ବଲାଙ୍ଗୀର: ମହିଳା କର୍ମଚାରୀଙ୍କୁ ସୁପରିଟେଣ୍ଡେଣ୍ଟଙ୍କ ଦୁର୍ବ୍ୟବହାର । ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ସୁପରିଟେଣ୍ଡେଣ୍ଟ ଦୁର୍ବ୍ୟବହାର କରିଥିବା ଅଭିଯୋଗ । ମୋବାଇଲ ଛଡାଇବା ସହ ଆକ୍ରମଣ କରିଥିବା ମଧ୍ୟ ଅଭିଯୋଗ କଲେ ମହିଳା କର୍ମଚାରୀ । ଥାନାରେ ମାମଲା ରୁଜୁ ହେବା ପରେ ପୋଲିସ ଆରମ୍ଭ କରିଛି ତଦନ୍ତ ।
ଚର୍ଚ୍ଚାରେ ଭୀମ ଭୋଇ ମେଡିକାଲ କଲେଜ । ମେଡିକାଲ କଲେଜ ସୁପରିଟେଣ୍ଡେଣ୍ଟ ଜଣେ ଚତୁର୍ଥ ଶ୍ରେଣୀଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି । ସୂଚନା ଅନୁଯାୟୀ, ଦୀର୍ଘ ଦିନରୁ ଚତୁର୍ଥ ଶ୍ରେଣୀ କମର୍ଚାରୀ ଭାବେ କାମ କରୁଥିବା ସରିତା ନାଗ କିଛି ଦିନ ନିଜ ଡ୍ୟୁଟି ଆସି ନ ପାରିବାରୁ ତାଙ୍କୁ ଚାକିରୀରୁ ବହିଷ୍କାର କରା ଯାଇଥିଲା । ଏହା ଜାଣିବା ପରେ ସେ ଓ ତାଙ୍କର ଜଣେ ସମ୍ପର୍କୀୟ ମେଡିକାଲ କଲେଜ ଯାଇ ସୁପରିଟେଣ୍ଡେଣ୍ଟଙ୍କୁ ଚାକିରି ଦେବା ପାଇଁ କାକୁତି ମିନତି କରିଥିଲେ । ଏଥିରେ ଉତକ୍ଷିପ୍ତ ହୋଇ ସୁପରିଟେଣ୍ଡେଣ୍ଟ ସେମାନଙ୍କୁ ଦୁର୍ବ୍ୟବହାର କରିବା ସହ ସେ ମୋବାଇଲରେ ଦୃଶ୍ୟ ଉତ୍ତୋଳନ କରୁଥିବା ସମୟରେ ମୋବାଇଲ ଛଡାଇବାକୁ ଚେଷ୍ଟା କରିଥିଲେ । ଯାହାର ଦୃଶ୍ୟ ଏବେ ଭାଇରାଲ ହେବାରେ ଲାଗିଛି । ଏନେଇ ମହିଳା ଜଣଙ୍କ ବଲାଙ୍ଗୀର ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି ।
ସେପଟେ ବଲାଙ୍ଗୀର ପୋଲିସ ମାମଲା ରୁଜୁ କରିବା ସହ ମହିଳା କର୍ମଚାରୀଙ୍କ ବୟାନ ରେକର୍ଡ କରି ତଦନ୍ତ ଆରମ୍ଭ କରିଥିବା କହିଛି । ସେହିପରି ମହିଳା ଜଣକ ଆଦିବାସୀ ହୋଇଥିବାରୁ ଆଦିବାସୀ ସଂଘ ମଧ୍ୟ ସାମ୍ନାକୁ ଆସି ସୁପରିଟେଣ୍ଡେଣ୍ଟଙ୍କୁ ଶୀଘ୍ର ଗିରଫ ଦାବି କରିଛି । ନହେଲେ ଆଗାମୀ ଦିନରେ ଆଦିବାସୀ ସଂଘ ଆନ୍ଦୋଳନ କରିବ ବୋଲି କହିଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ୍, ଇଟିଭି ଭାରତ
