ବରଗଡ: ଜିଲ୍ଲାରେ ଦୀର୍ଘ ଦିନରୁ ଜାଲ ନୋଟ କାରବାର ଚାଲୁଥିଲା । ଏହି କାରବାର ଚଳାଉଥିବା 3 ଜଣ ଅପରାଧୀଙ୍କୁ ୨ ଲକ୍ଷ ନକଲି ନୋଟ ସହିତ ଗିରଫ କରିଛି କ୍ରାଇମବ୍ରାଞ୍ଚର ସ୍ପେଶାଲ ଟାସ୍କ ଫୋର୍ସ ଟିମ । ବରଗଡ ଜିଲ୍ଲା ପୋଲିସ ଏହି ଜାଲ ନୋଟ କାରବାରର ଟେର ମଧ୍ୟ ପାଇପାରିନଥିବା ବେଳେ କଟକରୁ କ୍ରାଇମବ୍ରାଞ୍ଚ ଟିମ ଖବର ପାଇ, ବରଗଡକୁ ଆସି ଏହି ରାକେଟକୁ ଧରିବାରେ ସଫଳ ହୋଇଛି ।
ବରଗଡ ଭଟଲି ଛକ ଠାରେ ଚଢାଉ କରି ଏହି କାରବାର ଚଳାଇଥିବା ରାକେଟକୁ ଧରିଛି କ୍ରାଇମବ୍ରାଞ୍ଚ । ତେବେ ଏହି ଘଟଣାରେ ସୁଦର୍ଶନ ମହାନ୍ତି , ବରପାଲିର ପ୍ରଫୁଲ୍ଲ ବାଗ ଏବଂ ମଙ୍ଗଲୁ ମାଲାଙ୍ଗୀଙ୍କୁ ଗିରଫ କରାଯାଇଥିବା ବେଳେ ବରପାଲି କେବାଡ଼ ଠାରେ ତିଆରି କରାଯାଉଥିବା ନକଲି ନୋଟ ସରଞ୍ଜାମକୁ ଜବତ କରାଯାଇଛି ।
ଏଥିରେ ସମୁଦାୟ ୨୮୮ ଗୋଟି ୫୦୦ ଟଙ୍କିଆ ନୋଟ , ୨୩୩ ଟି ୨୦୦ ଟଙ୍କିଆ ନୋଟ ଏବଂ ୧୦୦ ଗୋଟି ୧୦୦ ଟଙ୍କିଆ ନୋଟ ଜବତ କରାଯାଇଥିଲା । ସେଥି ମଧ୍ୟରୁ ସୁଦର୍ଶନ ଠାରୁ ୧୨ ହଜାର ନକଲି ନୋଟ , ପ୍ରଫୁଲ୍ଲ ଠାରୁ ୨୦ ହଜାର ନକଲି ନୋଟ ଏବଂ ମଙ୍ଗଲୁ ଠାରୁ ୧ ଲକ୍ଷ ୬୮ହଜାର ୬୦୦ ଟଙ୍କା ଜବତ କରାଯାଇଥିଲା । ତେବେ ଏହି ଜାଲ ନୋଟ କାରବାରର ଚେର ବହୁ ଦୂର ଲମ୍ବିଥିବା ଅନୁମାନ କରାଯାଉଛି ।
ବରଗଡରୁ ରାଜେଶ ସରପ, ଇଟିଭି ଭାରତ
