ବରଗଡ: ପଦ୍ମପୁର ଉପନିର୍ବାଚନ(Padampur bypoll) ପାଇଁ ଆଜି ପ୍ରଚାର ସରୁଥିବା ବେଳେ ଗତକାଲି(ଶୁକ୍ରବାର) ବର୍ଷା ସିଂ ବରିହାଙ୍କ ଲାଗି ଭୋଟ ମାଗିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୈଦାନକୁ ଓହ୍ଲାଇ ଥିଲେ । ମୁଖ୍ୟମନ୍ତ୍ରୀ ପଦ୍ମପୁର ନିର୍ବାଚନ ମଣ୍ଡଳୀର ଝାରବନ୍ଧ, ପାଇକମାଲ ଓ ପଦ୍ମପୁର ଗସ୍ତ କରି ଜନସାଧାରଣଙ୍କୁ ଉଦବୋଧନ ଦେଇଥିଲେ ଏବଂ ବିଜେଡି ପ୍ରାର୍ଥିନୀଙ୍କୁ ଭୋଟ ଦେବାକୁ ଅପିଲ କରିଥିଲେ । ତେବେ ମୁଖ୍ୟମନ୍ତ୍ରୀଙ୍କ ଏହି ପ୍ରଚାର କାର୍ଯ୍ୟକ୍ରମ ଶେଷ ହେବା ପରେ ସୋସିଆଲ ମିଡିଆରେ ଟ୍ରୋଲ ହେଉଛନ୍ତି ପ୍ରାର୍ଥିନୀ ବର୍ଷା । ତାଙ୍କ ସହ ବିଜେଡି ବିଧାୟକ ସୁଶାନ୍ତ ସିଂ ମଧ୍ୟ ଖୁବ୍ ଟ୍ରୋଲ ହେଉଛନ୍ତି ।
ଏହାର କାରଣ, ଶୁକ୍ରବାର ମୁଖ୍ୟମନ୍ତ୍ରୀଙ୍କ ସମ୍ମୁଖରେ ବର୍ଷା ସିଂ ବରିହା ଯେତେବେଳେ ମଞ୍ଚରେ ଭାଷଣ ଦେବାକୁ ଆସିଥିଲେ, ସେ ଭାଷଣରେ ୪୦୦ କୋଟି ଓଡିଶାର ପ୍ରିୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୋଲି କହିଥିଲେ । ଯାହାକୁ ନେଇ ସେ ସୋସିଆଲ ମିଡିଆରେ ଟ୍ରୋଲର ଶିକାର ହୋଇଥିବା ବେଳେ ଭଟଲି ବିଧାୟକ ସୁଶାନ୍ତ ସିଂଙ୍କର ଏକ ବାଇଟ ସୋସିଆଲ ମିଡିଆରେ ଭାଇରାଲ ହେଉଛି । ଏଥିରେ ବିଧାୟକ ନିଜ ଦଳକୁ(ବିଜେଡି) ଗୁଣ୍ଡାଗର୍ଦ୍ଦି କରୁଥିବା କହିଛନ୍ତି ।
ବିଜୁ ଜନତା ଦଳ ବିଜେପୁର ଉପନିର୍ବାଚନରେ ହିଂସାକାଣ୍ଡ ଘଟାଇଥିଲେ ଏବଂ ଏଠାରେ ମଧ୍ୟ ସେମାନେ ସାମ୍ବାଦିକ ଓ କର୍ମୀମାନଙ୍କ ଉପରେ ଆକ୍ରମଣ କରିଥିଲେ ବୋଲି ସୁଶାନ୍ତ ସିଂ କହିଥିବା ଶୁଣିବାକୁ ମିଳିଛି । ତେବେ ତାଙ୍କ ପାଟିରୁ ହୁଏ ତ ଏହା ଭୁଲରେ ବାହାରି ଯାଇଥିବ । ମାତ୍ର ଏହାକୁ ନେଇ ସୋସିଆଲ ମିଡିଆରେ ଟ୍ରୋଲ ହେବାରେ ଲାଗିଛନ୍ତି ଏହି ବିଜେଡି ବିଧାୟକ ।
ଇଟିଭି ଭାରତ, ବରଗଡ
