ବରଗଡ: କର୍ମଚାରୀଙ୍କୁ ମିଳିନି 24 ମାସର ଦରମା । ଦୁର୍ଦ୍ଦିନରେ ଦିନ କାଟୁଛନ୍ତି କାରଖାନାର ୨୨୦ଜଣ ସ୍ଥାୟୀ କର୍ମଚାରୀଙ୍କ ୧୧୦୦ ପରିବାର । ଏଭଳି ଅଭାବନୀୟ ଘଟଣା ଘଟିଛି ବରଗଡ ତୋରାଠାରେ ଥିବା ସମବାୟ ଚିନି କାରଖାନାରେ । କାରଖାନା ଦୀର୍ଘ ଦିନରୁ ବନ୍ଦ ହୋଇ ପଡି ରହିଥିବାବେଳେ ଆଗକୁ ଚାଲିବ ନା ନାହିଁ ସେ ନେଇ ସନ୍ଦେହ ଉପୁଜିଛି । ତେବେ ନିଜର 24 ମାସର ପ୍ରାପ୍ୟ ପାଇଁ ଦୀର୍ଘ 53 ଦିନ ହେଲାଣି କାରଖାନାର ମୁଖ୍ୟ ଫାଟକ ସାମନାରେ ଧାରଣାରେ ବସିଛନ୍ତି ସମସ୍ତ କର୍ମଚାରୀ । କିନ୍ତୁ ନା ଶୁଣୁଛି ଏଠାକାର ପ୍ରଶାସନ ନା ସ୍ଥାନୀୟ ବିଧାୟକ ନା ମନ୍ତ୍ରୀ । ତେବେ ଏହାକୁ ନେଇ ବୁଧବାର ଆନ୍ଦୋଳନକାରୀ ବରଗଡ଼ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି ।
ଆନ୍ଦୋଳନକାରୀଙ୍କ ଧାରଣାକୁ 53 ଦିନ ବିତି ଯାଇଥିଲେ ସୁଦ୍ଧା ତାଙ୍କର ୨4ମାସର ଦରମା ସେମାନଙ୍କୁ ମିଳିବ ନା ନାହିଁ ? ଆଗକୁ ଏହି ସୁଗାର ମିଲ ଚାଲିବ ନା ନାହିଁ ? ଏବିଷୟରେ କୌଣସି ସ୍ପଷ୍ଟିକରଣ ଦିଆ ଯାଉ ନ ଥିବାରୁ ଆନ୍ଦୋଳନକାରୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ଶେଷରେ ୨୨୦ଜଣ କର୍ମଚାରୀଙ୍କ ପରିବାରର ୧୧୦୦ ଲୋକ ଆଗାମୀ ସାଧାରଣ ନିର୍ବାଚନରେ ଭୋଟକୁ ବର୍ଜନ କରିବେ ବୋଲି ନିଷ୍ପତ୍ତି ନେଇଛନ୍ତି । କର୍ମଚାରୀମାନେ ଦୀର୍ଘ ବର୍ଷରୁ ଏଠାରେ କାମ କରୁଥିବାବେଳେ ମଧ୍ୟ 1988 ମସିହାରେ ଲାଗୁ ହୋଇଥିବା ତୃତୀୟ ବେତନ କମିଶନ ଅନୁସାରେ ଖୁବ କମ ମୂଲ୍ୟର ଦରମା ପାଉଛନ୍ତି ।
ବହୁ ବର୍ଷ ପୂର୍ବରୁ ତୋରାଠାରେ ରହିଥିବା ସମବାୟ ସୂତା କଳର ମଧ୍ୟ ଠିକ ଏହିପରି ଅବସ୍ଥା ହୋଇଥିଲା ଏବଂ ପର ମୁହୂର୍ତ୍ତରେ ସେହି ସମବାୟ ସୂତା କଳ ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା । ଫଳରେ ସେଠାରେ କାମ କରୁଥିବା କର୍ମଚାରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ । ଆଜିଯାଏଁ ଲୋକଙ୍କ ମନରୁ ସେହି ଦୁଃଖ ଲିଭି ପାରିନଥିବାବେଳେ ପୁଣି ଏହି ଚିନି କାରଖାନାର ଏପରି ଦୂରାବସ୍ଥା ସମସ୍ତ କର୍ମଚାରୀଙ୍କ ମନରେ ଭୟ ସୃଷ୍ଟି କରିଦେଇଛି ।
ବରଗଡରୁ ରାଜେଶ ସରାପ, ଇଟିଭି ନ୍ୟୁଜ
