ବରଗଡ: ଓଡିଶାରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢିଚାଲିଥିବା ବେଳେ ବାହାର ରାଜ୍ୟରୁ ଫେରିଥିବା ବହୁ ପ୍ରବାସୀ ଶ୍ରମିକ କୋରୋନା ଆକ୍ରାନ୍ତ ବାହାରୁଛନ୍ତି । ଯାହାକୁ ନେଇ ରାଜ୍ୟରେ ଏକ ଭୟର ବାତାବରଣ ସୃଷ୍ଟି ହୋଇଯାଇଛି । ଜିଲ୍ଲା ପ୍ରଶାସନ ମଧ୍ୟ ଅନ୍ୟରାଜ୍ୟରୁ ଫେରୁଥିବା ଲୋକଙ୍କୁ ନେଇ ଅଧିକ ସତର୍କତା ଅବଲମ୍ବନ କରୁଥିବା ବେଳେ ସୋମବାର ବରଗଡ ଜିଲ୍ଲାକୁ କେରଳ ରାଜ୍ୟରୁ ଏକ ମାଲବାହୀ ଟ୍ରେନ ଯୋଗେ ଜଣେ ବ୍ୟକ୍ତି ପହଞ୍ଚିଥିବାକୁ ନେଇ ପ୍ରଶାସନର ଚିନ୍ତା ବଢିଯାଇଛି ।
ବରଗଡ ଏସିସି ସିମେଣ୍ଟ ଫ୍ୟାକ୍ଟ୍ରିକୁ ଆସୁଥିବା ଏକ କୋଇଲା ବୋଝେଇ ଟ୍ରେନରେ କେରଳ ରାଜ୍ୟର ଜଣେ ବ୍ୟକ୍ତି ଲୁଚି ଚାଲିଆସିଥିବା ବେଳେ ଟ୍ରେନଟି ସିଧାସଳଖ ଏସିସି ସିମେଣ୍ଟଫ୍ୟାକ୍ଟ୍ରି ଭିତରକୁ ପ୍ରବେଶ କରିଥିଲା | ସେଠାରେ କୋଇଲା କାଢିବାକୁ ଥିବା ଲୋକ ବ୍ୟକ୍ତିଙ୍କୁ ଦେଖି ଆଚମ୍ବିତ ହୋଇଥିଲେ । ବ୍ୟକ୍ତି ଜଣକ କେରଳ ରାଜ୍ୟରୁ ଆସିଥିବା କହୁଥିବା ବେଳେ ସେ ଭୀଷଣ ଜ୍ଵରରେ ପିଡିତ ଥିବା ଜଣାପଡିଛି । ତେବେ ଏସିସି କାରଖାନାପକ୍ଷରୁ ଉକ୍ତ ବ୍ୟକ୍ତିକୁ ଖେଦାପାଳି ଡାକ୍ତରଖାନାକୁ ପହଞ୍ଚାଇ ଦିଆଯାଇଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
