ବଲାଙ୍ଗୀର: ତିନି ଡକାୟତଙ୍କ ଯୋଜନାକୁ ପଣ୍ଡ କରିଛି ପୋଲିସ । ଜିଲ୍ଲାରେ ଡକାୟତି କରି ଲୋକଙ୍କ ନିଦ ଉଡାଇଥିବା ତିନି ଦୁର୍ଦ୍ଦାନ୍ତ ଅପରାଧୀଙ୍କୁ କାବୁ କରିଛି ପୋଲିସ । ତିନି ଜଣଙ୍କୁ କୋର୍ଟ ଚାଲାଣ କରିଛି ପୋଲିସ ।
ମଙ୍ଗଳବାର ମୁରିବାହାଲ ପୋଲିସ ପାଟ୍ରୋଲିଂ କରୁଥିବା ସମୟରେ ୩ ଦୁର୍ଦ୍ଦାନ୍ତ ଅପରାଧିଙ୍କୁ ଧରିବାରେ ସକ୍ଷମ ହୋଇଛି । ଗିରଫ ଅପରାଧି ମାନଙ୍କଠାରୁ ଗୋଟିଏ ଦେଶି ବନ୍ଧୁକ, ଗୋଟିଏ ଭୁଜାଲି , ନମ୍ବର ବିହୀନ ବାଇକ ସହ ୩ଟି ମୋବାଇଲ ଫୋନ ଜବତ ହୋଇଛି । ଗୁରଣ୍ଡା- ଭୋଇପଡା ଗାଁ ମଝିରେ ନମ୍ବର ବିହୀନ ଆପାଚି ଗାଡିରେ ୩ ଜଣଙ୍କୁ ପୋଲିସ ପାଟ୍ରୋଲିଂ କରୁଥିବା ସମୟରେ ଅଟକାଇ ଥିଲା । ସେହି ସମୟରେ ଅନ୍ୟ ୨ଟି ବାଇକରେ ଆସୁଥିବା ୨ ଜଣ ଫେରାର ହୋଇଯାଇଥିଲେ । ପୋଲିସ ଗିରଫ କରିଥିବା ଯୁବ ମାନେ ହେଲେ ବଙ୍ଗୋମୁଣ୍ଡା ଥାନା ସଦରର ଦୁଃଖୀରାମ ସରାଫ, ମୁରିବାହାଲ ଥାନା ଭୋଇପଡାର ବସନ୍ତ ସରାଫ ଓ ଗରୁଡଧ୍ୱଜ ସରାଫ ।
ଗିରଫ ଅଭିଯୁକ୍ତ ମାନେ ଅପରାଧି କାର୍ଯ୍ୟକଳାପରେ ବହୁ ସମୟରେ ଲିପ୍ତ ଥିବା ବେଳେ କୌଣସି ଏକ ବଡ ଡକାୟତି କରିବାରେ ଯୋଜନା କରୁଥିଲେ ବୋଲି ମୁରିବାହାଲ ପୋଲିସ ପଣ୍ଡ କରିଛି । ଗିରଫ ୩ ଦୁର୍ଦ୍ଦାନ୍ତ ଅପରାଧିଙ୍କୁ ମୁରିବାହଲ ପୋଲିସ କୋର୍ଟ ଚାଲାଣ କରିଛି ।
ବଲାଙ୍ଗୀରରୁ ସେଖ୍ ମହମ୍ମଦ ୱାହିଦ,ଇଟିଭି ଭାରତ
