ବଲାଙ୍ଗୀର : ବଲାଙ୍ଗୀର ମୀନାବଜାରରେ ଲାଗିଥିବା ଆକାଶ ଦୋଳିରୁ ପଡ଼ି ଯୁବକଙ୍କ ମୃତ୍ୟୁ । ଆକାଶ ଦୋଳିରେ ବସି ଝୁଲୁଥିବା ବେଳେ ଦୋଳିରୁ ଖସି ପଡ଼ିଥିଲେ ଯୁବକ। ଫଳରେ ଘଟଣାସ୍ଥଳରେ ହିଁ ଯୁବକଙ୍କର ମୃତ୍ୟୁ ହୋଇଛି । ବଲାଙ୍ଗୀର ଜିଲ୍ଲା ତୁରେକେଲା ସହରରେ ଚାଲିଥିବା ମୀନାବଜାରରେ ଏଭଳି ଅଭାବନୀୟ ଘଟଣା ଘଟିଛି ।
ଗତ କିଛି ଦିନ ହେଲା ତୁରେକେଲାରେ କାର୍ତ୍ତିକ ପୂଜା ପାଇଁ ମୀନାବଜାର ପଡ଼ିଛି । ଗତକାଲି(ସୋମବାର) ବିଳମ୍ୱିତ ରାତିରେ ତୁରେକେଲା ସହରର ୩୮ ବର୍ଷୀୟ ଦେବରାଜ ସାହୁ ଦୋଳିରେ ଝୁଲିବାକୁ ଯାଇଥିଲେ। ଦୋଳି ଝୁଲୁଥିବା ସମୟରେ ସେ ଅଚାନକ ତଳକୁ ଖସି ପଡ଼ିଥିଲେ । ଯାହାଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା ।
ଖବରପାଇ ତୁରେକେଲା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିଥିଲା । ପରେ ବ୍ୟବଚ୍ଛେଦ ପାଇଁ ସ୍ଥାନୀୟ ହସ୍ପିଟାଲକୁ ପଠାଇଛି । ତୁରେକେଲା ପୋଲିସ ଉପସ୍ଥିତ ଥିବା ଲୋକଙ୍କୁ ଦୁର୍ଘଟଣା ସମ୍ପର୍କରେ ପଚରାଉଚରା କରୁଛି ।
ସୂଚନାନୁସାରେ ମୃତ ଦେବରାଜ କୁକୁଡ଼ା ଫାର୍ମ କରି ପରିବାର ଚଳାଉଥିଲେ । ତାଙ୍କ ମୃତ୍ୟୁ ପରେ ପରିବାର ଅସହାୟ ହୋଇ ପଡିଛି । ତେଣୁ ତାଙ୍କ ପରିବାରକୁ ସରକାରୀ ସହାୟତା ଯୋଗାଇଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି । ସେହିପରି କେଉଁ ପରିସ୍ଥିତିରେ ଆକାଶ ଦୋଳିରୁ ପଡ଼ି ଯୁବକ ଜଣଙ୍କ ଜୀବନ ଗଲା ସେନେଇ ପୋଲିସ ଅଧିକ ଖୋଲତାଡ଼ କରୁଛି ।
ଅନ୍ୟପକ୍ଷରେ ଦେବରାଜଙ୍କ ମୃତ୍ୟୁପରେ ପରିବାବରରେ ଶୋକର ଛାୟା ଖେଳିଯାଇଛି । ପରିବାରରେ ଏକମାତ୍ର ରୋଜଗାରକ୍ଷମ ବ୍ୟକ୍ତି ଥିଲେ ଦେବରାଜ । ହେଲେ ତାଙ୍କ ମୃତ୍ୟୁପରେ ଏବେ ପରିବାର ବେସାହାରା ହୋଇପଡ଼ିଛି ।
ଇଟିଭି ଭାରତ, ବଲାଙ୍ଗୀର
