ବରଗଡ: ଚଳିତ ଖରିଫ ଫସଲର ଧାନ ବିକ୍ରି ପ୍ରକ୍ରିୟାରେ ରାଜ୍ୟ ସରକାର ଲାଗୁ କରିଥିବା ଟୋକନ ବ୍ୟବସ୍ଥା ବରଗଡ ଜିଲ୍ଲାର ଚାଷୀଙ୍କ ପାଇଁ ସାଜିଛି କାଳ । କେବଳ ହୀରାକୁଦ କମାଣ୍ଡ ଏରିଆର ଚାଷୀ ନୁହେଁ ଖୋଦ୍ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜୟୀ ହୋଇଥିବା ବିଧାନସଭାର ଚାଷୀ ମଧ୍ୟ ନାନା ସମସ୍ୟାର ସମ୍ମୁଖୀନ ହେଉଛନ୍ତି । ଏଠାକାର ଚାଷୀ ଧାନ ଅମଳ କରି ସାରିଥିବା ବେଳେ ଏମାନଙ୍କ ନାଁରେ ଆସିନାହିଁ ଟୋକନ ।
ସେପଟେ ରବି ଫସଲ ପାଇଁ ଚାଷୀ ଅଣ୍ଟା ଭିଡି ସାରିଥିବା ବେଳେ ଶ୍ରମିକମାନଙ୍କୁ ମଜୁରୀ ଦେବା ପାଇଁ ପାଖରେ ଟଙ୍କା ମଧ୍ୟ ନାହିଁ । ଫଳରେ ବିଜେପୁର ଅଞ୍ଚଳର ଚାଷୀ ବେପାରୀ ହାତରେ କମ୍ ମୂଲ୍ୟରେ ଧାନ ବିକ୍ରି କରିବାକୁ ବାଧ୍ୟ ହେଉଛନ୍ତି । ଅମଳ ଧାନକୁ ମଣ୍ଡିରେ ବିକ୍ରି କଲେ ଚାଷୀକୁ ୧୮୫୦ ଟଙ୍କା ମିଳୁଥିବା ବେଳେ ବେପାରୀକୁ 1200ଟଙ୍କାରେ ବିକ୍ରି କରି ଗୋଟିଏ କ୍ବିଣ୍ଟାଲ ପିଛା 650 ଟଙ୍କା କ୍ଷତି ସହୁଛି ଚାଷୀ । ନିଜ କଷ୍ଟ ଉପାର୍ଜିତ ଧାନକୁ କମ ଦରରେ ବିକ୍ରି କରି ଚାଷୀ ଆଜି ହତାଶ ।
ଯେଉଁ ଅଞ୍ଚଳର ଚାଷୀ ନବୀନ ସରକାରଙ୍କୁ ଭରଷା କରି ନିର୍ବାଚନରେ ବିଜୟୀ କରିଥିଲେ ସେହି ବିଜେପୁରର ଚାଷୀ ଆଜି ମିଥ୍ୟା ପ୍ରତିଶ୍ରୁତିର ଶିକାର ହୋଇ ଶୋଷଣ ହେଉଛନ୍ତି । ଅନ୍ୟପଟେ ବିଜେପି ଦଳ ନେତା ସନତ ଗଡତିଆ ମଧ୍ୟ ଚାଷୀଙ୍କ ସପକ୍ଷରେ ଆନ୍ଦୋଳନକୁ ଓହ୍ଲାଇ ଟୋକନ ବ୍ୟବସ୍ଥା ଉଚ୍ଛେଦ ପାଇଁ ଦାବି କରିବେ ବୋଲି କହିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
