ବରଗଡ଼: ସମୟ ଥିଲା ନିଜ ଜମିରୁ ଚାଷବାସ କାମ କରି ବାହାରେ ମଧ୍ୟ କାମଧାମ କରି ବେଶ ଦୁଇ ପଇସା ରୋଜଗାର କରି ନିଜ ପରିବାର ଗୁଜୁରାଣ ମେଣ୍ଟାଉଥିଲେ ବରଗଡ଼ ସଦର ରୁହୁଣିଆ ଗ୍ରାମର ଜିତେନ୍ଦ୍ର ପ୍ରଧାନ। ହେଲେ ବିଧିର ବିଧାନ ଥିଲା କିଛି ଅଲଗା। ଦୁର୍ଘଟଣାର ଶିକାର ହୋଇ ସର୍ବସ୍ବ ହରାଇ ଘରେ ପଡିରହିଲେ ଜିତେନ୍ଦ୍ର ଏବଂ ନିଜ ଚିକିତ୍ସା ତ ଦୂରର କଥା ଘର ଚଳାଇବା ପାଇଁ ମଧ୍ୟ ଅସମର୍ଥ ହୋଇ ପଡିଛନ୍ତି ସେ।
ବରଗଡ଼ ସଦରର ରୁହୁଣିଆ ଗ୍ରାମର ଜିତେନ୍ଦ୍ର ପ୍ରଧାନ ନିଜ ଅଢ଼େଇ ଏକର ଜମିରେ ଚାଷ କାମ କରିବା ସହିତ ବରଗଡ଼ର ଏକ ଘରୋଇ କମ୍ପାନୀରେ କାମ ମଧ୍ୟ କରୁଥିଲେ । ଏପରି ଅକ୍ଲାନ୍ତ ପରିଶ୍ରମ କରି ଜିତେନ୍ଦ୍ର ନିଜ ଦୁଇ ସନ୍ତାନ ଓ ମା ବାପାଙ୍କ ସହିତ ପୁରା ପରିବାରର ଭରଣ ପୋଷଣ କରୁଥିଲେ । ଗତ ମାର୍ଚ୍ଚ ମାସ 5 ତାରିଖରେ ଜିତେନ୍ଦ୍ର କାମରେ ଯାଇଥିବା ବେଳେ ବରଗଡ଼ କାଳୀ ମନ୍ଦିର ଛକ ଠାରେ ତାଙ୍କର ଦୁର୍ଘଟଣା ହୋଇଥିଲା। ସେ ବାଇକରେ ଯାଉଥିବା ବେଳେ ରାସ୍ତା କଡ଼ରେ ଛିଡ଼ା ହୋଇଥିବା ଏକ କାରର କବାଟ ଭିତରପଟୁ ହଠାତ କେହି ଖୋଲି ଦେଇଥିଲା । ଫଳରେ ଜିତେନ୍ଦ୍ର ଏକ ଟ୍ରାକ୍ଟର ଟ୍ରଲିରେ ପିଟିହୋଇ ତଳେ ପଡ଼ିଯାଇଥିଲେ। ଏହି ଦୁର୍ଘଟଣାରେ ଜିତେନ୍ଦ୍ରଙ୍କ ଗୋଡ଼ ଅଚଳ ହୋଇଯାଇଥିଲା, ମୁଣ୍ଡରେ ଗଭୀର କ୍ଷତ ହୋଇ ଉପର ଭାଗ ଖପୁରି ସମ୍ପୂର୍ଣ୍ଣ ଉଠିଯାଇଥିଲା । ସ୍ଥାନୀୟ ଲୋକେ ତାଙ୍କର ମୃତ୍ୟୁ ହୋଇଯାଇଥିବା ଭାବି ନେଇଥିଲେ କିନ୍ତୁ ଭଗବାନଙ୍କ କୃପାରୁ ସେ ବଞ୍ଚିଯାଇଥିଲେ।
ଦୀର୍ଘ 7 ମାସ ପର୍ଯ୍ୟନ୍ତ ଚିକିତ୍ସା ହେବାପରେ ତାଙ୍କ ଜୀବନ ବଞ୍ଚି ଯାଇଥିଲା ହେଲେ ଦୁର୍ଘଟଣା ପରେ ତାଙ୍କର ଡାହାଣ ଆଖି ଏବଂ ଡାହାଣ ଗୋଡ଼ ମଧ୍ୟ ଅକର୍ମଣ୍ୟ ହୋଇପଡିଲା । ଜିତେନ୍ଦ୍ରଙ୍କ ବାପା ତାଙ୍କର ବୃଦ୍ଧାବସ୍ଥାରେ ମଧ୍ୟ ପୁଅକୁ ବଞ୍ଚାଇବା ପାଇଁ ସମସ୍ତ ଧନ ସମ୍ପତ୍ତି ଖର୍ଚ୍ଚ କରିଦେଲେ । ବଡ଼ ବଡ଼ ଡ଼ାକ୍ତରଖାନାରେ ପୁଅର ଚିକିତ୍ସା ପାଇଁ ଆଠ ଲକ୍ଷରୁ ଅଧିକ ଟଙ୍କା ଖର୍ଚ୍ଚ କରି ପୁଅକୁ ଫେରିପାଇଥିଲେ। ହେଲେ ପୁଅର ଚିକିତ୍ସା ପାଇଁ ସେତିକି ଅର୍ଥ ପର୍ଯ୍ୟାପ୍ତ ହୋଇନଥିଲା । ଆହୁରି ଅର୍ଥ ଦରକାର ପଡ଼ିଥିଲା ତେଣୁ ସର୍ବସ୍ବ ହରାଇଥିବା ବାପା ପାଖରେ ଆଉ ଅଧିକ ଟଙ୍କା ନଥିବାରୁ ସେ ପୁଅକୁ ନେଇ ନିଜ ଘରକୁ ଫେରିଆସିଥିଲେ ।
ବର୍ତ୍ତମାନ ଜିତେନ୍ଦ୍ରଙ୍କ ଚିକିତ୍ସା ପାଇଁ ଟଙ୍କା ତ ଦୂରର କଥା ଖାଇବା ପାଇଁ ମଧ୍ୟ ଘରେ ଦାନା ଟିଏ ନାହିଁ । ଗୋଟିଏ ପଟେ ପିଲାଛୁଆଙ୍କ ପାଠପଢ଼ା ଚିନ୍ତା ଓ ପରିବାର ପୋଷଣର ଚିନ୍ତା ଘାରିଥିବା ବେଳେ ଅନ୍ୟପଟେ ଜିତେନ୍ଦ୍ରଙ୍କ ଚିକିତ୍ସା ପାଇଁ ଅର୍ଥ ସାଜିଛି ବାଧକ । ତେବେ ବରଗଡ଼ ଜିଲ୍ଲାପାଳଙ୍କୁ ଚିକିତ୍ସା ପାଇଁ ସହାୟତା ନିବେଦନ କରିଛନ୍ତି ଜିତେନ୍ଦ୍ର ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
