ବାଲେଶ୍ବର: ଥାନାରେ ଅଟକ ଅଛନ୍ତି କୁକୁଡ଼ା । 4 ଦିନ ହେଲାଣି 4ଟି କୁକୁଡ଼ା ଅଟକ ରହିଥିବା ବେଳେ ସେମାନଙ୍କ ତଦାରଖ କରୁଛି ନିଜେ ପୋଲିସ । ମାଲିକଙ୍କ ଭୁଲ ପାଇଁ ଆଜି ସଜା କାଟୁଛି କୁକୁଡ଼ା । ଏମିତି ଏକ ଘଟଣା ଦେଖିବାକୁ ମିଳିଛି ବାଲେଶ୍ଵର ଜିଲ୍ଲା ସିମୁଳିଆ ଥାନାରେ।
ସୂଚନା ଅନୁସାରେ, 4ଦିନ ହେଲାଣି 4 କୁକୁଡ଼ା ଥାନାରେ ଅଟକ l କୁକୁଡ଼ା ଲଢେଇ ପ୍ରମାଣିତ ହେଲେ 5 ହଜାର ଟଙ୍କା ଫାଇନ ହେବ l ହେଲେ ପୋଲିସ ଏହି ମାମଲାରେ 5 ହଜାର ଟଙ୍କା ଖର୍ଚ୍ଚ କଲାଣି। ପୋଲିସ ପ୍ରମାଣ ପାଇଁ ଗତ 4ଦିନ ଧରି 4କୁକୁଡ଼ାଙ୍କୁ ଥାନାରେ ଅଟକ ରଖି ଖାଇବା ପିଇବା ଦେଇ ମେଡିକାଲ ଟ୍ରିଟମେଣ୍ଟ କରୁଛି l ଗତ ଡିସେମ୍ବର 25 ବଡ ଦିନରେ ସିମୁଳିଆ ଥାନା ମୁରୁଣା ବଜାରରେ ଚାଲିଥିଲା କୁକୁଡ଼ା ଲଢେଇ, ଉଡୁଥିଲା ଟଙ୍କା । ହେଲେ ଅଚାନକ ଜୁଆ ଆଡା ଓ କୁକୁଡ଼ା ଲଢେଇ ଉପରେ ପୋଲିସ ଚଢ଼ାଉ କରି 4 କୁକୁଡାଙ୍କୁ ଉଦ୍ଧାର କରି ଥାନାରେ ଅଟକ ରଖି ପଶୁ ଡାକ୍ତରଖାନାରେ ତାଙ୍କ ସ୍ବାସ୍ଥ୍ୟ ପରୀକ୍ଷା କରିଛି l
ଅନ୍ୟପଟେ ପୋଲିସ ପଶୁ ଡାକ୍ତରଖାନାରେ କୁକୁଡ଼ାଙ୍କର ଗୋଡ ପରୀକ୍ଷା କରୁଛି ସେମାନଙ୍କ ଗୋଡରେ ଛୁରୀ ବନ୍ଧା ଯାଇଥିଲା କି l ଯାହାଫଳରେ ଜଣା ପଡିବ କୁକୁଡ଼ା ଗୁଡିକ ଲଢେଇ କରୁଥିଲେ କି ନାହିଁ l ସବୁଠାରୁ ମଜାଦାର ଘଟଣା ପୋଲିସ ଏସବୁ ମାମଲାରେ 5 ହଜାର ଟଙ୍କା ଖର୍ଚ୍ଚ କରି ସାରିଲାଣି । ଏହି ଘଟଣାରେ 4 ଯୁବକଙ୍କୁ ଅଟକ ରଖିବା ସହ ଚାରି କୁକୁଡ଼ାଙ୍କୁ ଉଦ୍ଧାର କରି 341/22ରେ ମାମଲା ରୁଜୁ କରି ତଦନ୍ତ କରୁଛି ପୋଲିସ। ଏଥିସହ ପୋଲିସ ଚାରି ଜଣ ଯୁବକଙ୍କୁ ନୋଟିସ ଦେଇ ଛାଡି ଦେଇଥିବା ବେଳେ କୁକୁଡାଙ୍କୁ ଅଟକ ରଖି ତଦନ୍ତ ଜାରି ରଖିଛି ।
ଇଟିଭି ଭାରତ, ବାଲେଶ୍ବର
