ବଲାଙ୍ଗିର: ପୁଇଁତଳା ବିଡିଓ ଅପହରଣ ମାମଲାରେ ପର୍ଦ୍ଦାଫାସ କରିଛି ପୋଲିସ । ସାରା ଦେଶରେ ନିର୍ବାଚନୀ ମାହେଲା ଥିବା ବେଳେ କାର୍ଯ୍ୟରତ ବିଡିଓଙ୍କୁ ଅପହରଣ ଘଟଣା ପ୍ରଶାସନରେ ହଇଚଇ ସୃଷ୍ଟି କରିଥିଲା ।
ଶୁକ୍ରବାର ବଲାଙ୍ଗୀର ପୁଇଁନ୍ତଳା ବ୍ଲକର ବିଡିଓ ସରୋଜ ମିଶ୍ର ନିଜ କାର୍ଯ୍ୟାଳୟରେ କାର୍ଯ୍ୟରତ ଥିବା ବେଳେ ୧୦ରୁ ଅଧିକ ଦୁର୍ବୁତ୍ତ କାର୍ଯ୍ୟାଳୟ ମଧ୍ୟକୁ ଧସେଇ ପସି ତାଙ୍କୁ ଅପହରଣ କରିଥିଲେ । ଆଉ ଅପହରଣ କରିବାର ତରିକା ଫିଲ୍ମ ଷ୍ଟାଇଲରେ ଥିଲା । କିନ୍ତୁ ଅପହରଣର କିଛି ସମୟ ପରେ ବିଡିଓଙ୍କୁ ଛାଡି ଦୁର୍ବୃତ୍ତ ଫେରାର ହୋଇଯାଇଥିଲେ । ଉଦ୍ଧାର ପରେ ବିଡିଓ କୌଣସି କଥାକୁ ନେଇ ମୁହଁ ଖୋଲି ନଥିଲେ । ମାତ୍ର ପୋଲିସ ଓ ନିଜେ ଜିଲ୍ଲାପାଳ ନିଜ ପକ୍ଷରୁ ଘଟଣାର ତଦନ୍ତ ଜାରି ରଖିଥିଲେ ।
ଘଟଣାକୁ ନେଇ ଏସପିଙ୍କ କହିବାନୁଯାୟୀ. ବିଡିଓଙ୍କ ଯେଉଁ ସ୍କର୍ପିଓ ଗାଡିରେ ଅପହରଣ କରାଯାଇଥିଲା ସେହି ଗାଡିଟି ବଲାଙ୍ଗିର କଂଗ୍ରେସ ଦଳର କର୍ମୀ ସନ୍ତୋଷ ଖୁରାଣ୍ଡିଙ୍କ ଥିଲା । ତେବେ ତାଙ୍କ ଅପହରଣରେ ସନ୍ତୋଷଙ୍କ ହାତ ଥିବା ଘଟଣାଟି ସାମନାକୁ ଆସିବା ପରେ ତାଙ୍କୁ ଏବେ ଦଳରୁ ବହିଷ୍କୃତ କରାଯାଇଛି ।
ବଲାଙ୍ଗିରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
