ବାଲେଶ୍ବର: ଚେକିଂ ବେଳେ ତହସିଲଦାରଙ୍କ ଗାଡିକୁ ଧକ୍କା ଦେଲା ପଥର ବୋଝେଇ ଟ୍ରକ । ଗାଡିଟି ଧକ୍କା ଦେଇ ରାସ୍ତା କଡ଼କୁ ଓଲଟି ପଡିଥିଲା । ତେବେ ବେଆଇନ ପଥର ବୋଝେଇ ଟ୍ରକ ଯାଞ୍ଚ ବେଳେ ଏଭଳି ଅଘଟଣ ଘଟିଥିବା ସୂଚନା ମିଳିଛି ।
ସୂଚନା ଅନୁସାରେ, ସୋର ବାଗୁଡି ଅଞ୍ଚଳରୁ ଅନେକ ସମୟରେ ବେଆଇନ ଭାବେ ପଥର ଚାଲାଣ ହେଉଥିବା ଅଭିଯୋଗ ହୋଇ ଆସୁଥିଲା । ଶୁକ୍ରବାର ସୋର ତହସିଲଦାର ଦେବୀପ୍ରସାଦ ଦାସ ଓ ସୋର ଥାନା ଏଏସଆଇ ଅମୂଲ୍ୟ ଗିରି ପଥର ବୋଝେଇ ଟ୍ରକ ଯାଞ୍ଚ କରୁଥିଲେ । ଏହି ସମୟରେ ତହସିଲଦାରଙ୍କ ବୋଲେରୋ ଗାଡି ରାସ୍ତା ପାଖରେ ଛିଡା ହୋଇଥିଲା । ସେଠାରେ ତହସିଲଦାର, ଏଏସଆଇ ଓ ତହସିଲଦାରଙ୍କ ଗାଡି ଡ୍ରାଇଭର ଯାଞ୍ଚ କାର୍ଯ୍ୟ କରୁଥିଲେ ।
ଏହି ସମୟରେ ବାଗୁଡି ଖଞ୍ଜା ମହଲରୁ ପଥର ବୋଝେଇ କରି ଭଦ୍ରକ ଯାଉଥିବା ଏକ ଦ୍ରୁତଗାମୀ ପଥର ବୋଝେଇ ଟ୍ରକ ଯାଞ୍ଚ ହେଉଥିବା ସ୍ଥାନ ଆଡକୁ ମାଡି ଆସିଥିଲା । ଟ୍ରକଟି ସିଧା ଆସି ତହସିଲଦାରଙ୍କ ଗାଡିକୁ ଧକ୍କା ଦେଇ ରାସ୍ତା ତଳକୁ ଓଲଟି ପଡିଥିଲା। ଏହି ଦୁର୍ଘଟଣାରେ ସମସ୍ତେ ଅଳ୍ପକେ ବଞ୍ଚି ଯାଇଛନ୍ତି । ଟ୍ରକକୁଜବତ କରାଯିବା ସହ ଡ୍ରାଇଭରକୁ ଅଟକ ରଖାଯାଇଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
