ବାଲେଶ୍ବର: ଟ୍ରେନର ଏସି ଖରାପ ହେବା ଯୋଗୁ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ କାମାକ୍ଷା ଯଶୋବନ୍ତପୁର ଏକ୍ସପ୍ରେସ ଯାତ୍ରୀ । ଗୁରୁବାର ଅପରାହ୍ନ 2.30ରେ ବାଲେଶ୍ବର ଷ୍ଟେସନରେ କାମାକ୍ଷା ଯଶୋବନ୍ତପୁର ଏକ୍ସପ୍ରେସ ଲାଗିଥିଲା । ଆଉ ଏସି ଖରାପ ଯୋଗୁଁ ଯାତ୍ରୀମାନଙ୍କ ଭିଡ ଷ୍ଟେସନରେ ଦେଖିବାକୁ ମିଳିଥିଲା ।
କାମାକ୍ଷାରୁ ଯଶୋବନ୍ତପୁର ଅଭିମୁଖେ ବାହାରିଥିବା 12552 ନମ୍ବର ଟ୍ରେନରେ ବିଭିନ୍ନ ଅବ୍ୟବସ୍ଥା ଥିବା ଅଭିଯୋଗ କରିଥିଲେ ଯାତ୍ରୀମାନେ । ପଶ୍ଚିମବଙ୍ଗର ଆସାନସୋଲ ନିକଟରୁ ଏସି ଖରାପ ହୋଇଯିବା ଯୋଗୁଁ ପ୍ରବଳ ଗୁଳୁଗୁଳିରେ ଯାତ୍ରୀମାନେ ଅଣନିଶ୍ବାସୀ ହୋଇଯାଇଥିଲେ ।
ଏହି ଟ୍ରେନରେ ଅଧିକାଂଶ ରୋଗୀ ଥିବା ବେଳେ ଏନେଇ ବାଲେଶ୍ବର ଷ୍ଟେସନରେ ଉତ୍ତେଜନା ଦେଖାଦେଇଥିଲା । ବାଲେଶ୍ବର ଷ୍ଟେସନରେ ପାଖାପାଖି 3 ଘଣ୍ଟା ଟ୍ରେନ ଅଟକିବା ପରେ ରୋଗୀମାନଙ୍କୁ ଘରକୁ ପଠାଇବାର ବନ୍ଦୋବସ୍ତ କରାଯାଇଥିଲା । ଏହି ସମସ୍ୟା ବିଷୟରେ ପୂର୍ବରୁ କହିଥିଲେ ମଧ୍ୟ କର୍ତ୍ତୃପକ୍ଷ ଧ୍ୟାନ ଦେଇନଥିବା ଅଭିଯୋଗ ଆଣିଛନ୍ତି ଯାତ୍ରୀ ।
ତେବେ ଦୀର୍ଘ ସମୟର ବ୍ୟବଧାନ ପରେ ମେକାନିକ ଟିମ ପହଞ୍ଚି ଏସି ସଜାଡ଼ିବା ପରେ ଟ୍ରେନ ପାଖାପାଖି 4.46ରେ ଗନ୍ତବ୍ୟ ସ୍ଥଳକୁ ବାହାରିଥିଲା ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
