ବଲାଙ୍ଗୀର: ସରୁନି ବଲାଙ୍ଗୀର ଚାଷୀଙ୍କ ଦୁଃଖ । ଗୋଟିଏ ପରେ ଗୋଟିଏ ଦୁର୍ଦ୍ଦଶା ମାଡି ଆସିବା ସହ ଦେଉଛି କଷ୍ଟ । ବର୍ତ୍ତମାନ ସମୟରେ ବନ୍ୟା ଛାଡିଯାଇଛି ହେଲେ ଏଠାକାର ଚାଷୀଙ୍କ ପାଇଁ ଦୁଃଖ ଆଣିଛି ଅଭାବୀ ସାର ବିକ୍ରି । ବନ୍ୟା ପରେ କିଛି ସ୍ଥାନରେ ବଞ୍ଚିଥିବା ଚାଷ ପାଇଁ ଏବେ ସାରର ଅଭାବ ଦେଖାଦେଇଛି । ଫଳରେ ଚାଷୀ ଚିନ୍ତାରେ ଥିବା ବେଳେ ଶୀଘ୍ର ସାର ଯୋଗାଇ ଦିଆଯାଉ ବୋଲି ଦାବି ହୋଇଛି ।
ଏହାସହ ଜିଲ୍ଲା ପ୍ରଶାସନ ଏଥିରେ ନିଜେ ହସ୍ତକ୍ଷେପ କରି ପଦକ୍ଷେପ ନିଅନ୍ତୁ ବୋଲି ଚାଷୀମାନେ ଦାବି କରିଛନ୍ତି।ସେପଟେ ବଲାଙ୍ଗୀର ଜିଲ୍ଲାରେ ୟୁରିଆ ସାର ଅଭାବକୁ ସ୍ବୀକାର କରିଛନ୍ତି ସାର ବିତରକ ଏଜେନ୍ସି ମାରଫେଡ।
ଖବର ଅନୁଯାୟୀ, ଜିଲ୍ଲାରେ ବର୍ତ୍ତମାନ 130 ଟନ ୟୁରିଆ ସାର ଥିବା ବେଳେ ତାହା ଯଥେଷ୍ଟ ନୁହେଁ ବୋଲି ମାରଫେଡ କହିଛି । ତେବେ ଆଉ 1500 ଟନ ୟୁରିଆ ସାର ଆବଶ୍ୟକ ରହିଛି। ଯାହା ଆଗାମୀ 3 ରୁ 4 ଦିନ ମଧ୍ୟରେ ମିଳିବ ବୋଲି ମାରଫେଡ ଏରିଆ ମ୍ୟାନେଜର କହିଛନ୍ତି ।
ଏହାସହ ସାର ଆସିଲା ପରେ ଶୀଘ୍ର ତାକୁ ଚାଷୀଙ୍କୁ ବଣ୍ଟନ କରାହେବ ବୋଲି ସେ କହିଛନ୍ତି । ଏହା ସହ ଉଚିତ ସମୟରେ ୟୁରିଆ ସାର ନମିଳିଲେ ଚାଷ ପ୍ରଭାବିତ ହେବା ସହ ଅମଳ କମିବ। ତେବେ ଏଦିଗରେ ପ୍ରଶାସନ ଶୀଘ୍ର ପଦକ୍ଷେପ ନେବା ଜରୁରୀ ହୋଇପଡିଛି ।
ବଲାଙ୍ଗୀରରୁ ଶେଖ ମହମ୍ମଦ ୱାହିଦ, ଇଟିଭି ଭାରତ
