ଭୁବନେଶ୍ବର: ସାଧାରଣ ନିର୍ବାଚନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଭୟ ବିଜେପୁର ଓ ହିଞ୍ଜିଳି ବିଧାନସଭା ଆସନରୁ ପ୍ରାର୍ଥୀ ହୋଇଥିଲେ । ଏହି ଦୁଇଟି ଆସନରୁ ନବୀନ ଜିତିଛନ୍ତି । ହେଲେ ବିଜେପୁରକୁ ନେଇ ଉଭୟ ବିଜେପି ଓ କଂଗ୍ରେସ ମୁଖ୍ୟମନ୍ତ୍ରୀଙ୍କୁ ସମାଲୋଚନା କରିଛନ୍ତି । ବିଜେପୁରରେ ନିର୍ବାଚନ ପୂର୍ବରୁ ନିଜ ସ୍ବାର୍ଥ ପାଇଁ ମୁଖ୍ୟମନ୍ତ୍ରୀ ଯୋଜନା ବର୍ଷା କରିଥିଲେ । ପରେ ଯଦି ସେଠାରୁ ନବୀନ ଇସ୍ତଫା ଦିଅନ୍ତି ପୁଣି ସେ ପ୍ୟାକେଜ ଦେବେ ବୋଲି ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି । ସେହିପରି ବିଜେପୁରରେ ଉପନିର୍ବାଚନ ହେଲେ ବିଜେପି ଜିତିବ ବୋଲି ବିଜେପି ନେତା ପୃଥ୍ୱୀରାଜ ହରିଚନ୍ଦନ ଦୃଢୋକ୍ତି ପ୍ରକାଶ କରିଛନ୍ତି ।
ସରକାରୀ ଟଙ୍କାରେ ନିର୍ବାଚନ ଲଢ଼ିବା ନବୀନଙ୍କ ଏକ ପୁରୁଣା ଅଭ୍ୟାସ ଯାହା ଗଣତନ୍ତ୍ର ପାଇଁ ଶୁଭଙ୍କର ନୁହେଁ। ନିର୍ବାଚନ ପୂର୍ବରୁ ଜିତିବାକୁ ସେଠାରେ ଯୋଜନା ବର୍ଷା କରିଥିଲେ। ପୁଣି ଇସ୍ତଫା ଦେଲେ ଲୋକଙ୍କୁ ତୋଷ କରିବାକୁ ଯୋଜନା ବର୍ଷା କରିବେ ବୋଲି ନିରଞ୍ଜନ କହିଛନ୍ତି । ସେପଟେ ବିଜେପି ନେତା ପୃଥ୍ୱୀରାଜ ହରିଚନ୍ଦନ କହିଛନ୍ତି, ନବୀନଙ୍କ ଠକାମୀ ଲୋକେ ବୁଝିସାରିଲେଣି। ପୂର୍ବରୁ ବିଜେପୁର ଉପନିର୍ବାଚନରେ ଠକିଥିବା ବେଳେ ଏବେ ପୁଣି ଉପନିର୍ବାଚନ ସ୍ଥିତି ଉପୁଜିବାର ପରିସ୍ଥିତି ରହିଛି । ବିଜେପୁରବାସୀ ମଧ୍ୟ ଭଲ ଭାବରେ ଜାଣି ଗଲେଣି ।
ଏପରିକି ବିଜେପିକୁ ମଧ୍ୟ ବହୁତ ଭୋଟ ବିଜେପୁରରୁ ମିଳିଛି। ଉପନିର୍ବାଚନ ସମୟରେ ଉଚିତ ଜବାବ ଦେବେ ବୋଲି କହିଛନ୍ତି। ଅନ୍ୟପକ୍ଷରେ ବରଗଡ଼ ପଦ୍ମପୁର ବିଧାୟକ ବିଜୟ ରଞ୍ଜନ ସିଂ ବରିହା କହିଛନ୍ତି, ଏବେ ନୁହେଁ ବିଜେପୁର ପାଇଁ ବହୁ ଆଗରୁ ବିଜୁ ବାବୁଙ୍କ ଅମଳରୁ ଗୁରୁତ୍ୱ ଦିଆଯାଇ ଆସିଛି। ପୂର୍ବରୁ ଅନେକ ଘୋଷଣା କରାଯାଇଛି। ସେଥିରୁ ବହୁତ କାର୍ଯ୍ୟ କରିଛି। ବିଜେପୁର ଏବେ ବିଜେଡି ଫୋକ୍ସରେ ଥିବା ବେଳେ ବିରୋଧୀ ବିଜେପି ଓ କଂଗ୍ରେସ ମଧ୍ୟ କଳେବଳେ କୌଶଳେ ଲଢ଼ି ଏହି ସିଟ ହାତେଇବା ପାଇଁ ଯୋଜନା ଆରମ୍ଭ କରିଦେଲେଣି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
