ବଲାଙ୍ଗୀର: ଚିକିତ୍ସା ପାଇଁ ମୋପେଡରେ ଯାଉଥିବାବେଳେ ବାଟରେ ମୃତ୍ୟୁ । ବଲାଙ୍ଗୀର ସହରରେ ଘଟିଛି ଏଭଳି ହୃଦୟବିଦାରକ ଘଟଣା ।
ଏକ ଟ୍ରକ ମାଡ଼ି ଯିବାରୁ ମୋପେଡରେ ଚିକିତ୍ସା ପାଇଁ ଯାଉଥିବା ସ୍ବାମୀ ସ୍ତ୍ରୀଙ୍କ ମଧ୍ୟରୁ ସ୍ତ୍ରୀଙ୍କ ମୃତ୍ୟୁ ଘଟିଛି।
ସୂଚନା ଅନୁଯାୟୀ, ବଲାଙ୍ଗୀର ଚନ୍ଦନ ବାଟି ଗ୍ରାମର ସୌଖି ସାହୁ ଓ ତାଙ୍କ ସ୍ତ୍ରୀ ରଜନୀ ଭୋଇ ଆଜି ଚିକିତ୍ସା ପାଇଁ ବଲାଙ୍ଗୀର ମେଡ଼ିକାଲ କଲେଜକୁ ଯାଉଥିଲେ। ତେବେ ମେଡିକାଲରେ ପହଞ୍ଚିବା ପୂର୍ବରୁ ବାଟରେ ଜଗି ରହିଥିଲା ମୃତ୍ୟୁ । ସ୍ଥାନୀୟ କଚେରୀ ଛକ ନିକଟରେ ପଛ ପଟୁ ଦ୍ରୁତ ଗତିରେ ଆସୁଥିବା ଏକ ଟ୍ରକ ତାଙ୍କ ମୋପେଡକୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ପତ୍ନୀ ରଜନୀ ଭୋଇଙ୍କ ମୃତ୍ୟୁ ହୋଇଥିଲା ।
ବଲାଙ୍ଗୀର ଟାଉନ ପୋଲିସ ଘଟଣାସ୍ଥଳରେ ପହଞ୍ଚି ଶବ ଉଦ୍ଧାର କରିବା ସହ ବ୍ୟବଛେଦ ପାଇଁ ପଠାଇଥିଲା। ସେହିପରି ଦୁର୍ଘଟଣା ଘଟାଇଥିବା ଟ୍ରକକୁ ପୋଲିସ ଜବତ କରିବା ସହ ଡ୍ରାଇଭରକୁ ଅଟକ ରଖିଛି ।
ଅନ୍ୟପଟେ ଏହି ଦୁର୍ଘଟଣାକୁ ନେଇ ପୋଲିସର ଅଜବ ଯୁକ୍ତିକୁ ନେଇ ଲୋକ ଏଠି ପ୍ରଶ୍ନ କରିଛନ୍ତି। ସଟଡାଉନରେ ଲୋକ ବାହାରକୁ ବାହାରିବା ଯୋଗୁଁ ଏହି ଦୁର୍ଘଟଣା ଘଟିଥିବା ପୋଲିସ ପକ୍ଷରୁ କୁହାଯାଇଥିଲା । ପୋଲିସର ଏହି ବୟାନକୁ ଲୋକେ ନାପସନ୍ଦ କରିଥିଲେ । ଏଥିସହିତ ସହର ମଧ୍ୟରେ ଟ୍ରକ ଦ୍ରୁତ ଗତିରେ ଚଳାଚଳକୁ ବିରୋଧ କରିଥିଲେ । ଫଳରେ ଘଟଣା ସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଥିଲା ।
ବଲାଙ୍ଗୀରରୁ ଏସକେ ମହମ୍ମଦ ୱାହିଦ, ଇଟିଭି ଭାରତ
