ବାଲେଶ୍ବର: ବିଦ୍ୟୁତ ଆଘାତରେ ଯୁବ ସାମ୍ବାଦିକଙ୍କ ମୃତ୍ୟୁ । ନିଜ ବାସଭବନରେ ବିଦ୍ୟୁତ ଆଘାତ ଲାଗିବାରୁ ସାମ୍ବାଦିକଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ମୃତ ସାମ୍ବାଦିକ ଜଣକ ହେଲେ ରୁପସା ଥାନା ଅନ୍ତର୍ଗତ ଆଗିରିଆ ଗ୍ରାମର ସୁଶାନ୍ତ କୁମାର ବେହେରା (ରାଜା) ।
ସୂଚନା ଅନୁସାରେ ଶନିବାର ଦିନ ସନ୍ଧ୍ୟା ୭ ଘଟିକା ସମୟରେ ନିଜ ଘରେ ବିଦ୍ୟୁତ ବଲ୍ବ ଜଳାଇବା ପାଇଁ ବିଦ୍ୟୁତ ତାର ସଂଯୋଗ କରୁଥିବା ବେଳେ ସୁଶାନ୍ତଙ୍କୁ ବିଦ୍ୟୁତ ଆଘାତ ଲାଗିଥିଲା । ଏଥିରେ ସେ ଗୁରୁତର ହୋଇଥିଲେ । ଗୁରୁତର ଅବସ୍ଥାରେ ସୁଶାନ୍ତଙ୍କୁ ଘର ଲୋକେ ପ୍ରଥମେ ରୁପସା ମେଡିକାଲରେ ଭର୍ତ୍ତି କରାଇଥିଲେ । ସେଠାରେ ସୁଶାନ୍ତଙ୍କ ଅବସ୍ଥା ଅଧିକ ଗୁରୁତର ହେବାରୁ ଡାକ୍ତର ତାଙ୍କୁ ବାଲେଶ୍ବର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ । ତେବେ ବାଲେଶ୍ଵର ମେଡିକାଲରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ବାଲେଶ୍ଵର ଜିଲ୍ଲାର ସମସ୍ତ ସାମ୍ବାଦିକଙ୍କ ପକ୍ଷରୁ ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକ ସନ୍ତପ୍ତ ପରିବାରଙ୍କୁ ସମବେଦନା ଜଣାଯାଇଛି ।
ଇଟିଭି ଭାରତ, ବାଲେଶ୍ବର
