ବାଲେଶ୍ବର: ଜିଲ୍ଲାର ଭୋଗରାଇ ଅଞ୍ଚଳରୁ ଗୋଟିଏ ରାତିରେ 5ଟି ଘରୁ ଚୋରି ଅଭିଯୋଗ । ଭୋଗରାଇ ଥାନା ଅନ୍ତର୍ଗତ ବର୍ତ୍ତନା ଗାଁରେ ମଙ୍ଗଳବାର ବିଳମ୍ବିତ ରାତିରେ ଏହି ଘଟଣା ଘଟିଥିବା ବେଳେ ଭୋଗରାଇ ପୋଲିସ ଜଣଙ୍କୁ ଅଟକ ରଖି ପଚରା ଉଚୁରା ଜାରି ରଖିଛି ।
ସୂଚନାମୂତାବକ, ଗାଁର ସୁଶାନ୍ତ କୁମାର ଜେନାଙ୍କ ଆଲମୀରା ଭିତର ଲକରରେ ଥିବା ପ୍ରାୟ 4 ଭରି ଓଜନର ସୁନା ଅଳଙ୍କାର ସହିତ ନଗଦ 70 ହଜାର ଟଙ୍କା ଚୋରି ହୋଇଯାଇଥିବା ଅଭିଯୋଗ ହୋଇଛି । ଲୁଟେରା ମାନେ ଟଙ୍କା ଓ ସୁନା ଲୁଟିନେଇ ଖାଲି ବାକ୍ସ ଫିଙ୍ଗିଦେଇଥିବା ଦେଖିବାକୁ ମିଳିଛି । ସେହିପରି ଉକ୍ତ ଗାଁର ପ୍ରଫୁଲ୍ଲ ଜେନା, ସୁଦର୍ଶନ ଜେନା, ଉଜ୍ବଳ ହୁମ ଓ ଭାଗବତ ଚନ୍ଦ୍ର ଜେନାଙ୍କ ଘରେ ତାଲା ଭାଙ୍ଗି ଚୋର ପଶିଥିଲେ । ମାତ୍ର ଘରଲୋକ ଉଠି ପଡିବାରୁ ଚୋରମାନେ ଦୌଡ଼ି ପଳାଇଥିଲେ । ଏହି ସମୟରେ ଚୋରଙ୍କ ଆକ୍ରମଣରେ ଭାଗବତ ଚନ୍ଦ୍ର ଜେନାଙ୍କ ବଡ ବୋହୂ ଆହତ ହୋଇଥିବା ଜଣାପଡିଛି ।
ତେବେ ଚଳିତ କିଛି ମାସ ମଧ୍ୟରେ ଉକ୍ତ ଗାଁରେ ଦୁଇଥର ଏଭଳି ଘଟଣା ଘଟିଥିବା ଅଭିଯୋଗ ହେଉଥିବା ବେଳେ ପୋଲିସର କାର୍ଯ୍ୟାନୁଷ୍ଠାନକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
