ବାଲେଶ୍ୱର: ଦୁର୍ନୀତି ଓ ପିସି କାରବାକୁ ନେଇ ବ୍ଲକ କାର୍ଯ୍ୟାଳୟ ଘେରାଉ । ବ୍ଲକ ଆଗରେ ବିକ୍ଷୋଭ ପ୍ରଦର୍ଶନ କଲେ ରେମୁଣା ବିଜେପି କର୍ମୀ । ରେମୁଣାର ପୂର୍ବତନ ବିଧାୟକ ଗୋବିନ୍ଦ ଦାସଙ୍କ ଆବାହନରେ ବିଜେପି କର୍ମୀଙ୍କ ସହ ସାଧାରଣ ଲୋକ ମଧ୍ୟ ସାମିଲ ଥିଲେ । ପଞ୍ଚାୟତ,ବ୍ଳକ, ଜିଲ୍ଲା ସ୍ତରୀୟ ଅଫିସରୁ ନେଇ ସଚିବାଳୟ ପର୍ଯ୍ୟନ୍ତ ସବୁଠାରେ ଦୁର୍ନୀତି ଅଭିଯୋଗ । ଓଡ଼ିଶାରେ ବର୍ଷକୁ ୧ ଲକ୍ଷ କୋଟି ଟଙ୍କାର ଦୁର୍ନୀତି ହେଉଥିବା ବିଜେପି ଅଭିଯୋଗ ଆଣିଛି । ଓଡିଶାରେ ସରକାରୀ ବିରୋଧୀ ଜନଆକ୍ରୋଶ ବଢିବାରେ ଲାଗିଛି । ଏଥିରେ ଜନସାଧାରଣଙ୍କ ସମର୍ଥନ ଥିବା ଯୋଗୁଁ ରାଜ୍ୟ ସରକାରଙ୍କ ପ୍ରତି ଲୋକମାନଙ୍କ ଆକ୍ରୋଶ ରହିଥିବା କୁହାଯାଇଛି ।
ଦୁଇ ମାସ ତଳେ ଭାରତୀୟ ଜନତା ପାର୍ଟି ସାରା ରାଜ୍ୟରେ ସମସ୍ତ ପଞ୍ଚାୟତରେ ଦୁର୍ନୀତି, ଅପାରଗତା, ଭ୍ରଷ୍ଟାଚାର ବିରୋଧରେ ଘେରାଉ କାର୍ଯ୍ୟକ୍ରମ କରିଥିଲା । ଏମିତିକି ରାଜ୍ୟ ସରକାର କେନ୍ଦ୍ର ସରକାରଙ୍କ ଯୋଜନାକୁ ନିଜ ନାଁରେ କରାଇ ଲୋକଙ୍କୁ ଭୁଆଁ ବୁଲାଉଥିବା ଅଭିଯୋଗ ହୋଇଛି । ପିସି କାରବାର ଦିନକୁ ଦିନ ବଢୁଥିବାକୁ ନେଇ ରାଜନୀତି ମୈଦାନରେ ବିଜେପି ନିଜର ସ୍ବର ଉତ୍ତୋଳନ କରିବ ବୋଲି କହିଛି । ସାମାନ୍ୟ ଭତ୍ତା, ରେସନ କାର୍ଡ, ପାଇଖାନା ଓ ପକ୍କାଘରଟିଏ ପାଇବା ପାଇଁ ଲାଞ୍ଚ ଦେବାକୁ ପଡୁଛି । ୨୦ ହଜାର ଟଙ୍କା ଲାଞ୍ଚ ନଦେଲେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ମିଳୁନଥିବା ବେଳେ, ଭତ୍ତା ପାଇଁ ୧ ହଜାର ଟଙ୍କା, ରାସନ କାର୍ଡ ପାଇଁ ୫ ହଜାର ଏବଂ ପାଇଖାନା ପାଇଁ ୨ ହଜାର ଟଙ୍କା ଲାଞ୍ଚ ଦେବାକୁ ପଡୁଛି ବୋଲି ବିଜେପି ଅଭିଯୋଗ ଆଣିଛି । ଓଡ଼ିଶାର ପ୍ରତି ବ୍ଲକରେ ୩୫ ପ୍ରତିଶତ ଜଳସେଚନ ବ୍ୟବସ୍ଥା, ଶୀତଳ ଭଣ୍ଡାର, ବାସହୀନଙ୍କୁ ପଟ୍ଟା ଓ ଘର ଦେବା, ଶିଳ୍ପାୟନ ମାଧ୍ୟମରେ ସ୍ଥାନୀୟ ଯୁବକଙ୍କୁ ରୋଜଗାର ଦେବାର ପ୍ରତିଶ୍ରୁତି ପାଳନ ନ କରିବାରେ ବିଫଳ ହୋଇଛନ୍ତି ରାଜ୍ୟ ସରକାର ବୋଲି କହିଛି ବିଜେପି ।
ଏହା ମଧ୍ୟ ପଢ଼ନ୍ତୁ....ଆଦିବାସୀଙ୍କ ଜମି ହସ୍ତାନ୍ତର ସମ୍ପର୍କିତ କ୍ୟାବିନେଟ ନିଷ୍ପତ୍ତିରେ ରୋକ
ରେମୁଣା ବ୍ଲକରେ ଅଧିକାଂଶ ବ୍ୟକ୍ତି ଚାଷ ଉପରେ ନିର୍ଭରଶୀଳ ଅଟନ୍ତି । ମାତ୍ର ଚାଷୀ ମାନଙ୍କ ପାଇଁ ଉନ୍ନତମାନର ବଜାର, ଶୀତଳ ଭଣ୍ଡାର, ଚାଷୀ ପ୍ରଶିକ୍ଷଣ ପାଇଁ କୌଣସି ବ୍ୟବସ୍ଥା ନାହିଁ । ରେମୁଣାରେ ପୂର୍ବରୁ ଥିବା କଳକାରଖାନା ଗୁଡ଼ିକ ବନ୍ଦ ହେବାରେ ଲାଗିଲାଣି । ଏହାକୁ ଖୋଲିବା ଏବଂ ନୂତନ ଶିଳ୍ପ ପ୍ରତିଷ୍ଠାନ କରିବା ପାଇଁ ଦାବି କରିଛି ରେମୁଣା ବିଜେପି । ସେହିପରି ରେମୁଣାରେ ପ୍ରସିଦ୍ଧ କଂସା ବାସନ କାରୀଗରଙ୍କ ଦୁର୍ଦ୍ଦଶା କଥା ନକହିବା ଭଲ । ତାଙ୍କ ପ୍ରତି ଯଥେଷ୍ଠ ଦୃଷ୍ଟି ଦେଲେ ସେମାନେ ଆର୍ଥିକ ସ୍ବଚ୍ଛଳ ହୋଇପାରିବେ । ମାତ୍ର ତାହା ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛି । ରେମୁଣାରେ ଥିବା ପର୍ଯ୍ୟଟନ ସ୍ଥଳ ବିଶ୍ବ ବିଖ୍ୟାତ, କିନ୍ତୁ ଏହା ପ୍ରତି ରାଜ୍ୟ ଏବଂ ଜିଲ୍ଲା ପ୍ରଶାସନ ଦୃଷ୍ଟି ନଦେବା ହେତୁ ପର୍ଯ୍ୟଟନର ଅବକ୍ଷୟ ଘଟୁଛି। ଏସବୁର ବିକାର ଦିଗରେ ସରକାର କାହିଁକି ଯତ୍ନବାନ ନୁହଁନ୍ତି ବୋଲି ବିଜେପି ପ୍ରଶ୍ନ କରିଛି।
