ବାଲେଶ୍ବର: ରାଜ୍ୟ ପାଇଁ ଗର୍ବ ଓ ଗୌର୍ବବ ଆଣୁଛନ୍ତି ଖେଳାଳି । ଜାତୀୟସ୍ତରରେ ଦୌଡ଼ ପ୍ରତିଯୋଗିତାରେ ଭାଗ ନେଇ ରାଜ୍ୟ ପାଇଁ ଗୌରବ ଆଣିଛନ୍ତି ବାଲେଶ୍ଵର ଜିଲ୍ଲା ସିମୁଳିଆ ଅଞ୍ଚଳର ଯୁବ ପ୍ରତିଭା ଅନିରୁଦ୍ଧ ଶଙ୍ଖୁଆ । ଜାତୀୟ ଚମ୍ପିଆନସିପରେ ଅନୁଷ୍ଠିତ ଦୌଡ଼ ପ୍ରତିଯୋଗିତାରେ ରୌପ୍ୟ ପଦକ ହାସଲ କରିଛନ୍ତି । ସବୁ ପ୍ରତିକୂଳ ପରିବେଶକୁ ଆଡ଼େଇ ଅନିରୁଦ୍ଧ ଏବେ ସଫଳତା ଆଡ଼କୁ ମାଡ଼ି ଚାଲିଛନ୍ତି । ଅନିରୁଦ୍ଧ ଭାରତୀୟ ଖେଳ ସଂଘରେ ସାମିଲ୍ ହୋଇ ୪୦୦ ମିଟର ଦୌଡ଼ରେ ଦ୍ୱିତୀୟ ସ୍ଥାନ ଅଧିକାର କରି ଓଡିଶା ପାଇଁ ରୌପ୍ୟ ପଦକ ହାସଲ କରିଛନ୍ତି ।
ବାଲେଶ୍ବର ଜିଲ୍ଲା ସିମୁଳିଆ ବ୍ଲକ ଅନ୍ତର୍ଗତ ବମତିଆ ଗ୍ରାମର ରମାକାନ୍ତ ଶଙ୍ଖୁଆଙ୍କ ପୁଅ ଅନିରୁଦ୍ଧ ଶଙ୍କୁଆ । ପିଲାବେଳୁ ଖେଳରେ ରୁଚି ରଖିଲେ ଅନିରୁଦ୍ଧ । ବିଭିନ୍ନ ଖେଳ ପ୍ରତି ତାଙ୍କର ବେଶ ଆଗ୍ରହ ରହିଥିଲା । ଏହି ଖେଳ ଯେ ଦିନେ ତାଙ୍କୁ ଏମିତି ପରିଚୟ ପ୍ରଦାନ କରିବ ତାହା ଆଜି ପ୍ରମାଣିତ ହୋଇଛି । ଉତ୍ତରପ୍ରଦେଶର ମଥୁରା ହରଦୟାଲ ଟେକନିକାଲ କ୍ୟାମ୍ପସରେ ଦୁଇ ଦିନ ଧରି ଚାଲୁଥିବା ଜାତୀୟ ଚମ୍ପିଆନସିପ ଦୌଡ଼ ପ୍ରତିଯୋଗିତାରେ ଅନିରୁଦ୍ଧ ଅଂଶଗ୍ରହଣ କରିଥିଲେ । ଏଥିରେ ଅନିରୁଦ୍ଧ ୪ଶହ ମିଟର ଦୌଡ଼ରେ ଦ୍ୱିତୀୟ ସ୍ଥାନ ଅଧିକାର କରି ରୌପ୍ୟ ପଦକ ଜିତିଛନ୍ତି ।
ଏହା ବି ପଢନ୍ତୁ...ବର୍ଲିନ ଅଲମ୍ପିକ୍ସରେ ଚମକିଲେ ବଲାଙ୍ଗୀର ପୁଅ, ଜିତିଲେ ରୌପ୍ୟ ପଦକ
ଏହି ସଫଳତା ପାଇବା ପରେ ଖେଳପ୍ରେମୀ, ସାଙ୍ଗସାଥି, ପରିବାର ଲୋକେ ତାଙ୍କୁ ନେଇ ଗର୍ବ ଅନୁଭବ କରିବା ସହ ତାଙ୍କ ଉଜ୍ଵଳ ଭଵିଷ୍ୟତ କାମନା କରିଛନ୍ତି । ଭବିଷ୍ୟତରେ ଅନିରୁଦ୍ଧ ଭାରତୀୟ ସେନାରେ ଯୋଗ ଦେଇ ଦେଶ ମାତୃକାର ସେବା କରିବାକୁ ଲକ୍ଷ୍ୟ ରଖିଛନ୍ତି । ଅନିରୁଦ୍ଧ ୨୦୧୯ ମସିହାରେ ବାଲିଖଣ୍ଡ କଲେଜରୁ ଯୁକ୍ତ ଦୁଇ ବିଜ୍ଞାନରେ ପାସ କରିବା ପରେ ଜିଲ୍ଲା ତଥା ରାଜ୍ୟସ୍ତରୀୟ ଖେଳ ପ୍ରତିଯୋଗିତାରେ ଅଂଶଗ୍ରହଣ କରି ଅନେକ ସଫଳତା ହାସଲ କରିଥିଲେ । ଅନିରୁଦ୍ଧ ଚଳିତ ମାସ ଜୁଲାଇ ୧୫ ଓ ୧୬ ତାରିଖରେ ଉତ୍ତରପ୍ରଦେଶ ଠାରେ ଆୟୋଜିତ ଗଣଦୌଡ଼ ପ୍ରତିଯୋଗିତାରେ ଅଂଶଗ୍ରହଣ କରି ସଫଳତା ହାସଲ କରିଛନ୍ତି । ଅନିରୁଦ୍ଧ ଜଣେ ଚାଷୀ ପରିବାରର ହୋଇଥିଲେ ମଧ୍ୟ ନିଜର ଦୃଢ଼ ଇଚ୍ଛାଶକ୍ତି ଓ ଅଧ୍ୟବସାୟ ଯୋଗୁଁ ରାଜ୍ୟ ପାଇଁ ଖେଳି ଗୌରବ ଆଣିଛନ୍ତି ।
ଓଡିଶା କ୍ରୀଡା ହବ ହେବାକୁ ଲକ୍ଷ୍ୟ ରଖିଥିବା ବେଳେ ଜାତୀୟ ସ୍ତରରେ ଚମକିଛନ୍ତି ଓଡିଆ ଆଥଲେଟ । କିଛି ଦିନ ତଳେ F.I.V.A ଦ୍ୱାରା ପରିଚାଳିତ ୨୧ ବର୍ଷରୁ କମ୍ ପୁରୁଷ ଭଲିବଲ ବିଶ୍ୱ ଚାମ୍ପିଆନସିପରେ ଭାଗ ନେଇ ଗୌରବ ଆଣିଥିଲେ କେନ୍ଦ୍ରାପଡା ଜିଲ୍ଲାର ପୁଅ ରଜାକ । ଏହି ଯୁବ ଖେଳାଳୀଙ୍କ ସଂଘର୍ଷମୟ ଜୀବନକୁ ନେଇ ସବୁଆଡେ ଚର୍ଚ୍ଚା ହୋଇଥିଲା ।
ଇଟିିଭି ଭାରତ, ବାଲେଶ୍ବର
