ବାଲେଶ୍ବର: 2010 ମସିହାରେ ବାଲେଶ୍ବରରେ ଏକ ଉନ୍ନତମାନର ବସଷ୍ଟାଣ୍ଡ ନିର୍ମାଣ ପାଇଁ ଶିଳାନ୍ୟାସ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କିନ୍ତୁ 13 ବର୍ଷ ବତିଯାଇଥିଲେ ମଧ୍ୟ ଖାଲି ପାଚେରି ଉଠିଛି । ହେଲେ ଏହି ଜମିକୁ ଏବେ ଜମିରେ ନୂଆ ଘର ତିଆରି କରି ଓଆରୀ ବିକ୍ରି ପାଇଁ ବାଲେଶ୍ଵର ଜିଲ୍ଲା ପ୍ରଶାସନ ଯୋଜନା କରିଛି । ଯାହାକୁ ନେଇ ବାଲେଶ୍ଵରର ସିଭିଲ ସୋସାଇଟି ପକ୍ଷରୁ ତୀବ୍ର ବିରୋଧ କରାଯିବା ସହ ଏହାକୁ ନେଇ ଏକ ସାମ୍ବାଦିକ ସମ୍ମିଳନୀ ଜରିଆରେ ଆଇନର ଆଶ୍ରୟ ନେବା କଥା କୁହାଯାଇଛି ।
ସୂଚନା ଅନୁସାରେ, ଗତ ୨୦୧୦ ମସିହାରେ ଜାନୁଗଞ୍ଜ ଗୋଲେଇ ଛକ ନିକଟ ୧୬ ନଂ ଜାତୀୟ ରାଜପଥ ପାର୍ଶ୍ବରେ ଗଣେଶ୍ୱରପୁର ମୌଜାରେ ମୁଖ୍ୟମନ୍ତ୍ରୀ ଆଠ ଏକର ପରିମିତ ଜମିରେ ଏକ ନୂତନ ବସଷ୍ଟାଣ୍ଡ ନିର୍ମାଣ ପାଇଁ ଶିଳାନ୍ୟାସ କରିଥିଲେ । ଏହି ଜମିର ଚତୁଃପାର୍ଶ୍ବରେ ବ୍ରିଟ ଦ୍ୱାରା ପାଚେରୀ ନିର୍ମାଣ ମଧ୍ୟ କରା ଯାଇଥିଲା । ମାତ୍ର ତାହା ଆଜିଯାଏଁ ସେତିକିରେ ହିଁ ସୀମିତ ରହିଛି । ବାଲେଶ୍ଵର ସହରର ଜନସଂଖ୍ୟା ଓ ଯାତାୟତର ସୁବିଧା ପାଇଁ ଏହି ପ୍ରସ୍ତାବିତ ଶିଳାନ୍ୟାସକୁ ବାଲେଶ୍ବରବାସୀ ସ୍ବାଗତ କରିଥିଲେ । ମାତ୍ର ଚଳିତ ୨୦୨୩ ମସିହାରେ ଏହି ପ୍ରସ୍ତାବିତ ବସଷ୍ଟାଣ୍ଡ ଜମିରୁ ସାଢ଼େ ଛଅ ଏକର ଜମି ଉପରେ ବହୁତଳ ଫ୍ଲାଟ୍ ଓ ବ୍ୟବସାୟ ଗୃହ ନିର୍ମାଣ କରି ବ୍ୟକ୍ତିବିଶେଷଙ୍କୁ ବିକ୍ରି କରିବାକୁ ସରକାରୀ ପ୍ରକ୍ରିୟା ଆରମ୍ଭ ହୋଇଛି ।
ସିଭିଲ ସୋସାଇଟି ସଭାପତି କହିଛନ୍ତି,"ରାଜ୍ୟ ଓ ଜିଲ୍ଲା ପ୍ରଶାସନର ଏହି ଅପରିଣାମଦର୍ଶୀ ନିଷ୍ପତ୍ତିକୁ ସିଭିଲ ସୋସାଇଟି ଓ ବିଭିନ୍ନ ସାମାଜିକ ସଂଗଠନ ବିରୋଧ କରୁଛି । ତେବେ ଜିଲ୍ଲାପାଲଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ଦିଆ ଯାଇଥିଲା । ଅନ୍ୟପଟେ ସହଦେବଖୁଣ୍ଟାରେ ଥିବା ପୁରୁଣା ବସ୍ଷ୍ଟାଣ୍ଡକୁ ନବୀକରଣ ଆଳରେ ଆଠ କୋଟିରୁ ଉର୍ଦ୍ଧ୍ବ ସରକାରୀ ଟଙ୍କା ବ୍ୟୟରେ ବସଷ୍ଟାଣ୍ଡ ଭିତରେ ବ୍ୟବସାୟ କେନ୍ଦ୍ର ଓ ହୋଟେଲ ପ୍ରଭୃତି ପାଇଁ ନିର୍ମାଣ କାର୍ଯ୍ୟ ଚାଲିଛି ।"
ତେବେ ବସଷ୍ଟାଣ୍ଡରେ 31ଟି ବସ ରହିବାର ସ୍ଥାନ ଦିଆଯାଇଛି । ବାଲେଶ୍ବରରେ ୩୦୦ରୁ ଊର୍ଦ୍ଧ୍ବ ଘରୋଇ ବସ୍ ଚଳାଚଳ କରୁଥିବାବେଳେ ବସଷ୍ଟାଣ୍ଡ ସଙ୍କୁଚିତ କାହିଁକି କରାଯାଉଛି ବୋଲି ପ୍ରଶ୍ନ କରିଛି ସିଭିଲ ସୋସାଇଟି । ଓଭରବ୍ରିଜ୍ ଉପରକୁ ଉଠୁଥିବା ବସ୍ ଓ ଓହ୍ଲାଉଥିବା ବସ୍ ଚଳାଚଳ ସାଧାରଣ ଲୋକଙ୍କ ଯାତାୟତ ଓ ଜରୁରୀ ସେବାରେ ଥିବା ଆମ୍ବୁଲାନ୍ସ, ଦମକଳ ଓ ପୋଲିସ୍ ଗାଡ଼ି ଚଳାଚଳରେ ବ୍ୟାଘାତ ସୃଷ୍ଟି ହେଉଛି ଏବଂ ଦୁର୍ଘଟଣାମାନ ଘଟୁଥିବା ନଜିର ରହିଛି ।
ଏଥିପାଇଁ ସହର ବାହାରେ ଓ ଜାତୀୟ ରାଜପଥ ପାର୍ଶ୍ବରେ ବସଷ୍ଟାଣ୍ଡ ପାଇଁ ଉଦ୍ଦିଷ୍ଟ ସରକାରୀ ଜମିକୁ ଘରୋଇ ମାଲିକାନାକୁ ହସ୍ତାନ୍ତର ପାଇଁ ଉଦ୍ୟମରୁ ଜିଲ୍ଲା ପ୍ରଶାସନ ନିବୃତ୍ତ ହେବାକୁ କହିଛି ସିଭିଲ ସୋସାଇଟି । ଯଦି ଟେଣ୍ଡର ପ୍ରକ୍ରିୟା ପ୍ରତ୍ୟାହାର ନହୁଏ, ତେବେ ବାଲେଶ୍ବରବାସୀ ବ୍ୟାପକ ଆନ୍ଦୋଳନକୁ ଓହ୍ଲାଇବେ ଓ ସରକାରୀ ଜମିରେ କୌଣସି ନିର୍ମାଣ କାର୍ଯ୍ୟ କରାଇ ଦେବେ ନାହିଁ ବୋଲି ଚେତାବନୀ ଦିଆଯାଇଛି ।
ଇଟିଭି ଭାରତ, ବାଲେଶ୍ବର
