ବରଗଡ: ଚିଟଫଣ୍ଡ କମ୍ପାନୀଙ୍କ ଦ୍ବାରା ଠକାମୀର ଶିକାର ହୋଇ ଆର୍ଥିକ କ୍ଷତିଗ୍ରସ୍ତ ହୋଇଥିବା ଜମାକାରୀମାନେ ଶୁକ୍ରବାର ବରଗଡ ତହସିଲ ଅଫିସ ଆଗରେ ବିକ୍ଷୋଭ କରିଛନ୍ତି । ଜମାକାରୀଙ୍କୁ ଚିହ୍ନଟ କରିବା ସହ ତୁରନ୍ତ ଟଙ୍କା ଫେରସ୍ତ ପାଇଁ ଧାରଣା । ସେହିପରି ବରଗଡ ତହସିଲଦାରଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ 4 ଦଫା ଦାବିପତ୍ର କ୍ଷତିଗ୍ରସ୍ତଙ୍କ ମିଳିତ ମଞ୍ଚ ପକ୍ଷରୁ ପ୍ରଦାନ କରାଯାଇଛି ।
ତେବେ ଅର୍ଥ ସଂଗ୍ରହକାରୀ କମ୍ପାନୀ ଲୋକଙ୍କ ଠାରୁ କୋଟି କୋଟି ଟଙ୍କା ଠକାମୀ କରିଥିବା ବେଳେ ସରକାର ଜମାକାରୀଙ୍କୁ ଜମା ଟଙ୍କା ଫେରସ୍ତ ପାଇଁ ପ୍ରତିଶ୍ରୁତି ଦେଇ କ୍ରାଇମବ୍ରାଞ୍ଚ ତଦନ୍ତ ପରେ ବିଚାର ବିଭାଗୀୟ ତଦନ୍ତ ନିର୍ଦ୍ଦେଶ ଦେଇଥିଲେ । ଏହାପରେ କର୍ପସ ପାଣ୍ଠି ଆଦି ଗଠନ କରି ଲୋକଙ୍କ ଟଙ୍କା ଫେରାଇବା ଲାଗି କହିଥିଲେ ।
ମାତ୍ର ସରକାର ନିଜର ପ୍ରତିଶ୍ରୁତି ପାଳନ ରକ୍ଷା କରି ନାହାନ୍ତି । ଶୁକ୍ରବାର ଅସନ୍ତୁଷ୍ଟ ଜମାକାରୀ ଗଣ ସତ୍ୟାଗ୍ରହ କରି ସରକାରଙ୍କୁ ଅନୁରୋଧ କରିବା ସହ ସମସ୍ୟାର ସମାଧାନ ପାଇଁ ନିବେଦନ କରିଛନ୍ତି । ଜମାକାରୀଙ୍କ ସମସ୍ୟାର ସମାଧାନ ଶୀଘ୍ର କରା ନ ଗଲେ ଆଗାମୀ ଦିନରେ ଜମାକାରୀ କୃଷକ ଆନ୍ଦୋଳନ ଶୈଳୀରେ ବ୍ୟାପକ ଆନ୍ଦୋଳନ କରିବେ ବୋଲି କହିଛନ୍ତି ।
ଅନ୍ୟପଟେ କ୍ଷତିଗ୍ରସ୍ତ ମିଳିତ ମଞ୍ଚର ଆହ୍ବାନ କ୍ରମେ ବରଗଡ ଜିଲ୍ଲାର ସମସ୍ତ12ଟି ତହସିଲ ଆଗରେ ଧାରଣା ଦେଇଥିଲେ । ସେହିପରି ଆଜି ଓଡିଶାର 317ଟି ତହସିଲ କାର୍ଯ୍ୟାଳୟ ସମ୍ମୁଖରେ ଜମାକାରୀମାନେ ଡିଜିଟାଲ ଆନ୍ଦୋଳନ କରିଥିଲେ ।
ବରଗଡରୁ ରାଜେଶ ସରାପ, ଇଟିଭି ଭାରତ
