ବାଲେଶ୍ବର: ଭୋଗରାଇ ବ୍ଲକ ଅନ୍ତର୍ଗତ ଗୋଛିଦା ତେଘରୀ ପଞ୍ଚାୟତ ଅନ୍ତର୍ଗତ ରାଣିବସାଣ ଗାଁରେ ବାହାଘର ଭୋଜି ଖାଇ 200ରୁ ଅଧିକ ଲୋକ ଝାଡାବାନ୍ତିରେ ଆକ୍ରାନ୍ତ । ଅସୁସ୍ଥଙ୍କ ମଧ୍ୟରେ 40ରୁ ଊର୍ଦ୍ଧ୍ବ ଲୋକଙ୍କ ଅବସ୍ଥା ଗୁରୁତର ରହିଥିବା ସୂଚନା ମିଳିଛି । ଅସୁସ୍ଥ ଲୋକମାନଙ୍କୁ ଜଳେଶ୍ବରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ବାଡସରିଷା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
ମିଳିଥିବା ସୂଚନା ମୁତାବକ ରାଣିବସାଣ ଗୌରହରି ଜେନାଙ୍କ ପୁଅ ବାହାଘର ଥିଲା । ଏହି ଭୋଜିରେ ପାଖାପାଖି 500ରୁ ଊର୍ଦ୍ଧ୍ବ ଲୋକ ଯୋଗ ଦେଇଥିଲେ । ତେବେ ବୁଧବାର ଅପରାହ୍ଣ ପରଠାରୁ ଭୋଜି ଖାଇଥିବା ଲୋକମାନଙ୍କର ମୁଣ୍ଡ ବୁଲାଇବା, ବାନ୍ତିହେବା, ପେଟ ବଥାଇବା ଥିଲା ।
ଆକ୍ରାନ୍ତଙ୍କୁ ଆଜି ସକାଳୁ ଜଳେଶ୍ବରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ବାଡସରିଷା ପ୍ରାଥମିକ ଚିକିତ୍ସାଳୟରେ ଭର୍ତ୍ତି କରାଯାଇ ଚିକିତ୍ସା ଜାରି ରହିଛି । ଆକ୍ରାନ୍ତଙ୍କ ସଂଖ୍ୟା ବଢିବା ଆଶଙ୍କା କରାଯାଉଥିବା ବେଳେ ଏକ ଡାକ୍ତରୀ ଦଳ ଘଟଣା ସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରୁଛନ୍ତି ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
