ବରଗଡ: ପରିବାର ପର କରିବା ପରେ ମୁଣ୍ଡ ଗୁ଼ଞ୍ଜିବା ପାଇଁ ଘର ଆଉ ପେଟ ଭରିବାକୁ ଦି ଓଳି ଦାନା ଯୋଗାଡୁଥିଲା ଅନାଥ ଆଶ୍ରମ ଓ ବୃଦ୍ଧାଶ୍ରମ । ଘରଠାରୁ ଦୂରରେ ରହିବାରୁ ଦୁଃଖ ଭୁଲି ପୁଣି ଜୀବନ ଜୀଇଁବାର କଳା ଶିଖାଇଥିଲା ଏହି ଆଶ୍ରମ । ହେଲେ କୋରୋନା ମାଡରେ ଏବେ ନିଜେ ଅନାଥ ହୋଇପଡିଛି ଏହି ଆଶ୍ରମ ସବୁ । ଆଉ ପର୍ବ ପର୍ବାଣୀ ନା କେହି ଆସୁଛନ୍ତି ନା ପୂଣ୍ୟ ଅର୍ଜନ ପାଇଁ କେହି ଆସି ଦାନ ଧର୍ମ କରୁଛନ୍ତି ।
ଆଗରୁ କିଛି ବଦାନ୍ୟ ବ୍ୟକ୍ତିଙ୍କ ସହଯୋଗରେ ଅନାଥ ଝିଅ ହାତକୁ ଦି ହାତ ହେଉଥିବା ବେଳେ ଏବେ ଅସହ୍ୟ ହୋଇ ପଡିଛି ଏମାନଙ୍କ ଜୀବନ । ବରଗଡ ଜିଲ୍ଲାରେ ଦେଖିବାକୁ ମିଳିଛି ଏପରି କିଛି ହୃଦୟ ବିଦାରକ ଦୃଶ୍ୟ । ଜିଲ୍ଲାର ଅନାଥ ଆଶ୍ରମ ଓ ବୃଦ୍ଧାଶ୍ରମକୁ ଆଗପରି ଆଉ ଛୁଟୁନି ବଦାନ୍ୟ ବ୍ୟକ୍ତିଙ୍କ ଭିଡ । ନା ଆସୁଛି ନୂଆ ଅନୁଦାନ ନା ମିଳୁଛି ଅନ୍ତେବାସୀଙ୍କୁ ଉପଯୁକ୍ତ ଖାଦ୍ୟ । ଏମିତିରେ ସ୍ବାସ୍ଥ୍ୟ ସମସ୍ୟା କଥା ପଚାରେ କିଏ ?
ବରଗଡ ଜିଲ୍ଲାରେ ରହିଛି ମୋଟ 4ଟି ଅନାଥ ଆଶ୍ରମ । ଯେଉଁଠି ଆଶ୍ରୟ ନେଇଛନ୍ତି 118 ଅନାଥ ଶିଶୁ । ସେପଟେ 5ଟି ବୃଦ୍ଧାଶ୍ରମରେ ମୁଣ୍ଡ ଗୁଞ୍ଜିଛନ୍ତି 100 ବୟୋଜ୍ୟେଷ୍ଠ । ଏହି ଆଶ୍ରମ ମଧ୍ୟରୁ କେତେକକୁ ସରକାରୀ ଅନୁଦାନ ମିଳୁଥିଲେ ସୁଦ୍ଧା ସାଧାରଣ ଲୋକଙ୍କ ସାହାଯ୍ୟ ବିନା ଏକପ୍ରକାର ଅକାମୀ ହୋଇପଡେ ଆଶ୍ରମ । ହେଲେ କୋରୋନା ଲକଡାଉନ ପାଇଁ ଏବେ ଘରୁ ବାହାରିବାକୁ ଡରୁଛନ୍ତି ଲୋକେ । ସେପଟେ ଦୀର୍ଘ ଦିନ ଧରି ବ୍ୟବସାୟ ବନ୍ଦ ଥିବାରୁ ବିଗିଡିଥିବା ଆର୍ଥିକ ଅବସ୍ଥା ନେଇ ଦାନ କରିବାକୁ ପଛ ଘୁଞ୍ଚା ଦେଉଛନ୍ତି ଲୋକେ ।
ତଥାପି ମହାମାରୀରେ କିଛି ଦିନ ପର୍ଯ୍ୟନ୍ତ ଜିଲ୍ଲାର କିଛି ସ୍ବେଚ୍ଛାସେବୀ ଅନୁଷ୍ଠାନ ଆଶ୍ରମମାନଙ୍କରେ ଖାଦ୍ୟ ବିତରଣ କରିଥିଲେ । ହେଲେ ଏବେ ପୁଣି ଅବସ୍ଥା ଅକଥନୀୟ ହୋଇ ପଡିଛି । କେତେବେଳେ ଖାଇବାକୁ ମିଳୁଛି ତ କେତେବେଳେ ଭୋକ ଓପାସରେ କଟୁଛି ଦିନ । ଏମିତିରେ ଆଜି ଯାଏଁ ସରକାରୀ ଦୃଷ୍ଟି ଆକର୍ଷଣ କରିବାରେ ଅକ୍ଷମ ହୋଇ ପଡିଛି ଏହି ସବୁ ଆଶ୍ରମ ।
କୋରୋମା ମହାମାରୀର ମୁକାବିଲା ପାଇଁ ରାଜ୍ୟ ସରକାରୀ ଘୋଷଣା କରିଛନ୍ତି ବିଭିନ୍ନ ପ୍ୟାକେଜ । ହେଲେ ପରିବାର ପରି ଏହି ଆଶ୍ରମ ଅନ୍ତେବାସୀଙ୍କୁ ଅଣଦେଖା କରି ଏମାନଙ୍କୁ ପୁଣି ପର କରିଛନ୍ତି ସରକାର । ଏମିତିରେ ଅନ୍ତେବାସୀମାନଙ୍କ କଥା ରାଜ୍ୟ ସରକାର ତୁରନ୍ତ ଚିନ୍ତା କରି ପଦକ୍ଷେପ ଗ୍ରହଣ କରିବା ପାଇଁ ସାଧାରଣରେ ଜୋର ଧରିଛି ଦାବି ।
ବରଗଡରୁ ରାଜେଶ ସରାପ, ଇଟିଭି ଭାରତ
