ବାଲେଶ୍ବର: ବେଆଇନ ମଦ ବେପାର ବନ୍ଦ କରିବା ନେଇ ତେଜିଲେ ମହିଳା । ବାଲେଶ୍ବର ଜିଲ୍ଲା ଖଇରା ଥାନା ଅଞ୍ଚଳରେ ବେଆଇନ ଭାବେ ମଦ ବିକୁଥିବା ଅଭିଯୋଗ ଆସିଛି । ଏହି ଅଭିଯୋଗରେ ମହିଳାମାନେ ହୋଟେଲ ଭିତରେ ପଶି ବ୍ୟାପକ ଭଙ୍ଗାରୁଜା କରିବା ସହ ମଦ ଗୁଡିକୁ ନିଆଁ ଲଗାଇ ଦେଇଥିବା ଦେଖିବାକୁ ମିଳିଛି ।
ଖଇରା ଥାନା କୋଚିଆକୋଇଲି ଠାରେ ଥିବା ତପସି ନାମକ ଏକ ହୋଟେଲ ଦୀର୍ଘଦିନ ଧରି ବେଆଇନ ଭାବେ ମଦ ବେପାର କରୁଥିବା ଅଭିଯୋଗ ହେଉଥିଲା । ସେହି ଅଞ୍ଚଳରେ ସ୍ବୟଂ ସହାୟକ ଗୋଷ୍ଠୀର ମହିଳାମାନେ ବାରମ୍ବାର ମନା କରିବା ପରେ ମଧ୍ୟ ହୋଟେଲ ମାଲିକ ମଦ ବେପାର ବନ୍ଦ କରୁନଥିଲା । ସେପଟେ ମଦ୍ୟପଙ୍କ ଯୋଗୁଁ ଅଞ୍ଚଳରେ ବହୁ ଅସାମାଜିକ କାର୍ଯ୍ୟ ବୃଦ୍ଧି ପାଉଥିବା ଅଭିଯୋଗ ହୋଇଛି ।
ଏହାକୁ ନେଇ ମା ଅମ୍ବିକା ସ୍ବୟଂ ସହାୟକ ଗୋଷ୍ଠୀ ତାଲମହୁରୀ ଓ ପଳସା ମହିଳା ଗୋଷ୍ଠୀ ସହିତ ଶତାଧିକ ମହିଳା ଏକଜୁଟ ହୋଇ ହୋଟେଲ ନିକଟରେ ପହଞ୍ଚିଥିଲେ । ହୋଟେଲ ଭିତରେ ଥିବା ଫ୍ରିଜ ସହିତ ଆସବାବପତ୍ର ଓ ମଦ ଭାଙ୍ଗି ସେଥିରେ ନିଆଁ ଲଗାଇ ଦେଇଥିଲେ । ଖଇରା ପୋଲିସ ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଦମକଳବାହୀନି ନିଆଁକୁ ଆୟତ୍ତ କରିଥିବା ଜଣାପଡ଼ିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
