ବାଲେଶ୍ବର: ପୁଣି ପଦାରେ ପଡିଲା ଶିକ୍ଷା ବିଭାଗର ନଗ୍ନ ଚିତ୍ର । ସ୍କୁଲରେ ଆଗାମୀକାଲିର ଭବିଷ୍ୟତ ଝାଡୁ ଧରି ପାଇଖାନା ସଫା କଲେ । ବାଲେଶ୍ବର ଜିଲ୍ଲାର ଏହି ଘଟଣା ଏବେ ଚାରିଆଡେ ଚର୍ଚ୍ଚା ସୃଷ୍ଟି କରିଛି । ଭୋଗରାଇ ବ୍ଲକ ଗୀତଖଳା ପ୍ରାଥମିକ ଓ ଶ୍ରୀହରି ଉଚ୍ଚ ପ୍ରାଥମିକ ବିଦ୍ୟାଳୟର ଏହି ଦୃଶ୍ୟ ଏବେ ସୋସିଆଲ ମିଡିଆରେ ଘୂରିବାରେ ଲାଗିଛି ।
ରାଜ୍ୟର ସମସ୍ତ ବିଦ୍ୟାଳୟମାନଙ୍କୁ ଦଣ୍ଡମୁକ୍ତ କରିବା ସହ ପ୍ରତ୍ୟେକ ପିଲାଙ୍କୁ ଶିକ୍ଷାପ୍ରଦାନ ଦିଗରେ ସରକାରଙ୍କ ପଦକ୍ଷେପକୁ ଆଖି ଠାର । ଦିନ ଦ୍ବିପ୍ରହରେ ଦେଖିବାକୁ ମିଳିଛି ଛାତ୍ରୀମାନଙ୍କ ପାଇଖାନା ସଫା କରିବା ଦୃଶ୍ୟ । ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି କି ଛାତ୍ରୀମାନଙ୍କୁ ଘଟଣା ସମ୍ପର୍କରେ ପଚାରିବାରୁ ସେମାନେ ଭୟରେ ଦୌଡି ପଳାଉଛନ୍ତି ।
ଏନେଇ ଭୋଗରାଇ ବ୍ଲକ ଶିକ୍ଷାଧିକାରୀଙ୍କୁ ଯୋଗାଯୋଗ କରିବାରୁ ସେ ଘଟଣାର ସତ୍ୟାସତ୍ୟ ତଦନ୍ତ କରିବା ସହ ସମ୍ପୃକ୍ତ ସ୍କୁଲର ଶିକ୍ଷକଙ୍କ ବିରୋଧରେ ଦୃଢ କାର୍ଯ୍ୟନୁଷ୍ଠାନ ନେବା ପାଇଁ ସ୍ପଷ୍ଟ କରିଛନ୍ତି । ହେଲେ ଏନେଇ ଗଣମାଧ୍ୟମ ଆଗରେ କୌଣସି ପ୍ରତିକ୍ରିୟା ଦେବାକୁ ମନା କରିଥିଲେ ଶିକ୍ଷାଧିକାରୀ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
