ବରଗଡ: ମୁଖ୍ୟମନ୍ତ୍ରୀ ବିଜେପୁର ଆସନରେ ଜିତିବା ପରେ ଅମାପ ସ୍ବପ୍ନ ଦେଖିଥିଲେ ବିଜେପୁରବାସୀ । ହେଲେ ବିଜେପୁରବାସୀଙ୍କ ସବୁ ସ୍ବପ୍ନ ଭାଙ୍ଗିରୁଜି ଚୁରମାର ହୋଇଯାଇଛି । ପ୍ରଥମେ ଉପନିର୍ବାଚନର ପ୍ରତିଶ୍ରୁତି ପୁଣି କିଛି ମାସ ମଧ୍ୟରେ ସାଧାରଣ ନିର୍ବାଚନର ପ୍ରତିଶୃତି ଦେଇ ସରକାର ସ୍ବପ୍ନ ଦେଖାଇଲେ । ହେଲେ ପରବର୍ତ୍ତୀ ମୁହୂର୍ତ୍ତରେ କୌଣସି ପ୍ରତିଶୃତି କାର୍ଯ୍ୟକାରୀ କରାଯାଇ ନାହିଁ । ଫଳରେ ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ଏଠାକାର ଲୋକେ ।
ତେବେ ବିଜେପୁରରେ ରହିଛି ଗୋଟିଏ ମାତ୍ର ମେଡିକାଲ । ଯାହା ଉପରେ ଲକ୍ଷାଧିକ ଲୋକେ ନିର୍ଭର କରନ୍ତି । କିନ୍ତୁ ବିଡମ୍ବନାର ବିଷୟ ଏଠାରେ ମାତ୍ର ଜଣେ ଡାକ୍ତର ଅଛନ୍ତି । ଏଥିପାଇଁ ରୋଗୀ ନାନା ଅସୁବିଧାର ସମ୍ମୁଖିନ ହୁଅନ୍ତି । ଏନେଇ ବିଜେପୁରବାସୀ ପୂର୍ବରୁ ଆମରଣ ଅନଶନରେ ବସିଥିଲେ ଲୋକେ । ଦୀର୍ଘଦିନ ଧରି ଅନଶନ ପରେ ଜିଲ୍ଲା ପ୍ରଶାସନ ସ୍ଥାନୀୟ ଲୋକଙ୍କୁ ଡ଼ାକ୍ତର ଯୋଗେଇଦେବେ ବୋଲି ପ୍ରତିଶ୍ରୁତି ଦେବାପରେ ଅନଶନ ଭାଙ୍ଗିଥିଲା । କିନ୍ତୁ ଲୋକ ଦେଖାଣିଆ ଭାବେ ଜଣେ ମାତ୍ର ଡ଼ାକ୍ତର ଦିନକ ପାଇଁ ବିଜେପୁରର ମେଡିକାଲକୁ ଆସିଥିଲେ ସତ, ମାତ୍ର ଆଉ ତାଙ୍କର ଦେଖା ନାହିଁ ।
ତେଣୁ ପୁଣି ଥରେ ସେହି ସମାନ ଦାବି ନେଇ ଆନ୍ଦୋଳନ ପାଇଁ ସଜବାଜ ହେଉଛନ୍ତି ଲୋକେ । ନେଇ ଗ୍ରାମବାସୀ ଜିଲ୍ଲାପାଳଙ୍କୁ ଭେଟି ଦାବି ପତ୍ର ପ୍ରଦାନ କରିଛନ୍ତି । ଯଦି ସରକାର ସେମାନଙ୍କ ଦାବି ପୂରଣ ନ କରନ୍ତି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନରେ ବସିବାକୁ ଚେତାବନୀ ଦେଇଛନ୍ତି ଗ୍ରାମବାସୀ ।
ବରଗଡରୁ ରାଜେଶ ସରାପ, ଇଟିଭି ଭାରତ
