ବାଲେଶ୍ବର/ମୟୂରଭଞ୍ଜ: ସ୍ବାମୀକୁ କଟୁରୀରେ ହାଣି ଥାନାରେ ଆତ୍ମସମର୍ପଣ କଲା ସ୍ତ୍ରୀ। । ସ୍ତ୍ରୀର ମାନ୍ୟତା ନଦେବାରୁ ବୁଧବାର ଭୋର ୪ଟା ସମୟରେ ବାଲେଶ୍ଵର ଗୁଡିପଦାରେ ବାସ କରୁଥିବା ବାଢ଼ା ମାରାଣ୍ଡିକୁ ମାରି ଏବେ ବାରିପଦା ସଦର ଥାନାରେ ଆତ୍ମସମର୍ପଣ କରିଛି ସୀତା ହେମ୍ବ୍ରମ । ମୃତ ବ୍ୟକ୍ତି ଜଣଙ୍କ ମୟୂରଭଞ୍ଜ ଜିଲ୍ଲା ଶିରିସବଣି ଗାଁର ବାଢ଼ା ମାରାଣ୍ଡି। ସେ ବ୍ୟାଙ୍କର ଏଫସିଆଇ ଜଗୁଆଳି ଭାବେ କାର୍ଯ୍ୟ କରୁଥିଲେ ।
ସୀତା ହେମ୍ବ୍ରମ ସହ ୧୨ ବର୍ଷରୁ ଅଧିକ ସମୟ ଯାଏଁ ଅନୈତିକ ସମ୍ପର୍କ ରଖିବା ସତ୍ତ୍ବେ ସ୍ତ୍ରୀର ମାନ୍ୟତା ଦେଇନଥିଲେ ବାଢା ମାରାଣ୍ଡି । ଏହାସହ ତାକୁ ପ୍ରତାରଣା କରୁଥିବା ଅଭିଯୋଗ ଆଣିଛି ସୀତା । ସେହି କ୍ରୋଧରେ ବାଢା ମାରାଣ୍ଡିକୁ କଟୁରୀରେ ହାଣି ଫେରାର ହୋଇଯାଇଥିଲା ସୀତା । ସୂଚନା ଥାଉକି, ବାଲେଶ୍ବର ସହଦେବଖୁଣ୍ଟା ଥାନା ଗୁଡିପଦାରେ ଏକ ଭଡା ଘରେ ଉଭୟ ବାଢା ଏବଂ ସୀତା ବାସ କରୁଥିଲେ । ସକାଳେ ଅଚାନକ ବାଢାଙ୍କୁ ନିଜ ଘରେ ରକ୍ତ ଜୁଡୁବୁଡୁ ଅବସ୍ଥାରେ ପଡିରହିଥିବା ଦେଖିବାକୁ ପାଇଥିଲେ ସ୍ଥାନୀୟ ଲୋକେ ।
ଏହାଦେଖି ସ୍ଥାନୀୟ ଲୋକେ ପୋଲିସକୁ ସୂଚନା ଦେଇଥିଲେ । ସୂଚନା ପାଇ ଘଟଣାସ୍ଥଳରେ ସାଇଣ୍ଟିଫିକ ଟିମ ପହଞ୍ଚି ଘଟଣାର ଅନୁଧ୍ୟାନ କରିବା ସହ ତଦନ୍ତ ଜାରି ରଖାଯାଇଥିଲା । ଠିକ ସେତିକି ବେଳେ ବାରିପଦା ସଦର ଥାନାରେ ଆତ୍ମସମର୍ପଣ କରିଥିଲା ହତ୍ୟାକାରୀ । ଉଭୟ ସୀତା ହେମ୍ମ୍ରମ ଓ ବାଢା ମାରାଣ୍ଡିଙ୍କ ଘର ସଦର ଥାନା ଅନ୍ତର୍ଗତ ସିରିସୀବଣି ବୋଲି ଜଣାପଡିଛି। ପୋଲିସ ଅଧିକ ତଦନ୍ତ ଜାରି ରଖିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ ଓ ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
