଥିବା ବେଳେ ଜିଲ୍ଲା ପ୍ରଶାସନର ପ୍ରଥମ ଉଚ୍ଛେଦ ପ୍ରକ୍ରିୟାରେ 59ଟି ଘର ଓ ଦୋକାନ ଗୃହକୁ ଉଚ୍ଛେଦ କରିବାର ଯୋଜନା ରହିଥିଲା । ମାତ୍ର 41ଟି ଘର JCB ସାହାଯ୍ୟରେ ଭାଙ୍ଗିବା ପରେ ଅଟକିଯାଇଥିଲା ଉଚ୍ଛେଦ ପ୍ରକ୍ରିୟା । କାରଣ 18ଟି ଜବରଦଖଲକାରୀଙ୍କ ଘର ଭାଙ୍ଗିବା ପୂର୍ବରୁ ରହିତାଦେଶ ଆସିଥିଲା । ତେବେ ଏହି ଉଚ୍ଛେଦ ପ୍ରକ୍ରିୟା ଆଗକୁ ହେବ ନାଁ ପୁଣି ପୂର୍ବ ପରି ବରଗଡ଼ବାସୀ ଟ୍ରାଫିକ ସମସ୍ୟାରେ ଛନ୍ଦି ହେବେ ସେନେଇ ପ୍ରଶ୍ନ ଉଠିଛି ।
ସୂଚନା ଅନୁସାରେ, ଦୀର୍ଘ 50 ବର୍ଷ ପୂର୍ବରୁ ବରଗଡ ସହର ଦେଇଯାଇଥିଲା 6 ନମ୍ବର ଜାତୀୟ ରାଜପଥ । ବରଗଡ ଜୀରା ବ୍ରିଜ ଉପରେ ଇଂରେଜ ଶାସନ ସମୟର ଏହି ଲୁହାର ବ୍ରିଜ୍ ଅତି ଦୁର୍ବଳ ହୋଇ ପଡ଼ିଥିବାରୁ ଏହି ରାସ୍ତା ଦେଇ ବଡ଼ ବଡ଼ ଯାନବାହାନ ଚଳାଚଳ ନକରି ନୂତନ ଭାବେ ନିର୍ମିତ ବାଇପାସ୍ ରୋଡ୍କୁ ବ୍ୟବହାର କରଯାଇଥିଲା । ତେବେ ବରଗଡ ଟାଉନ ଭିତରୁ ଯାଇଥିବା ସେହି ପୁରାତନ 6 ନମ୍ବର ଜାତୀୟ ରାଜପଥର ଓସାର 120 ଫୁଟ ରହିଥିବାର ସୂଚନା ରହିଛି । ମାତ୍ର ଧୀରେଧୀରେ ଏହି ରାସ୍ତାର ଉଭୟ ପାର୍ଶ୍ବକୁ ବେଆଇନ ଭାବେ ଜବରଦଖଲ କରି ଲୋକେ ବଡ଼ବଡ଼ ଅଟ୍ଟାଳିକା ନିର୍ମାଣ କରିଦେଇଥିଲେ । ବର୍ତ୍ତମାନ ସେହି ରାସ୍ତାର ଓସାର 120 ଫୁଟରୁ ମାତ୍ର 30 ଫୁଟ ରହିଛି ଯାହାଫଳରେ ଏହି ରାସ୍ତାରେ ପ୍ରତିଦିନ ବ୍ୟାପକ ଟ୍ରାଫିକ ସମସ୍ୟା ଉପୁଜୁଥିବା ଦେଖିବାକୁ ମିଳୁଛି ।
ବରଗଡ଼ ସହରରେ ଲକ୍ଷେରୁ ଅଧିକ ଜନସଂଖ୍ୟା ବୃଦ୍ଧି ପାଇଥିବାବେଳେ ବର୍ତ୍ତମାନ ଏହା ବ୍ୟବସାୟର ଏକ ପେଣ୍ଠସ୍ଥଳୀ ପାଲଟିଛି । ଏପରି ସ୍ଥିତିରେ ବରଗଡ ଲେଙ୍ଗୁମିଶ୍ର ଛକଠାରୁ ଲମ୍ବା ବିଲଡିଙ୍ଗ ପର୍ଯ୍ୟନ୍ତ ବ୍ୟାପକ ଟ୍ରାଫିକ ସମସ୍ୟା ଉପୁଜିଥାଏ । ତେଣୁ ବରଗଡବାସୀ ଦୀର୍ଘ ଦିନରୁ ଏଠାରେ ରହିଥିବା ବେଆଇନ ଜବରଦଖଲକୁ ଉଚ୍ଛେଦ କରିବା ପାଇଁ ଦାବି କରିଆସୁଥିଲେ ସୁଦ୍ଧା କୌଣସି ସୁଫଳ ମିଳିପାରୁନଥିଲା । ଶେଷରେ ଆନ୍ଦୋଳନମୁହାଁ ହୋଇ ଜିଲ୍ଲା ପ୍ରଶାସନକୁ ଜବରଦଖଲ ଉଚ୍ଛେଦ ପାଇଁ ବାଧ୍ୟ କରିଥିଲେ ଉତ୍ତ୍ୟକ୍ତ ଲୋକେ । ତେବେ ବରଗଡର ସମଲେଶ୍ଵରୀ ସଂଘର ନେତୃତ୍ବରେ ହୋଇଥିବା ଆନ୍ଦୋଳନକୁ ସାମ୍ବାଦିକ ସଂଘ, ଓକିଲ ସଂଘ ତଥା ବରଗଡ଼ବାସୀ ସ୍ଵାଗତ ଜଣାଇ ସମର୍ଥନ ମଧ୍ୟ କରିଥିଲେ ।
ଏହା ମଧ୍ୟ ପଢନ୍ତୁ...ରାସ୍ତା ଚଉଡା ପାଇଁ ଜବରଦଖଲ ଉଚ୍ଛେଦ, ବ୍ୟବସାୟୀଙ୍କ ପ୍ରତିବାଦ
ହମିଦ ଓ ମେଜର ନକ୍ସା ବାଦ ବିବାଦକୁ ପଛରେ ପକାଇ ଶେଷରେ ଜିଲ୍ଲା ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ ପାଇଁ 48 ଘଣ୍ଟାର ସମୟସୀମା ଦିଆଯାଇଥିଲା ଏବଂ ସମୟ ସୀମା ସମାପ୍ତ ହେବାପରେ ଉଚ୍ଛେଦ ପ୍ରକ୍ରିୟା ଆରମ୍ଭ କରାଯାଇଥିଲା । ମାତ୍ର ଜବରଦଖଲକାରୀ ଶତାଧିକ ମହିଳା ଓ ପୁରୁଷ ଉଚ୍ଛେଦ ପ୍ରକ୍ରିୟାକୁ ବିରୋଧ କରିବାରୁ ଘଟଣାସ୍ଥଳରେ ଉତ୍ତେଜନା ଦେଖାଦେଇଥିଲା । ଅପରପକ୍ଷେ, ବରଗଡ଼ବାସୀ ଏକତ୍ରିତ ହୋଇ ଜବରଦଖଲକାରୀଙ୍କୁ ବିରୋଧ କରିବାରେ ଲାଗିବାରୁ ଅପ୍ରୀତିକର ପରିସ୍ଥିତି ଉପୁଜିଥିଲା ।
ତେବେ ପୋଲିସ ଚତୁରତାର ସହିତ ପରିସ୍ଥିତିକୁ ଆୟତ୍ତ କରିବାରେ ସଫଳ ହୋଇଥିଲା ଏବଂ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଥିଲା । ତେବେ ଏହି ରାସ୍ତାରେ ହୋଇଥିବା ଜବରଦଖଲ ଉଚ୍ଛେଦ ପରେ ନିଶ୍ଚିତ ରୂପେ ଟ୍ରାଫିକ ସମସ୍ୟା ଦୂର ହୋଇଯିବ ବୋଲି ବରଗଡ଼ବାସୀ ଆଶା ରଖିଥିଲେ । ମାତ୍ର ଉଚ୍ଚ ନ୍ୟାୟାଳୟର ରହିତାଦେଶ ପରେ ଉଚ୍ଛେଦ ପ୍ରକ୍ରିୟା ବନ୍ଦ ହୋଇଯାଇଛି ଯାହାକୁ ନେଇ ପୁଣି ଜନଅସନ୍ତୋଷ ଦେଖାଦେଇଛି । ତେବେ ଜିଲ୍ଲା ପ୍ରଶାସନ ପକ୍ଷରୁ ଏକ ଟିମ୍ ହାଇକୋର୍ଟ ଯିବାକୁ ଥିବାବେଳେ ଆସନ୍ତା 8 ତାରିଖରେ ଏହି ଉଚ୍ଛେଦ ପ୍ରକ୍ରିୟା ଆଗକୁ ବଢିବ ନା ସ୍ଥଗିତ ରହିବ ତାହା ସ୍ପଷ୍ଟ ହେବ।
ଇଟିଭି ଭାରତ, ବରଗଡ଼
