ବଲାଙ୍ଗୀର: ପୁଣିଥରେ ଦେଖିବାକୁ ମିଳିଛି ଦାଦନ ଦୁଖଃ । ଦାଦନ ଖଟିବାକୁ ଯାଇ ହାଇଦ୍ରାବାଦରେ ଦୁର୍ଘଟଣାରେ ପ୍ରାଣ ହରାଇଲେ ଯୁବକ । ହେଲେ ମୃତଦେହ ଫେରାଇବା ଆଣିବାକୁ ଅର୍ଥ ସାଜିଛି ବାଧକ । ଫଳରେ ପୁରା ପରିବାର ଏବେ ଅସହାୟ । ମୃତଦେହ ଆଣିବା ପାଇଁ ଅର୍ଥ ଯୋଗାଡ କରିବା ଭିକ୍ଷା ମାଗୁଛି ଭଉଣୀ । ଏପରି ଏକ ହୃଦୟ ବିଦାରକ ଘଟଣା ବଲାଙ୍ଗୀର ଜିଲ୍ଲା ସଇଁତଳା ବ୍ଲକରେ ଦେଖିବାକୁ ମିଳିଛି ।
ସଇଁତଳା ବ୍ଲକ ଅନ୍ତର୍ଗତ ଡେଙ୍ଗ ପଞ୍ଚାୟତର ଧୁନକେଡା ଗ୍ରାମର କୁଳମଣି ଛାତ୍ରିଆଙ୍କ ପୁଅ ରାଜୁ ଛତ୍ରୀଆ ଦାଦନ ଖଟିବାକୁ ହାଇଦ୍ରାବାଦ ଯାଇଥିଲେ । ସେଠି ତାଙ୍କର ମୃତ୍ୟୁ ହୋଇଥିବା ବେଳେ ଏବେ ତାଙ୍କ ମୃତଦେହ ଆଣିବାକୁ ଏହି ପରିବାର ପାଖରେ ଟଙ୍କା ନାହିଁ । ଫଳରେ ମୃତକଙ୍କ ଭଉଣୀମାନେ ଏବେ ହାତ ପତାଇ ଟଙ୍କା ଭିକ୍ଷା ମାଗିବା ଭଳି ଚିତ୍ର ସମ୍ନାକୁ ଆସିଛି ।
ତେବେ ସୂଚନା ଅନୁସାରେ ଏହି ଗ୍ରାମର କୁଳମଣି ଛାତ୍ରୀଆଙ୍କ ପାଞ୍ଚ ଝିଅ ଓ ଗୋଟିଏ ସାନ ପୁଅ ରାଜୁ ଛତ୍ରିଆକୁ ନେଇ ତାଙ୍କ ପରିବାର । କୁଳମଣି କିଛି ବର୍ଷ ହେବ ବୟସାଧିକ କାରଣରୁ କାମ କରିପାରୁ ନାହାନ୍ତି । ସେହିପରି ଏମାନେ ନିହାତି ଗରିବ ଥିବା ବେଲେ ସେ କୌଣସି ମତେ ଦୁଇ ଝିଅର ବିବାହ କରିଛନ୍ତି । ଏବେ ଘରେ ତିନି ଝିଅ ସହ ପୁଅ ରହି ଆସୁଥିଲେ । ରାଜୁ ଛାତ୍ରୀଆ ଘରର ଆର୍ଥିକ ପରିସ୍ଥିତି ସୁଧାର ଓ ଖାଇବା ଦୁଇମୁଠା ଯୋଗାଡ଼ କରିବା ପାଇଁ ବାଧ୍ୟ ହୋଇ ବାହାର ରାଜ୍ୟକୁ ଦାଦନ ଖଟିବାକୁ ଯାଇଥିଲେ । ସବୁ ମାସ କିଛି କିଛି ଟଙ୍କା ସେଠୁ ସେ ଘରକୁ ପଠାଉଥିଲେ । ଯେଉଁଥିରେ ଦୁଇ ଭଉଣୀଙ୍କ ପାଠପଢା ଓ ସମସ୍ତଙ୍କ ପେଟକୁ ଦାନା ଯୋଗାଡ଼ ହେଉଥିଲା ।
ହେଲେ ଗତ 22 ତାରିଖରେ ହାଇଦ୍ରାବାଦରେ ତାଙ୍କର ଏକ ଦୁର୍ଘଟଣାରେ ମୃତ୍ୟୁ ହୋଇଥିବା ସେଠାକାର ପୋଲିସ କୁଳମଣିଙ୍କର ପରିବାରକୁ ସୂଚନା ଦେଇଥିଲା । ଖବର ପାଇବା ପରେ ଏହି ପରିବାର ଉପରେ ଯେମିତି ଦୁଃଖର ପାହାଡ ଲଦି ହୋଇ ଯାଇଛି । ବୃଦ୍ଧ ମା’ ବାପା ନିଜ ଏକମାତ୍ର ପୁଅକୁ ହରାଇ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି । ସେପଟେ ମୃତଦେହ ସେଠାରୁ କେମିତି ଆଣିବେ ତାର ମଧ୍ୟ ତାଙ୍କୁ ବଡ ଚିନ୍ତା । କାରଣ ହାତରେ ଗୋଟିଏ ଟଙ୍କା ନାହିଁ । ଏହା ପାଇଁ ସେମାନେ ନିଜ ସମ୍ପର୍କୀୟ ଓ ଗ୍ରାମବାସୀଙ୍କୁ ଟଙ୍କା ସାହାଯ୍ୟ ମାଗିଥିଲେ।
ତେବେ ହାଇଦ୍ରାବାଦରୁ ମୃତଦେହ ବାହକ ଗାଡ଼ିରେ ଶବ ଆଣିବାକୁ 70 ହଜାର ଟଙ୍କା ଖର୍ଚ୍ଚ ଆବଶ୍ୟକ ଜଣାପଡ଼ିଛି । ଏତେ ଟଙ୍କା ତାଙ୍କ ପାଖରେ ନ ଥିବା ବେଳେ ସମୟ ମଧ୍ୟ ହାତରେ ନାହିଁ । ତେଣୁ ଏମାନେ ବାଧ୍ୟ ହୋଇ ଟଙ୍କା ଯୋଗାଡ ପାଇଁ ଭିକ୍ଷା ମାଗିଛନ୍ତି । ଏହି କରୁଣ ଚିତ୍ର ସମସ୍ତଙ୍କ ମନକୁ ଦୋହଲାଇ ଦେଇଛି ।ସରକାରୀ ସହାୟତା ପାଇଁ ଏହି ପରିବାର ଓ ସ୍ଥାନୀୟ ଗ୍ରାମବାସୀ ଦାବି କରିଛନ୍ତି ।
ଇଟିଭି ଭାରତ, ବଲାଙ୍ଗୀର
