ବଲାଙ୍ଗୀର: ବଲାଙ୍ଗୀର ଭୀମ ଭୋଇ ମେଡିକାଲ୍ କଲେଜ(Bhima Bhoi Medical College) ଛାତ୍ର ନିଶାନ୍ତ କୁମାରଙ୍କ ମୃତ୍ୟୁ ଘଟଣାରେ ଆଜି(ରବିବାର) ନୂଆ ତଥ୍ୟ ସାମ୍ନାକୁ ଆସିଛି । ନିଶାନ୍ତ ତାଙ୍କର ଏକ ବନ୍ଧୁଙ୍କ ସହ ହ୍ବାଟ୍ସଆପ୍ ଚାଟିଂର କିଛି ଫଟୋ ପୋଲିସକୁ ଦେଇଛନ୍ତି ପରିବାର ଲୋକ । ରାଗିଂ ପାଇଁ ନିଶାନ୍ତ ମୃତ୍ୟୁ ହୋଇଥିବା ସ୍ପଷ୍ଟ ବୋଲି ପରିବାର ଲୋକେ ଅଭିଯୋଗ କରିଛନ୍ତି ।
ଏହି ଆଧାରରେ ନିଶାନ୍ତଙ୍କ ବାପା କ୍ରୀଷନ କୁମାର ଥାନାରେ ଏକ ଲିଖିତ ଅଭିଯୋଗ କରିଛନ୍ତି । ତେବେ ଚାଟିଂରେ ମୃତ ଛାତ୍ର ନିଶାନ୍ତ କୁମାର ବିଦେଶରେ ରହୁଥିବା ଜଣେ ବନ୍ଧୁଙ୍କୁ ଏଠାକାର ରାଗିଂ ବିଷୟରେ କହିଥିବା ଜଣାପଡିଛି । ଯେଉଁଥିରେ ସେ ସ୍କୁଲରେ ପଢିବା ସହଜ ଥିବାବେଳେ ଏଠା ସିନିୟରମାନେ ଦିନକୁ ତିନି ଚାରି ଘଣ୍ଟା ରାଗିଂ କରୁଥିବାର ଲେଖିଛନ୍ତି ।
ସେହିପରି ତାଙ୍କୁ ପାର୍କ, ଖେଳ ପଡିଆ ଯିବାକୁ ମନା କରିବା ସହ ସିନିୟରଙ୍କୁ ଦେଖିଲେ ସମ୍ମାନ ଦେବାକୁ କହୁଥିବା ଚାଟିଂରେ ଲେଖିଛନ୍ତି । ସେହିପରି ସିନିୟରମାନେ ଖେଳିଲେ ତାଙ୍କୁ ଜୋର୍ ଜବରଦସ୍ତ ଉପସ୍ଥିତ ରହିବା ସହ ଫିଲ୍ଡରେ କାମ କରିବାକୁ କୁହାଯାଉଥିବା ମଧ୍ୟ କହିଛନ୍ତି । ତେବେ ବଲାଙ୍ଗୀର ଭୀମ ଭୋଇ କଲେଜରେ ରାଗିଂ ଚାଲିଥିବା ଏଥିରୁ ସ୍ପଷ୍ଟ ହୋଇ ଥିବାବେଳେ ନିଶାନ୍ତ ମୃତ୍ୟୁର ପ୍ରକୃତ କାରଣ ତଦନ୍ତ ପରେ ସ୍ପଷ୍ଟ ହେବ । ସେପଟେ ଓଡ଼ିଶାର ରାଗିଂ ମୁକ୍ତ କ୍ୟାମ୍ପସ ଅଭିଯାନ ପକ୍ଷରୁ ମଧ୍ୟ ଏକ ଦାବିପତ୍ର ମୁଖ୍ୟମନ୍ତ୍ରୀଙ୍କୁ ଦିଆ ଯାଇଛି । ସେହିପରି ମାମଲାର କ୍ରାଇମବ୍ରାଞ୍ଚ ତଦନ୍ତ ଦାବି କରାଯାଇଛି ବୋଲି ଆବାହକ ତେଜେଶ୍ବର ପରିଡ଼ା ସୂଚନା ଦେଇଛନ୍ତି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
