ବାଲେଶ୍ବର: ପାଖଉଛି ତ୍ରିସ୍ତରୀୟ ପଞ୍ଚାୟତ ନିର୍ବାଚନ ତାରିଖ । ନାମାଙ୍କନ ଦାଖଲ ପରେ ଏବେ ପ୍ରାର୍ଥୀମାନେ ଗାଁ ଗାଁ ପ୍ରଚାର ଆରମ୍ଭ କରିଛନ୍ତି । ଭୋଟର ମାନଙ୍କୁ ନିଜ ସପକ୍ଷରେ ମତଦାନ ପାଇଁ ପ୍ରତିଶ୍ରୁତିର ବର୍ଷା କରୁଛନ୍ତି । ତେବେ ଜିଲ୍ଲାର ଖଇରା ବ୍ଲକ ଗୋବିନ୍ଦପୁର ପଞ୍ଚାୟତରେ ନିର୍ବାଚନକୁ ନେଇ ମଧ୍ୟ ଜୋରସୋର ଆରମ୍ଭ ହୋଇଯାଇଛି ପ୍ରସାର । ପଞ୍ଚାୟତରେ ଫେବୃଆରୀ 20 ତାରିଖ ନିର୍ବାଚନ ହେବାକୁ ଥିବାବେଳେ ଚିହ୍ନ ମିଳିବା ପରେ ପ୍ରାର୍ଥୀମାନେ ହାତରେ ପୁସିଂ କାର୍ଡ ଧରି ନିଜ ସପକ୍ଷରେ ଭୋଟ ମାଗିବା ପାଇଁ ଘରଘର ବୁଲି ପ୍ରଚାର କରୁଛନ୍ତି।
ଗୋବିନ୍ଦପୁର ପଞ୍ଚାୟତରେ ଚଳିତ ବର୍ଷ ସରପଞ୍ଚ ପଦ ପାଇଁ ତିନି ଜଣ ନାମାଙ୍କନ ଦାଖଲ କରିଥିବା ବେଳେ ଗୋଟେପଟେ ଗତ 5 ବର୍ଷ ଧରି ସରପଞ୍ଚଙ୍କ ପ୍ରତିନିଧି ଭାବେ କାର୍ଯ୍ୟକରୁଥିବା ରବୀନ୍ଦ୍ର ବେହେରାଙ୍କ ପୁତ୍ରବଧୂଙ୍କୁ ସରପଞ୍ଚ ଭାବେ ମୈଦାନକୁ ଓହ୍ଲାଇଛନ୍ତି । ଅନ୍ୟପଟେ ପୂର୍ବରୁ ଗୋବିନ୍ଦପୁର ପଞ୍ଚାୟତର ଜଣେ ଟାଣୁଆ ନେତା କୁହାଯାଉଥିବା ଅଭୟ ମହାନ୍ତିଙ୍କ ଗତ କିଛି ମାସ ହେବ ଅକାଳ ବିୟୋଗ ହୋଇଥିବା ବେଳେ ତାଙ୍କ ପତ୍ନୀ ସରପଞ୍ଚ ପଦରେ ନାମାଙ୍କନ ଦାଖଲ କରିଛନ୍ତି ।
ଗୋଟେପଟେ ବିକାଶର ନାରା ଦିଆଯାଉଥିବା ବେଳେ ଅନ୍ୟପଟେ ଟାଣୁଆ ନେତାଙ୍କ ସ୍ତ୍ରୀ ମୈଦାନରେ ଥିବାରୁ ସରପଞ୍ଚ ପଦ ପାଇଁ ଲଢେଇ ଜୋରଦାର ହେବ ବୋଲି ସ୍ପଷ୍ଟ ବାରି ହୋଇ ପଡୁଛି । ବିକାଶର ନାରା ଦେଇ ଆରମ୍ଭ ହୋଇଛି ପ୍ରଚାର । ସେହିପରି ସମିତିସଭ୍ୟ ପଦ ପାଇଁ ଦୁଇଟି ଦଳର ଦୁଇଜଣ ପ୍ରାର୍ଥିନୀ ନାମାଙ୍କନ ଦାଖଲ କରିଥିବା ବେଳେ ଗୋଟିଏ ଦଳର ପ୍ରାର୍ଥିନୀଙ୍କ ପଲା ଭାରି ଥିବା କଥା କୁହାଯାଉଛି । ଚଳିତ ଥର ଯୋଗ୍ୟ ପ୍ରାର୍ଥୀଙ୍କୁ ଭୋଟ ଦେବା ନେଇ ମତ ପ୍ରକାଶ ପାଇଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
