ବାଲେଶ୍ଵର: ପିକଅପ୍ ଭ୍ୟାନ ଓଲଟି ଦୁଇ ଜଣଙ୍କର ମୃତ୍ୟୁ ହୋଇଥିବାବେଳେ ୭ ଜଣ ଗୁରୁତର ହୋଇଛନ୍ତି । ଏହି ଅଭାବନୀୟ ଘଟଣା ଘଟିଛି ବାଲେଶ୍ବର ନୀଳଗିରି ଅଞ୍ଚଳରେ ।
ସୂଚନାନୁଯାୟୀ, କାହାଳିଆ ଗ୍ରାମକୁ ଛାତ ପକାଇବାକୁ ସଜନାଗଡ଼ ତେଣ୍ଡା ଅଂଚଳର ମୁଡୁଗୁରା ସାହିରୁ ଶ୍ରମିକ ସହ ମିକ୍ସଚର ମେସିନ ନେଇ ଏକ ପିକଅପ ଭ୍ୟାନରେ ଆସୁଥିଲେ । ସେରଗଡ଼ ଉଦଳା ରାସ୍ତା ପାନବରଜ ନିକଟରେ ଭାରସାମ୍ୟ ହରାଇ ଭ୍ୟାନଟି ଓଲଟିଯାଇଥିଲା । ମିକ୍ସଚର ମେସିନ ସହ ଗାଡି ଭିତରେ ଚାପି ହୋଇ ଦୁଇ ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ ୭ ଜଣ ଗୁରୁତର ହୋଇଛନ୍ତି ।
ଭିଡିଓ ସୌଜନ୍ୟ: ସମ୍ବାଦଦାତା, ବାଲେଶ୍ବର
ରାସ୍ତା ମଝିରେ ଦୁର୍ଘଟଣା ହୋଇଥିବାରୁ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା । ଘଟଣାସ୍ଥଳରେ ପୋଲିସ ପହଞ୍ଚି ପରିସ୍ଥିତି ନିୟନ୍ତ୍ରଣ କରିବା ସହ ଗୁରୁତରଙ୍କୁ ଆମ୍ବଲାନ୍ସ ଓ ଦମକଳବାହିନୀ ସହାୟତାରେ ନୀଳଗିରି ହସ୍ପିଟାଲରେ ଭର୍ତ୍ତି କରାଯାଇଛି । ଦୁଇ ମୃତକ ମୁଡୁଗୁରା ସାହିର ଗୁରୁବାରୀ ସିଂ ଓ ନମିତା ସିଂ ବୋଲି ଜଣାପଡିଛି ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
