ବାଲେଶ୍ଵର: ଯୌତୁକ ସାଜିଲା କାଳ । ସିମୁଳିଆ ଥାନା ଅଞ୍ଚଳରେ ବଧୁଙ୍କୁ ହତ୍ୟା ଅଭିଯୋଗ । ଏନେଇ ସିମୁଳିଆ ଥାନାରେ ଏକ ଲିଖିତ ଅଭିଯୋଗ ଦେଇଛନ୍ତି ପରିବାର ଲୋକେ ।
ଭିଡିଓ ସୌଜନ୍ୟ: ସମ୍ବାଦଦାତା, ବାଲେଶ୍ବର
ସୂଚନାନୁସାରେ, ଖଇରାଥାନା ରାମଚନ୍ଦ୍ରପୁର ଗାଁର ଭାଗବତ ଲେଙ୍କାଙ୍କ ଝିଅ ସିମୁଳିଆ ଥାନା ଆନନ୍ଦପୁର ଗାଁର ଶଙ୍କର୍ଷଣ ଲେଙ୍କାଙ୍କ ପୁଅ ସହ ଗତ ଜୁଲାଇ ମାସରେ ବୈଦିକ ରୀତିରେ ବିବାହ ହୋଇଥିଲା । ପୁଅ ଘର ଲୋକଙ୍କ ଦାବି ଅନୁସାରେ ଝିଅ ଘର ପକ୍ଷରୁ ସମସ୍ତ ଯୌତୁକ ଦିଆଯାଇଥିଲା । ବିବାହର କିଛିଦିନ ପରେ ପୁଅ ଘର ପକ୍ଷରୁ ଏକ ମୋଟର ସାଇକେଲ ଦାବି କରି ବଧୁ ଉପରେ ଶାରୀରିକ ଓ ମାନସିକ ନିର୍ଯାତନା ଦେଉଥିଲେ ।
ବାହାଘରକୁ ମାତ୍ର 5 ମାସ ହୋଇଥିବା ବେଳେ ଶାଶୁ ଘର ଲୋକ ବିଷ ପିଆଇ ଝିଅକୁ ମାରିଦେଇଥିବା ଅଭିଯୋଗ ହୋଇଛି । ଏହି ଘଟଣାକୁ ନେଇ ସିମୁଳିଆ ମେଡିକାଲ ପରିସରରେ କିଛି ସମୟ ଉଭୟ ପରିବାର ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା । ପରେ ପୋଲିସ ପହଞ୍ଚି ବୁଝାସୁଝା କରିବା ପରେ ପରିସ୍ଥିତି ଶାନ୍ତ ପଡିଥିଲା ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
