ବଲାଙ୍ଗୀର: ଜିଲ୍ଲାର ଭୀମ ଭୋଇ ମେଡିକାଲ କଲେଜରେ ଅଧ୍ୟୟନରତ ତୃତୀୟ ବର୍ଷର ଛାତ୍ରୀ ନିରୁପମା ନନ୍ଦଙ୍କ ମୃତଦେହ ଆଜି(ଗୁରୁବାର) କଲେଜ ହଷ୍ଟେଲରୁ ଉଦ୍ଧାର ହୋଇଛି । ତେବେ ପୋଲିସ ଏହାକୁ ନେଇ ତଦନ୍ତ ଆରମ୍ଭ କରିଥିବାବେଳେ କଲେଜ ୱାର୍ଡ ଓ କିଛି ସହପାଠୀଙ୍କ ନାମରେ ପରିବାର ଲୋକେ ଲିଖିତ ଅଭିଯୋଗ କରିଛନ୍ତି ।
ଛାତ୍ରୀ ନିରୁପମାଙ୍କ ମୃତଦେହ ସନ୍ଦେହସ୍ପଦ ଭାବରେ କଲେଜ ହଷ୍ଟେଲରୁ ଉଦ୍ଧାର ହୋଇଥିଲା । ତେବେ ଏନେଇ କଲେଜ କର୍ତ୍ତୃପକ୍ଷଙ୍କ କୌଣସି ପ୍ରତିକ୍ରିୟା ମିଳିନଥିବା ବେଳେ ପୋଲିସ ତାର ତଦନ୍ତ ଆରମ୍ଭ କରିଛି । ସେପଟେ ଏହାକୁ ନେଇ ପରିବାର ଲୋକେ ଆଜି ବଲାଙ୍ଗୀର ଟାଉନ ଥାନାରେ ତାଙ୍କ ଝିଅକୁ ହତ୍ୟା କରାଯାଇଛି ବୋଲି ଲିଖିତ ଅଭିଯୋଗ କରିଛନ୍ତି । ଯେଉଁଥିରେ ସେମାନେ ମୃତ ଝିଅର ୪ ଜଣ ସହପାଠୀ ଓ ଜଣେ ଅନ୍ତରଙ୍ଗ ଯୁବକ ବନ୍ଧୁଙ୍କ ସହ କଲେଜ ୱାଡେନଙ୍କ ନାଁରେ ଲିଖିତ ଅଭିଯୋଗ କରିଛନ୍ତି ।
ସେହିପରି ମୃତ ନିରୁପମାଙ୍କ ଜଣେ କଲେଜ ସାଙ୍ଗ ବାରମ୍ବାର ତାଙ୍କୁ ଫୋନ କରୁଥିବାର ଏମାନେ କହିଥିବା ବେଳେ ପୋଲିସ ଏ ଦିଗରେ ଅନୁଧ୍ୟାନ କରିବ ବୋଲି କହିଛି । ଅନ୍ୟପଟେ ପୋଲିସ ଏହି ଅଭିଯୋଗକୁ ଆଧାର କରି ଆଗକୁ ତଦନ୍ତ କରିବା ସହିତ ବ୍ୟବଚ୍ଛେଦ ରିପୋର୍ଟ ଆସିଲେ ସବୁ ତଥ୍ୟ ସାମନାକୁ ଆସିବା ବୋଲି କହିଛି ।
ସୂଚନା ଅନୁସାରେ, ଛାତ୍ର ଜଣକ ଭୀମ ଭୋଇ ମେଡିକାଲ କଲେଜରେ ତୃତୀୟ ବର୍ଷରେ ପାଠ ପଢୁଥିଲେ । ବିଳମ୍ବିତ ରାତିରେ ଝୁଲନ୍ତା ଅବସ୍ଥାରେ ତାଙ୍କ ମୃତଦେହ ହଷ୍ଟେଲ ମଧ୍ୟରୁ ଉଦ୍ଧାର ହୋଇଥିଲା । କଲେଜ କର୍ତ୍ତୃପକ୍ଷ ପରିବାର ଲୋକଙ୍କୁ ଓ ପୋଲିସକୁ ଏନେଇ ଖବର ଦେବା ପରେ ବଲାଙ୍ଗୀର ଟାଉନ ଥାନା ପୋଲିସ ଘଟଣାସ୍ଥଳରେ ପହଞ୍ଚିଥିଲା । ପୋଲିସ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ, ଇଟିଭି ଭାରତ
