ବଲାଙ୍ଗୀର: ଟିଟିଲାଗଡରେ ଆଜି ଏକ ହିଟ ଆଣ୍ଡ ରନରେ ଜଣଙ୍କର ମୃତ୍ୟୁ ହୋଇଥିବାବେଳେ ଆଉ 3 ଜଣ ଗୁରୁତର ଆହତ ହୋଇଛନ୍ତି । ତେବେ ଆଜି ଟିଟିଲାଗଡ ହାଟପଦା ପଦାରେ ବସିଥିବା ଦୈନିକ ବଜାର ମଧ୍ୟରେ ଏକ ପିକ୍-ଅପ ଭ୍ୟାନ ଦୃତଗତିରେ ଆସି ପରିବା ବିକାଳିଙ୍କ ଉପରେ ଚଢ଼ି ଯାଇଥିଲା । ପରେ ଉକ୍ତ ଭ୍ୟାନଟି ପୋଲିସ୍ ଥାନା ଗେଟକୁ ଧକ୍କା ଦେଇ ଓଲଟି ପଡ଼ିଥିଲା । ଏହି ଘଟଣାରେ ଜଣେ ମହିଳା ପରିବା ବିକାଳୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଆଉ ଦୁଇ ଜଣ ବ୍ୟବସାୟୀ ଓ ଜଣେ ଗ୍ରାହକ ଗୁରୁତର ଆହତ ହୋଇଛନ୍ତି ।
ତେବେ ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ପୋଲିସ ଓ ପ୍ରଶାସନିକ ଅଧିକାରୀ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବା ଫଳରେ ପରିବେଶ ସାମାନ୍ୟ ସ୍ବାଭାବିକ ହୋଇଥିଲା । ମୃତାହତଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରି ତଦନ୍ତ ଆରମ୍ଭ କରିଛି ପୋଲିସ । ସେପଟେ ଏହି ଦୁର୍ଘଟଣା ଘଟାଇବା ପରେ ସମ୍ପୃକ୍ତ ଗାଡ଼ିର ଡ଼୍ରାଇଭର ଫେରାର ହୋଇ ଯିବାରେ ସଫଳ ହୋଇଥିବାବେଳେ ତାକୁ ପୋଲିସ ଧରିବାର ଚେଷ୍ଟା ଜାରି ରଖିଥିବାର ଜଣାପଡ଼ିଛି ।
ବଲାଙ୍ଗୀର ଏସ କେ ମହମ୍ମଦ ଓ୍ବାହିଦ, ଇଟିଭି ଭାରତ
