ବାଲେଶ୍ବର: ରାସ୍ତା ସମସ୍ୟା ନେଇ ରାସ୍ତାରେ ଧାରଣା ଦେଲେ ଆଇଟିଆଇ ନିକଟସ୍ଥ ବସ୍ତି ବସିନ୍ଦା । ଆଇଟିଆଇର ପାଚେରୀ ନିର୍ମାଣକୁ ନେଇ ପୂର୍ବରୁ ବହୁବାର ବିରୋଧ କରିଆସିଛନ୍ତି । କିନ୍ତୁ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ । ଫଳରେ ଆଜି(ଶନିବାର) ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଜନ ଜୀବନ ସୁରକ୍ଷା ସମିତି ପକ୍ଷରୁ ଧାରଣା ଦେଇଛନ୍ତି ବସ୍ତିବାସିନ୍ଦା ।
ବସ୍ତିକୁ ଥିବା 35 ପରିବାର ସହର ବାହାରକୁ ଯିବା ଆସିବା ପାଇଁ ଏକ ମାତ୍ର ରାସ୍ତା ଥିବାବେଳେ ଆଇଟିଆଇ ପକ୍ଷରୁ ତାହା ବନ୍ଦ କରି ଦିଆଯାଇଛି । ଯେଉଁଥି ପାଇଁ ବସ୍ତିବାସିନ୍ଦା ନାନା ଅସୁବିଧାର ସମ୍ମୁଖୀନ ହେଉଥିବାର ଅଭିଯୋଗ ହୋଇଛି ।
ସେପଟେ, ରାସ୍ତାକୁ ଯିବା ଆସିବା ପାଇଁ ଆଇଟିଆଇ ପକ୍ଷରୁ ବସ୍ତିକୁ ଖୋଲାଯାଇଥିବା ରାସ୍ତାରେ ଯିବା ଆସିବା ସୁବିଧାଜନକ ନୁହେଁ ବୋଲି କହିଛନ୍ତି ବସ୍ତିବାସିନ୍ଦା । ତେଣୁ ତୁରନ୍ତ ଯିବା ଆସିବା ରାସ୍ତାର ସୁବନ୍ଦୋବସ୍ତ କରିବା ପାଇଁ ବସ୍ତିବାସିନ୍ଦା ଦାବି କରି ଗଣ ଧାରଣା ଦେଇଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
