ବାଲେଶ୍ବର: ମୁମ୍ବାଇର ଏକ କୋଭିଡ ହସ୍ପିଟାଲରେ ଚିକିତ୍ସିତ ହେଉଥିବା ବାଲେଶ୍ଵର ଜିଲ୍ଲା ସୋର ଅଞ୍ଚଳର ଜଣେ ଶ୍ରମିକଙ୍କ ପତ୍ତା ମିଳୁନାହିଁ । ତାଙ୍କୁ ଓଡିଶା ଫେରାଇ ଆଣିବା ପାଇଁ ପରିବାର ଲୋକେ ମୁଖ୍ୟମନ୍ତ୍ରୀଙ୍କୁ ଦାବି ଜଣାଇଛନ୍ତି ।
ମିଳିଥିବା ସୂଚନା ଅନୁସାରେ, ସୋର ଥାନା ବାଳଙ୍ଗ ଗ୍ରାମର ଜଣେ ଯୁବକ 4 ବର୍ଷ ତଳେ ମୁମ୍ବାଇ କାମ ଆଶାରେ ଯାଇଥିଲେ । ସେଠାରେ ସେ ଏକ ହୋଟେଲରେ ସୁପରଭାଇଜର ଭାବେ କାମ କରୁଥିଲେ । ହଠାତ ତାଙ୍କୁ ଜ୍ୱର ହେବାରୁ ତାଙ୍କର ସ୍ୱାବ ସଂଗ୍ରହ କରାଯାଇଥିଲା । ପରେ ତାଙ୍କର ପଜିଟିଭ ଆସିବାରୁ ତାଙ୍କୁ କେଇଏମ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ ଚିକିତ୍ସିତ ଅବସ୍ଥାରେ ସେ ନିଜ ଘର ଲୋକଙ୍କ ସହ କଥା ହୋଇଛନ୍ତି ।
ମାତ୍ର ଦୁଇଦିନ ଧରି ତାଙ୍କୁ ଯୋଗାଯୋଗ କରିବା ସମ୍ଭବ ହୋଇନାହିଁ । ତାଙ୍କ ମୋବାଇଲ ସୁଇଚ ଅଫ ଥିବା ବେଳେ ମେଡିକାଲ କର୍ତ୍ତୃପକ୍ଷଙ୍କ ସହ ଯୋଗାଯୋଗ କରିବାରୁ ସେ କହିଥିଲେ ଘରର ମୁଖ୍ୟ ଲୋକଙ୍କୁ ମୁମ୍ବାଇ ପଠାଅ । ଏମିତି ପରିସ୍ଥିତିରେ ଯୁବକଙ୍କ ସ୍ତ୍ରୀ ସ୍ୱାମୀଙ୍କୁ ଓଡିଶା ଆଣିବା ପାଇଁ ସୋର ତହସିଲଦାରଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
