ବାଲେଶ୍ବର: ଭାଲୁ କବଳରୁ ବୃଦ୍ଧାଙ୍କୁ ବଞ୍ଚାଇଲେ 2 ବୁଲା କୁକୁର । ଏଭଳି ଏକ ଆଶ୍ଚର୍ଯ୍ୟକର ଘଟଣା ବାଲେଶ୍ବରର ନୀଳଗିରି ଅଞ୍ଚଳରେ ଦେଖିବାକୁ ମିଳିଛି ।
ଭିଡିଓ ସୌଜନ୍ୟ-ସମ୍ବାଦଦାତା, ବାଲେଶ୍ବର
ମଙ୍ଗଳବାର ସକାଳୁ ନୀଳଗିରି ଥାନା ଚଣ୍ଡୀପୁର ଗ୍ରାମର ଜିକି ସିଂ ଗାଁ ପୋଖରୀକୁ ବାସନ ଧୋଇବାକୁ ଯାଇଥିଲେ । ଏହି ସମୟରେ ପଛପଟୁ ଗୋଟିଏ ଭାଲୁ ତାଙ୍କ ଉପରକୁ ଆକ୍ରମଣ କରିଥିଲା । ତେବେ ଆକ୍ରମଣରେ ବୃଦ୍ଧା ଚିତ୍କାର କରିବାରୁ ନିକଟରେ ଥିବା ଦୁଇଟି କୁକୁର ଭୋକି ଭୋକି ଭାଲୁ ଆଡକୁ ମାଡି ଆସିଥିଲେ । ପରେ ଭାଲୁ ଓ କୁକୁରଙ୍କ ମଧ୍ୟରେ ମୁହାଁମୁହିଁ ଅବସ୍ଥା ସୃଷ୍ଟି ହୋଇଥିଲା । କୁକୁର 2ଟି ଆକ୍ରମଣ କରିବାରୁ ଭାଲୁଟି ବୃଦ୍ଧାଙ୍କୁ ଛାଡି ଜଙ୍ଗଲକୁ ପଳେଇଯାଇଥିଲା ।
ଆକ୍ରମଣରେ ବୃଦ୍ଧା ଜିକିଙ୍କ ମୁଣ୍ଡ ଓ ପିଠିରେ ଗଭୀର କ୍ଷତ ହୋଇଥିବାରୁ ତାଙ୍କୁ ସ୍ଥାନୀୟ ଲୋକେ ଗୁରୁତର ଭାବେ ନୀଳଗିରି ମେଡିକାଲରେ ଭର୍ତ୍ତି କରାଯାଇଛନ୍ତି । ତେବେ ଆଜିର ଏହି ଦୃଶ୍ୟ, କୁକୁରକୁ ବିଶ୍ବସ୍ତ ପଶୁ ଭାବେ ପ୍ରମାଣିତ କରିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
