ବଲାଙ୍ଗୀର : ବଲାଙ୍ଗୀରରେ ମର୍ମନ୍ତୁଦ ସଡ଼କ ଦୁର୍ଘଟଣା । ଦୁର୍ଘଟଣାରେ ଚାଲିଯାଇଛି ଉଭୟ ସ୍ବାମୀ ଓ ସ୍ତ୍ରୀଙ୍କ ଜୀବନ । ଏଭଳି ଦୃଶ୍ୟ ଦେଖିବାକୁ ମିଳିଛି ବଲାଙ୍ଗୀର ଜିଲ୍ଲା ଭବାନୀପାଟଣା ରାସ୍ତା ସିନଖମନ ଗାଁ ଛକରେ । ମୃତ ଦମ୍ପତ୍ତି ହେଲେ ପ୍ରେମାନନ୍ଦ ସାହୁ ଓ ପ୍ରତିମା ସାହୁ ।
ସୂଚନା ଅନୁସାରେ କଳାହାଣ୍ଡି ଜିଲ୍ଲା ଏକତାରା ଗ୍ରାମର ପ୍ରେମାନନ୍ଦ ସାହୁ ଓ ତାଙ୍କ ସ୍ତ୍ରୀ ପ୍ରତିମା ସାହୁ ଦଶହରା ଭାଇଜୀଉନ୍ତା ପର୍ବ ପାଳିବା ପାଇଁ ବାଇକରେ ଗାଁକୁ ଯାଇଥିଲେ । ଗାଁରେ ପର୍ବ ପାଳନ କରିବା ପରେ ଆଜି ନିଜ ଘରକୁ ଫେରୁଥିଲେ ପ୍ରେମାନନ୍ଦ ଓ ପ୍ରତିମା । ହେଲେ ବଲାଙ୍ଗୀର ସିନଖମନ୍ ଗ୍ରାମ ଛକରେ ହଠାତ ଏକ ଟ୍ରକ ଆସି ତାଙ୍କ ବାଇକ୍କୁ ପଛପଟୁ ଧକ୍କା ଦେଇଥିଲା । ଫଳରେ ଉଭୟ ସ୍ବାମୀ ସ୍ତ୍ରୀ ବାଇକ ସହ ଛିଟିକି ପଡ଼ିଥିଲେ । ଏହାଦେଖି ସ୍ଥାନୀୟ ଲୋକେ ସେଠାରେ ପହଞ୍ଚିଥିଲେ । ତେବେ ଘଟଣାସ୍ଥଳରେ ହିଁ ସ୍ତ୍ରୀ ପ୍ରତିମାଙ୍କର ମୃତ୍ୟୁ ହୋଇଥିବା ବେଳେ ଗୁରୁତର ଭାବେ ଆହତ ହୋଇ ପଡ଼ି ରହିଥିଲେ ପ୍ରେମାନନ୍ଦ ।
ଏହା ମଧ୍ୟ ପଢନ୍ତୁ: କଣ୍ଟାବାଞ୍ଜି ଲଜରୁ ଟଙ୍କା ଜବତ ଘଟଣା, ଏସଡିପିଓ ହୃଷିକେଶ ମେହେର ନିଲମ୍ବିତ
ସ୍ଥାନୀୟ ଲୋକେ ଘଟଣାସ୍ଥଳରୁ ପ୍ରେମାନନ୍ଦଙ୍କୁ ଉଦ୍ଧାର କରି ତୁରନ୍ତ ସ୍ଥାନିୟ ହସ୍ପିଚାଲରେ ଭର୍ତ୍ତି କରିଥିଲେ । କିନ୍ତୁ ବଲାଙ୍ଗୀର ଭୀମଭୋଇ ମେଡିକାଲରେ ପ୍ରେମାନନ୍ଦଙ୍କ ଚିକିତ୍ସାଧୀନ ଅବସ୍ଥାରେ ହିଁ ମୃତ୍ୟୁ ହୋଇଥିଲା । ସେପଟେ ଏହାକୁ ନେଇ ସଦର ଥାନା ସମ୍ପୃକ୍ତ ଟ୍ରକକୁ ଜବତ କରିଥିବା ବେଳେ ଅଧିକ ତଦନ୍ତ ଜାରି ରଖିଛି । ଅନ୍ୟପକ୍ଷରେ ଦୁର୍ଘଟଣା ଘଟାଇଥିବା ଟ୍ରକ ଡ୍ରାଇଭର ଜଣକ ଘଟଣାସ୍ଥଳରୁ ଫେରାର୍ ମାରିଛି । ତେବେ ଖୁବଶୀଘ୍ର ଟ୍ରକ ଡ୍ରାଇଭରକୁ ଗିରଫ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି । ଏହି ଘଟଣା ପରେ ପରିବାରରେ ଶୋକର ଛାୟା ଖେଳିଯାଇଛି । ହସ ଖୁସିରେ ଘରୁ ବାହାରି ଥିବା ପ୍ରେମାନନ୍ଦ ଓ ପ୍ରତିମା କେବେ ଭାବି ନଥିବେ ଏହା ତାଙ୍କର ଶେଷ ଯାତ୍ରା ଥିଲା ବୋଲି । ଉଭୟଙ୍କୁ ହରାଇ ପରିବାର ପୁରା ଭାଙ୍ଗି ପଡ଼ିଛି । ପୋଲିସ ଏନେଇ ମାମଲା ରୁଜୁ କରିବା ସହିତ ଉଭୟ ଦମ୍ପତ୍ତିଙ୍କ ମୃତଦେହ ବ୍ୟବଚ୍ଛେଦ ନିମନ୍ତେ ପଠାଇ ଘଟଣାର ତଦନ୍ତ କରୁଛି ।
ଇଟିଭି ଭାରତ, ବଲାଙ୍ଗୀର
