ବାଲେଶ୍ବର: ପୁଣି ଜଣେ ରୋଗୀଙ୍କ ଚିକିତ୍ସା ଅବହେଳାରୁ ମୃତ୍ୟୁ ଅଭିଯୋଗ । ଡାକ୍ତରଙ୍କ ଭୁଲ ଅସ୍ତ୍ରପଚାର ଯୋଗୁଁ ରୋଗୀଙ୍କ ମୃତ୍ୟୁ ହୋଇଥିବା ନେଇ ଅଭିଯୋଗ ଆଣିଛନ୍ତି ପରିବାରଲୋକେ । ବାଲେଶ୍ବର କୁରୁଡା ସ୍ଥିତ ଜ୍ୟୋତି ହସ୍ପିଟାଲରେ ଘଟଣାଟି ଘଟିଥିବାବେଳେ ତୁରନ୍ତ ଅଭିଯୁକ୍ତ ଡାକ୍ତରଙ୍କୁ ଗିରଫ କରିବା ଦାବିରେ ଉତ୍ତେଜନା ଦେଖାଦେଇଥିଲା ।
ସୋର ଅଞ୍ଚଳରୁ ସରସ୍ବତୀ ଜେନାଙ୍କ ବାମ ପଟ କାନ ତଳକୁ ଏକ ବଥ ହୋଇଥିବାରୁ ଅସ୍ତ୍ରପଚାର ପାଇଁ ଜ୍ୟୋତି ହସ୍ପିଟାଲରେ ଭର୍ତ୍ତି ହୋଇଥିଲେ । ଅସ୍ତ୍ରପଚାର ପରେ ସରସ୍ବତୀଙ୍କ ଚେତା ନ ଫେରିବାରୁ ପରିବାର ଲୋକେ ଡାକ୍ତରଙ୍କୁ ଖୋଜିଥିଲେ ମଧ୍ୟ ଡାକ୍ତର ଆଉ ଧରା ଛୁଆଁ ଦେଇନଥିଲେ । ଦିନ 1 ଟା ପରେ ଠାରୁ ରୋଗୀଙ୍କ କଥା ବୁଝିବାକୁ ଡାକ୍ତର ଆସିନଥିବାବେଳେ ସନ୍ଧ୍ୟା ସମୟରେ ଆସି ରୋଗୀଙ୍କୁ ମୃତ ଘୋଷଣା କରିଥିଲେ ।
ଯାହାକୁ ନେଇ ପରିବାର ଲୋକେ ଚିକିତ୍ସାରେ ତ୍ରୁଟି ଥିବା ଦର୍ଶାଇ ଡାକ୍ତରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ । ଘଟଣାଟି ଜଣାପଡିବା ପରେ ହସ୍ପିଟାଲ ପରିସରରେ ଲୋକାରଣ୍ୟ ହୋଇଉଠିଥିଲା । ଫଳରେ 3 ଥାନା ଆଇଆଇସି, ଏସଡିପିଓ, ଆଡିସିନାଲ ଏସପୁ, 2 ପ୍ଲାଟୁନ ଫୋର୍ସ ହସ୍ପିଟାଲ ପରିସରରେ ମୁତୟନ ହୋଇଥିଲେ । ତୁରନ୍ତ ଅଭିଯୁକ୍ତ ଡାକ୍ତରଙ୍କୁ ଗିରଫ ଦାବି କରି ବିଳମ୍ବିତ ରାତି ଯାଏ ପରିବାରଲୋକେ ପୋଲିସ ପ୍ରଶାସନକୁ ଘେରିବାକୁ ଦେଖିବାକୁ ମିଳିଥିଲା ।
ସେପଟେ ଏହି ହସ୍ପିଟାଲରେ ପୂର୍ବରୁ ମଧ୍ୟ ଏଭଳି ଅଭିଯୋଗ ଆସିଥିବା ନେଇ ସ୍ଥାନୀୟବାସିନ୍ଦା ମତବ୍ୟକ୍ତ କରିଛନ୍ତି । ଏହା ବ୍ୟତୀତ ଘଟଣାରେ ପୋଲିସ ପ୍ରଶାସନ ମାତ୍ରାଧିକ ହସ୍ତକ୍ଷେପ କରିବା ସାଧାରଣଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି । ତେବେ ଦୀର୍ଘ ସମୟ ଧରି ପାଟିତୁଣ୍ଡ ଦେଖାଦେଇଥିବାବେଳେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣର ପ୍ରତିଶୃତି ମିଳିବା ପରେ ଉତ୍ତେଜନା ପ୍ରଶମିତ ହୋଇଥିଲା । ସୂଚନାଯୋଗ୍ୟ, ଉକ୍ତ ହସ୍ପିଟାଲଟି ମିଶନାରୀ ଟ୍ରଷ୍ଟ ଦ୍ବାରା ପରିଚାଳିତ ହେଉଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
