‘ରାକ୍ଷୀ’ ମହିଳାଙ୍କୁ ଦେଉଛି ସୁରକ୍ଷା, କରାଉଛି ରୋଜଗାରକ୍ଷମ

ପ୍ରଶାସନ ସହାୟତାରେ ଘରେ ରାକ୍ଷୀ ତିଆରି କରି ରୋଜଗାରକ୍ଷମ ହେଲେ SHG ମହିଳା । ଅଧିକ ପଢନ୍ତୁ...

ବଲାଙ୍ଗୀର: ମହିଳାଙ୍କୁ ରୋଜଗାର ଦେଉଛି ରାକ୍ଷୀ । ବଲାଙ୍ଗୀରର SHG ଗ୍ରୁପ ମହିଳା ଘରେ ସୁନ୍ଦର ଓ ଶସ୍ତା ରାକ୍ଷୀ ତିଆରି କରି ବଜାରରେ ବିକ୍ରି କରି ଭଲ ଦୁଇ ପଇସା ରୋଜଗାର କରିବାରେ ସକ୍ଷମ ହୋଇଛନ୍ତି । ଏଥିରେ ପ୍ରଶାସନ ମଧ୍ୟ ସେମାନଙ୍କୁ ସହଯୋଗ ଓ ସୁବିଧା ଯୋଗାଇ ଦେଇଛି ।

ତେବେ ଆଜିର ମହିଳାମାନେ ନିଜର ଉଦ୍ୟମ ଓ ପରିଶ୍ରମ ବଳରେ ଏକ ସ୍ବତନ୍ତ୍ର ପରିଚୟ ତିଆରି କରିବାରେ ସଫଳ ହେଉଛନ୍ତି । ଏହିପରି ଏବେ ବଲାଙ୍ଗୀର ଜିଲ୍ଲାର ମହିଳାମାନେ ମଧ୍ୟ କୌଣସି ସୁଯୋଗ ହାତଛଡା ନକରି ବିନିଯୋଗ କରିବାରେ ଲାଗି ପଡିଛନ୍ତି । ଏଥିସହ ନିଜ ରୋଜଗାରର ବାଟ ଖୋଜି ପାଇଛନ୍ତି । ଏହିପରି ଏବେ ବଲାଙ୍ଗୀର ମହିଳାମାନେ ଘରେ ଘରେ ନିଜ ହାତରେ ରାକ୍ଷୀ ତିଆରି କରୁଛନ୍ତି । ଯେଉଁଥିରେ ସମ୍ବଲପୁରୀ ରାକ୍ଷୀ, ପଞ୍ଚ ଶଷ୍ୟରେ ତିଆରି ରାକ୍ଷୀ, ମୋତି ସୂତାରେ ରାକ୍ଷୀ ସବୁ ପ୍ରସ୍ତୁତ କରୁଛନ୍ତି । ଏସବୁ ବେସ୍ କମ୍ ଦାମରେ ବିକ୍ରି କରାଯାଉଥିବା ସହ ସୁନ୍ଦର ମଧ୍ୟ ହୋଇଛି । ଫଳରେ ଏଥିପ୍ରତି ଗ୍ରାହକ ଆକୃଷ୍ଟ ହେଉଛନ୍ତି ।

ତେବେ ଜିଲ୍ଲାର ଶତାଧିକ ମହିଳା ସଙ୍ଗଠିତ ହୋଇ ଏହି ରାକ୍ଷୀ ତିଆରିରେ ଲାଗିଛନ୍ତି । ପ୍ରଶାସନ ମଧ୍ୟ ସେମାନଙ୍କୁ ସହଯୋଗର ହାତ ବଢ଼ାଇଛି । ଯେଉଁଥିରେ ଏମାନଙ୍କ ପାଇଁ ସ୍ୱତନ୍ତ୍ର ବଜାର ସୁବିଧା ସହର ମଧ୍ୟରେ ଯୋଗାଇ ଦେଇଛି । ଯାହାଫଳରେ ମହିଳା ଗୋଷ୍ଠୀ ଏହି ବଜାରରେ ତାଙ୍କର ହାତ ତିଆରି ରାକ୍ଷୀ ବିକ୍ରି କରିବାର ବେଶ ସୁଯୋଗ ପାଇଛନ୍ତି । ପୂର୍ବରୁ ଏମାନେ ରାକ୍ଷୀ ତିଆରି କରି ଗାଁ ଗଣ୍ଡାରେ ସୀମିତ ଆକାରରେ ବ୍ୟବସାୟ କରୁଥିଲେ । ହେଲେ ଏବେ ପ୍ରଶାସନର ସୁବିଧା ସୁଯୋଗ ଯୋଗୁଁ ବଡ ବଜାର ପାଇଥିବାରୁ ପ୍ରଶାସନକୁ ଧନ୍ୟବାଦ ଜଣାଇଛନ୍ତି ମହିଳା ଗୋଷ୍ଠୀ ।



ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ