ବଲାଙ୍ଗୀର: ବିଷ ପିଇ ମାଆ ଓ ଝିଅଙ୍କ ଆତ୍ମହତ୍ୟା। ଏଭଳି ଏକ ଦୁଃଖଦ ଘଟଣା ଘଟିଛି ବଲାଙ୍ଗୀର ଜିଲ୍ଲା ପାଟଣାଗଡ଼ ବ୍ଲକ ପାଟିମାଳ ଗ୍ରାମରେ। ଜମିବାଡ଼ି ବିବାଦକୁ ନେଇ ଛୋଟ ଶିଶୁ ଏବଂ ମାଆ,ଝିଅ ବିଷ ପିଇଥିଲେ । ଫଳରେ ଶିଶୁଟିର ସ୍ବାସ୍ଥ୍ୟବସ୍ଥା ଗୁରୁତର ଥିବାବେଳେ ମାଆ ଓ ଝିଅଙ୍କ ମୃତ୍ୟୁ ହୋଇଛି ।
ସୂଚନା ଅନୁସାରେ ଗ୍ରାମର କଳା ବତି ସାହୁ ଓ ତାଙ୍କ ଝିଅ ସନ୍ତୋଷିନୀ ସାହୁଙ୍କ ମଧ୍ୟରେ ଜମିବାଡ଼ି ବିବାଦ ଲାଗିଥିଲା । ଏହି ବିବାଦ ଯୋଗୁଁ ସେମାନେ ଦୁଇ ଜଣ ବିଷ ପିଇ ଦେଇଥିବା ବେଳେ ସନ୍ତୋଷିନୀଙ୍କ ଛୋଟ ପୁଅକୁ ମଧ୍ୟ ବିଷ ଦେଇଥିଲେ । ତେବେ ଘଟଣାସ୍ଥଳରେ ମାଆ କଳାବତି ସାହୁ ଓ ଝିଅଙ୍କ ମୃତ୍ୟୁ ଘଟିଛି । ସେପଟେ ସନ୍ତୋଷିନୀଙ୍କ ଛୋଟ ଶିଶୁକୁ ଗୁରୁତର ଅବସ୍ଥାରେ ପାଟଣାଗଡ଼ ଡାକ୍ତରଖାନାରେ ଭର୍ତ୍ତି କରାଯାଇଛି । ମୃତ ସନ୍ତୋଷିନୀ ରାଜସ୍ଥାନରେ ବିବାହ କରିଥିଲେ । ସ୍ବାମୀଙ୍କ ମୃତ୍ୟୁ ପରେ ସେ ନିଜ ମାଆ ଘରେ ରହୁଥିଲେ । ତାଙ୍କର ଚାରୋଟି ସନ୍ତାନ ଥିବା ବେଳେ ତିନୋଟି ସନ୍ତାନ ବଲାଙ୍ଗୀର ଏକ ଆଶ୍ରମରେ ରହୁଛନ୍ତି । ସେପଟେ ଏହି ଘଟଣା ପରେ ପାଟଣାଗଡ଼ ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବାର ଜଣାପଡ଼ିଛି ।
ଇଟିଭି ଭାରତ, ବଲାଙ୍ଗୀର
