ବରଗଡ: ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି ଛବିଳ ବର୍ଣ୍ଣବୋଧ ପୁସ୍ତକ ପୋଡା ଭିଡିଓ । ଯାହାକୁ ନେଇ ଦେଖା ଦେଇଥିବା ବିବାଦରେ ଶନିବାର ପଦ୍ମଶ୍ରୀ ହଳଧର ନାଗ ଏକ ସାମ୍ବାଦିକ ସମ୍ବିଳନୀ ଡକାଇଥିଲେ । କୌଣସି ଭାଷାକୁ ଅସମ୍ମାନ ଜଣାଇବା ଘଟଣାକୁ ସେ ନିନ୍ଦା କରିବା ସହ ତାଙ୍କ ଅଜାଣତରେ ତାଙ୍କ ଫଟୋକୁ ବ୍ୟବହାର କରି ସୋସିଆଲ ମିଡିଆରେ ଭାଇରାଲ କରାଯାଇଥିବା ଏହି ଘଟଣା ଯୋଗୁଁ ସେ ମର୍ମାହତ ବୋଲି ଜଣାଇଥିଲେ ।
ଅଗଷ୍ଟ 15, ସ୍ବାଧୀନତା ଦିବସ ଦିନ କୋଶଳସାହିତ୍ୟ.ଇନ ୱେବସାଇଟରେ ଛବିଳ ବର୍ଣ୍ଣବୋଧ ପୁସ୍ତକକୁ ପୋଡା ଯାଉଥିବାର ଏକ ଭିଡିଓ ଭାଇରାଲ ହେବାରେ ଲାଗିଥିଲା । ଯାହାକୁ ନେଇ ପରେ ବିବାଦ ଆରମ୍ଭ ହୋଇଥିଲା ଏବଂ ଏହି ବିବାଦ ପହଞ୍ଚିଥିଲା ଥାନାରେ । ମେଳ ଛାମୁଣ୍ଡା ପୋଲିସ ଏହି ଘଟଣାରେ ସାକେତ ଶ୍ରୀଭୂଷଣ ସାହୁଙ୍କୁ ଗିରଫ କରିଥିବା ବେଳେ ପଦ୍ମଶ୍ରୀ ହଳଧର ନାଗଙ୍କୁ ସୋସିଆଲ ମିଡିଆରେ ବଦନାମ କରାଯାଉଥିବା ଦେଖାଯାଇଛି ।
ତେବେ ପଦ୍ମଶ୍ରୀ ହଳଧର ନାଗଙ୍କ ଫଟୋକୁ ଏହି ୱେବସାଇଟରେ ବ୍ୟବହାର କରାଯାଇ ଏହି ଘଟଣାରେ ସମ୍ପୃକ୍ତି ଥିବା ନେଇ ଫେସବୁକରେ ତାଙ୍କୁ ଅଶୋଭନୀୟ କମେଣ୍ଟ ଲୋକେ ଦେଉଥିବା ଦେଖିବାକୁ ମିଳୁଛି । ଏହି ଘଟଣାରେ ପଦ୍ମଶ୍ରୀ ହଳଧର ନାଗଙ୍କର କୌଣସି ହାତ ନଥିବା ନେଇ ସାମ୍ବାଦିକ ସମ୍ବିଳନୀ ମାଧ୍ୟମରେ ସ୍ପଷ୍ଟୀକରଣ ଜଣାଇଛନ୍ତି ।
ସେ ଆଦୌ ପାଠ ପଢି ନାହାନ୍ତି ଏବଂ ଫେସବୁକ ଓ ଇଣ୍ଟରନେଟ ଇତ୍ୟାଦି ବିଷୟରେ ତାଙ୍କର ଆଦୌ ଅଭିଜ୍ଞତା ନାହିଁ । ଏପରିକି ସେ ତାଙ୍କର ନିଜ ମୋବାଇଲରେ ଫୋନ କରିବା ମଧ୍ୟ ଜାଣି ନାହାନ୍ତି । କେବଳ ଫୋନ ଆସିଲେ ସେ ମୋବାଇଲର ଗୋଟିଏ ସୁଇଚକୁ ଟିପି ଫୋନରେ କଥା ହୋଇଥାନ୍ତି ବୋଲି ସମ୍ମିଳନୀରେ କହିଛନ୍ତି । ତେବେ ଏହି ଘଟଣାକୁ ସେ ନିନ୍ଦା କରିବା ସହିତ ଥାନାରେ ଏତଲା ଦେଇଥିଲେ ଏବଂ ପୋଲିସ ମଧ୍ୟ ଅଭିଯୁକ୍ତଙ୍କୁ ଗିରଫ କରିଥିବା ହଳଧର କହିଛନ୍ତି ।
ବରଗଡରୁ ରାଜେଶ ସରାପ, ଇଟିଭି ଭାରତ
