ବଲାଙ୍ଗୀର: ବଲାଙ୍ଗୀର ପୋଲିସ ନାଁରେ ସଙ୍ଗୀନ ଅଭିଯୋଗ । ଚେକିଂ ନାମରେ ଯୁବକଙ୍କୁ ମାଡ ମାରିଥିବା ଅଭିଯୋଗ ହୋଇଛି । ପୋଲିସ ବିରୁଦ୍ଧରେ ଏଭଳି ସଙ୍ଗୀନ ଅଭିଯୋଗ ଆଣିଛନ୍ତି ଦୀପଙ୍କର ପଣ୍ଡା ନାମକ ଯୁବକ । ପୋଲିସ ତାଙ୍କୁ ଚେକିଂ ଆଳରେ ମାଡ ମାରିଥିବା ସେ ଅଭିଯୋଗ କରିଛନ୍ତି ।
ସୂଚନା ଅନୁଯାୟୀ,ପାଟଣାଗଡ଼ରୁ ବଲାଙ୍ଗୀର ରାସ୍ତାରେ ପୋଲିସ ଟ୍ରାଫିକ ଚେକିଂ କରୁଥିଲା । ଏହି ସମୟରେ ପାଟଣାଗଡ଼ରୁ ବଲାଙ୍ଗୀରକୁ ଫେରୁଥିଲେ ଦୀପଙ୍କର । ଚେକିଂ ପାଇଁ ପୋଲିସ ତାଙ୍କୁ ଅଟକାଇ ଥିଲା । ହେଲେ ଚେକିଂ କରିବା ବଦଳରେ ତାଙ୍କୁ ମାଡ ମାରିଥିବା ତାଙ୍କ ବାପା ଅଭିଯୋଗ କରିଛନ୍ତି । ପୋଲିସ ମାଡରେ ଆହତ ହୋଇ ସେ ପ୍ରଥମେ ବଲାଙ୍ଗୀର ପରେ ବୁର୍ଲା ମେଡିକାଲରେ ଚିକିତ୍ସିତ ହେଉଛନ୍ତି ।
ଏନେଇ ଯୁବକଙ୍କ ବାପା ପାଟଣାଗଡ ଥାନାରେ ଲିଖିତ ଅଭିଯୋଗ କରିଛନ୍ତି । ସେପଟେ ପୋଲିସ ଜାଣିଶୁଣି ନିଜ ଦୋଷ ଲୁଚାଇବାକୁ ଚେଷ୍ଟା କରୁଥିବା ପରିବାର ଲୋକେ ଅଭିଯୋଗ ଆଣିବା ସହ କଠୋର କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରିଛନ୍ତି । ଅନ୍ୟପଟେ ଏନେଇ ପୋଲିସର ପ୍ରତିକ୍ରିୟା ମିଳିପାରିନାହିଁ ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ୍, ଇଟିଭି ଭାରତ
