ବାଲେଶ୍ଵର: ଖନ୍ତାପଡ଼ାସ୍ଥିତ ଫାଲକନ ମେରାଇନ ଚିଙ୍ଗୁଡ଼ି ପ୍ରୋସେସିଂ ପ୍ଲାଣ୍ଟରେ ବଡ ଅଘଟଣ । ଗ୍ୟାସ ଲିକ ହୋଇ 98 ଜଣ ବାଲେଶ୍ବର ମେଡିକାଲରେ ଭର୍ତ୍ତି ହୋଇଛନ୍ତି । ଏହି ମାମଲା ପରେ ଫାଇକନ ମେରାଇନକୁ ସିଲ୍ କରାଯାଇଛି । ଗୁରୁବାର ସ୍ବତନ୍ତ୍ର ସାଇଣ୍ଟିଫିକ ଟିମ ପହଞ୍ଚି ସ୍ଥିତି ସମୀକ୍ଷା କରିବେ । ଏପଟେ ଏ ନେଇ ଖନ୍ତପଡା ପୋଲିସ ଷ୍ଟେସନରେ ମାମଲା ରୁଜୁ କରାଯାଇ 7ଜଣଙ୍କୁ ଗିରଫ କରାଯାଇଛି । ଶିଶୁ ଶ୍ରମିକଙ୍କୁ କାମ କରାଉଥିବା ଅଭିଯୋଗରେ ସେମାନଙ୍କୁ ଗିରଫ କରାଯାଇଛି । ଏହାସହ କେସ ନମ୍ବର 258/19 ଅନ୍ତର୍ଗତ ଆଇପିସି ଧାରା 308, 324, 326, 294, 358, 14, 35ରେ ଗିରଫ କରାଯାଇଛି ।
ତେବେ ଲିକ ହୋଇଥିବା ଗ୍ୟାସ କ୍ଲୋରିନ ବୋଲି କୁହାଯାଇଛି । ତେବେ ଏହା କଣ ତାହା ତଦନ୍ତ ପରେ ଜଣାପଡିବ ବୋଲି ଜିଲ୍ଲାପାଳ କହିଛନ୍ତି । ଅନ୍ୟପକ୍ଷେ ମଧ୍ୟରାତ୍ରରେ ମେଡିକାଲରେ ପହଞ୍ଚିଥିଲେ ଶ୍ରମ ମନ୍ତ୍ରୀ ସୁଶାନ୍ତ ସିଂ। ମେଡିକାଲ ପରିଦର୍ଶନ କରି ଅସୁସ୍ଥଙ୍କ ଅବସ୍ଥା ପଚାରି ବୁଝିବା ସହ ଜିଲ୍ଲା ଶ୍ରମ ଅଧିକାରୀଙ୍କୁ ତଦନ୍ତ ଦାୟିତ୍ୱ ଦେଇଥିବା ଜଣାପଡିଛି । ଅସୁସ୍ଥଙ୍କ ସ୍ୱାସ୍ଥ୍ୟବସ୍ଥା ସ୍ଥିର ଥିବାବେଳେ ଶିଶୁ ଶ୍ରମିକ କାମ କରିବା ନେଇ ତଦନ୍ତ ପରେ କାର୍ଯ୍ୟାନୁଷ୍ଠାନ ନିଆଯିବ । ମୟୂରଭଞ୍ଜ ଓ କଟକରୁ ଡାକ୍ତର ବାଲେଶ୍ଵର ମେଡିକାଲରେ ପହଞ୍ଚିଥିବା ଜଣାପଡିଛି ।
ବୁଧବାର ସନ୍ଧ୍ୟା 8ଟାବେଳେ ହଠାତ ଗ୍ୟାସ ଲିକ ହୋଇଥିଲା । ଏହି ସମୟରେ ଫ୍ୟାକ୍ଟ୍ରିରେ ରହିଯାଇଥିବା ଲୋକଙ୍କ ଭିତରୁ ପ୍ରଥମେ 15 ଜଣ ଲୋକ ଅସୁସ୍ଥ ହୋଇଥିଲେ । ସେମାନଙ୍କୁ ଖନ୍ତାପଡା ମେଡିକାଲ ନିଆଯାଇଥିଲା । ପରେ ଅସୁସ୍ଥଙ୍କ ସଂଖ୍ୟା ବୃଦ୍ଧି ହେବା ସହ ମେଡିକାଲରେ ଥିବା ଲୋକଙ୍କ ଅବସ୍ଥା ସଙ୍କଟାପନ୍ନ ହେବାରୁ ସେମାନଙ୍କୁ ବାଲେଶ୍ଵର ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରାଯାଇଥିଲା ।
ପ୍ରାୟ 100ରୁ ଊର୍ଦ୍ଧ୍ବ ଲୋକଙ୍କୁ ବାଲେଶ୍ଵର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଥିମଧ୍ୟରୁ କିଛି ଲୋକଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିବାରୁ ତାଙ୍କୁ ଘରକୁ ଫେରାଇ ଦିଆଯାଇଛି । ଅସୁସ୍ଥଙ୍କ ମଧ୍ୟରେ ଛୋଟ ପିଲା ଓ ମହିଳାଙ୍କ ସଂଖ୍ୟା ଅଧିକ ଥିବା ଦେଖାଯାଇଛି । ଏ ନେଇ ମେଡିକାଲ ପ୍ରଶାସନ ପକ୍ଷରୁ ଅସୁସ୍ଥଙ୍କୁ ବ୍ୟାପକ ସ୍ବାସ୍ଥ୍ୟ ସେବା ଯୋଗାଇବା ସହ ନର୍ସ ଏବଂ ଡାକ୍ତରଙ୍କୁ ଉପସ୍ଥିତ ରହିବା ପାଇଁ ନିର୍ଦ୍ଦେଶ ଦିଆଯାଇଛି । ଅନ୍ୟପକ୍ଷେ ଗୁରୁବାର ସନ୍ଧ୍ୟା ସୁଦ୍ଧା କର୍ମଚାରୀଙ୍କୁ ଡିସଚାର୍ଜ କରାଯିବ ବୋଲି ସିଡିଏମଓ ସୂଚନା ଦେଇଛନ୍ତି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
