ବଲାଙ୍ଗୀର: ବଲାଙ୍ଗୀର ବିଜେପିରେ ବିବାଦ । ଦୀର୍ଘ ବର୍ଷ ଧରି ବିଜେପି ଭାର ସମ୍ଭାଳି ଆସିଥିବା ରାଜା ଘର ଓ ଅଣଓଡ଼ିଆ ନେତା ବଳରାମ ସିଂହକୁ ନେଇ ବିବାଦ ମୁଣ୍ଡ ଟେକିଛି । କିଏ ଆଗାମୀ ନିର୍ବାଟନରେ ବଲାଙ୍ଗୀରରେ ପଦ୍ମ କମାଣ ଧରିବ ସେନେଇ ଚର୍ଚ୍ଚା ଜୋର ଧରିଛି ।
ସାଧାରଣ ନିର୍ବାଚନକୁ ଆଉ କିଛି ମାସ ବାକି ଥିବା ବେଳେ ବଲାଙ୍ଗୀର ରାଜନୀତି ଏବେ ଚର୍ଚ୍ଚାରେ ରହିଛି । ବଲାଙ୍ଗୀର ବିଜେପିରେ ରାଜାଘରର ପତିଆରା ଦୀର୍ଘ ଦିନ ଧରି ଚାଲିଆସିଥିବା ବେଳେ ବର୍ତ୍ତମାନ ଜଣେ ଅଣଓଡ଼ିଶା ନେତା ବଳରାମ ସିଂହ ବଲାଙ୍ଗୀର ବିଜେପିରେ ଏଣ୍ଟ୍ରି କରିଛନ୍ତି । ଯାହାଦ୍ବାରା ବିଜେପି 2 ଫାଳ ହୋଇଥିବା ଦେଖିବାକୁ ମିଳିଛି । ପାଟଣା ମହାରାଜା ତଥା ପୂର୍ବତନ ମନ୍ତ୍ରୀ କନକ ବର୍ଦ୍ଧନ ସିଂହଦେଓ ଓ ପାଟଣା ମହାରାଣୀ ତଥା ବଲାଙ୍ଗୀର ସାଂସଦ ସଂଗୀତା କୁମାରୀ ସିଂହଦେଓ ବିଜେପିରେ ଦୀର୍ଘ ବର୍ଷ ଧରି ରାଜୁତି ଚଳେଇ ଆସୁଛନ୍ତି । ସେହିପରି ବଲାଙ୍ଗୀର ତଥା ସୋନପୁର ଜିଲ୍ଲାରେ କିଏ ବିଜେପି ଟିକେଟ୍ ପାଇବ ତାହା ମଧ୍ୟ ଏମାନଙ୍କ ଇଙ୍ଗିତରେ ହିଁ ହୋଇଥାଏ । ଏବଂ ସବୁବେଳେ ତାଙ୍କ ଅନୁଗତ ହିଁ ଟିକେଟ୍ ପାଇ ଆସିଛନ୍ତି । ହେଲେ ଏହି ରାଜନୈତିକ ଗଣିତ ଏବେ କିଛି ବଦଳିବାରେ ଲାଗିଛି ।
ଏହାମଧ୍ୟ ପଢନ୍ତୁ..ବହୁ ପ୍ରତୀକ୍ଷିତ ବଲାଙ୍ଗୀର ବାଇପାସ କାମ ଆରମ୍ଭ, ତେଜିଲା ଶ୍ରେୟ ରାଜନୀତି
ବିଶେଷ କରି ଗତ କିଛି ବର୍ଷ ହେବ ଜଣେ ୟୁପିର ନେତା ଏଠି ଆସି ବିଜେପି ପତାକା ଧରି ଖୁଲମଖୁଲା ରାଜାଘର ବିରୋଧରେ ସଂଗଠନ କରୁଛନ୍ତି । ରାଜାଘର ଅସନ୍ତୁଷ୍ଟ ଗୋଷ୍ଠୀ ତାଙ୍କ ସହ ହାତ ମିଳାଇ ତାଙ୍କୁ ଆହୁରି ବଳ ଦେଇଛନ୍ତି । ଯେଉଁଥିପାଇଁ ବଳରାମ ସିଂହ ଯାଦବ ବିଜେପି ଓ ରାଜାଘର ବିଜେପି ଦୁଇ ଗୋଷ୍ଠୀରେ ବିଜେପି ଭାଗ ହୋଇଥିବାର ଦେଖିବାକୁ ମିଳୁଛି । ତେବେ ଜିଲ୍ଲା ସଭାପତିଙ୍କୁଠାରୁ ନେଇ ବ୍ଲକ ପର୍ଯ୍ୟନ୍ତ ବିଜେପିର ସାଂଗଠାନିକ ପଦ ଓ ପଦାଧିକାରୀ ରାଜାଘର ଇଙ୍ଗିତରେ କାମ କରିଥାଆନ୍ତି । ହେଲେ ଏବେ ବଳରାମ ସିଂହ ଯାଦବ ଏଥିରେ ପଶିବା ଆରମ୍ଭ କରିବା ସହ ଅନେକ ନେତାଙ୍କୁ ନିଜ ପଟକୁ ନେବାରେ ସକ୍ଷମ ମଧ୍ୟ ହୋଇଛନ୍ତି । ଯାହା ସିଧାସଳଖ ରାଜା ପରିବାର ପାଇଁ ଖୋଲା ଚାଲେଞ୍ଜ୍ ଭାବରେ ଛିଡ଼ା ହୋଇଛି ।
ଏହାମଧ୍ୟ ପଢନ୍ତୁ..balangir BJD: ଉଗ୍ର ରୂପ ନେଉଛି ବିଜେଡି ଅନ୍ତଃକନ୍ଦଳ, କର୍ମୀଙ୍କୁ ଅପହରଣ କରାଯାଇଥିବା ଅଭିଯୋଗ
ତେବେ ବଳରାମ ସିଂହ ଯାଦବ ୟୁପି ରାଜ୍ୟର ହୋଇଥିବା ବେଳେ ସେ ନିଜକୁ ପଶ୍ଚିମାଞ୍ଚଳ ଯାଦବ ମହାସଭାର ଅଧ୍ୟକ୍ଷ ବୋଲି ପରିଚୟ ଦିଅନ୍ତି । ସେ ପୂର୍ବରୁ ଛତିଶଗଡ଼ ରାଜ୍ୟରେ ତାଙ୍କର ରାଜନୀତି ଆରମ୍ଭ କରିଥିଲେ । ପରେ ସେ ଓଡ଼ିଶା ଆସି ବଲାଙ୍ଗୀରରେ ରହିଥିଲେ। ବଲାଙ୍ଗୀରରେ ସେ ଯାଦବମାନଙ୍କୁ ନେଇ ନିଜ ସଂଗଠନ ଆରମ୍ଭ କରିବା ପରେ ସେ ନିଜକୁ ବିଜେଡିର ରାଜ୍ୟ ସମ୍ପାଦକ ଭାବରେ ଘୋଷଣା କରିଥିଲେ । ବିଜେଡିରେ ତାଙ୍କୁ କୌଣସି ସୁଯୋଗ ନମିଳିବାରୁ ପରେ ସେ ବିଜେପିରେ ଯୋଗ ଦେଇଥିବାର କହିଥିଲେ । ବିଜେପିରେ ସେ କେନ୍ଦ୍ରୀୟ ନେତାଙ୍କ ଉପସ୍ଥିତିରେ ପଞ୍ଜାବରେ ବିଜେପି ସଦସ୍ୟତା ଗ୍ରହଣ କରିଥିବାର କହି ଆସୁଛନ୍ତି । ବିଗତ କିଛି ବର୍ଷ ହେବ ସେ ବଲାଙ୍ଗୀର ତଥା ସୋନପୁର ଜିଲ୍ଲାରେ ସକ୍ରିୟ ଭାବରେ ବିଜେପିର କାର୍ଯ୍ୟକ୍ରମ କରିବା ସହ ନିଜ ସଂଗଠନ କରୁଛନ୍ତି । ସେହିପରି ନିଜେ ବିଜେପି ସାଂସଦ ଟିକେଟରେ ଏଠୁ ନିର୍ବାଚନ ଲଢ଼ିବେ ବୋଲି କହି ଆସୁଛନ୍ତି । ଯାହାକୁ ନେଇ ରାଜା ପରିବାର ସହ ମୁହାଁମୁହିଁ ହୋଇଛନ୍ତି। ଏପରିକି ଅନେକ ସ୍ଥାନରେ ଦୁଇ ଗୋଷ୍ଠୀ ମଧ୍ୟରେ ବିବାଦ ଦେଖା ଦେବା ସହ ଦୁଇ ଗୋଷ୍ଠୀ ବିଜେପି କର୍ମୀ ହାତାହାତି ମଧ୍ୟ ହେଉଛନ୍ତି ।
ତେବେ ଏନେଇ ବିଜେପି ସାଂସଦ ସଂଗୀତା କୁମାରୀ ସିଂହଦେଓ କହିଛନ୍ତି, "ପୂର୍ବରୁ ଜିଲ୍ଲା ବିଜେପି ତାଙ୍କୁ ବିଜେପିର ନୁହଁ ବୋଲି ଘୋଷଣା କରି ସାରିଛି । ସେହିପରି ଏବେ ନିଜେ ରାଜ୍ୟ ବିଜେପି ସଭାପତି ମଧ୍ୟ ତାହା ଘୋଷଣା କରିଛନ୍ତି। ତେବେ ତାକୁ ନେଇ ବଲାଙ୍ଗୀର ଓ ସୋନପୁର ପୋଲିସ ପାଖରେ ଅଭିଯୋଗ ଦିଆ ଯାଇଛିି।"
ସେପଟେ ବଳରାମ ସିଂହ ଯାଦବ କହିଛନ୍ତି,"ମୁଁ ବିଜେପିର ସଦସ୍ୟ । ଦୀର୍ଘ ବର୍ଷ ହେବ ବିଜେପି ପାଇଁ କାମ କରିବା ସହ ସଂଗଠନ କରୁଛି ।"
ଇଟିଭି ଭାରତ, ବଲାଙ୍ଗୀର
