ବଲାଙ୍ଗୀର: ଫସଲ ବୀମାକୁ ନେଇ ଜିଲ୍ଲାରେ କୃଷକ ଆନ୍ଦୋଳନ ତେଜିବାକୁ ଲାଗିଛି । ମଙ୍ଗଳବାର ତୁରେକେଲା ଅଞ୍ଚଳର ଚାଷୀମାନେ ଫସଲ ବୀମା ଦାବିରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବା ସହ କୃଷି ବୀମା ଅନୁସାରେ ଫସଲହାନିର କ୍ଷତିପୂରଣ ଦାବି କରିଥିବା ସୂଚନା ମିଳିଛି ।
ଗତ ବର୍ଷ 2019ରେ ସ୍ଥାନୀୟ ଅଞ୍ଚଳର ଚାଷୀମାନେ ରୟାଲ ସୁନ୍ଦରମ ଇନସୁରାନ୍ସ କମ୍ପାନୀରେ ଫସଲ ବୀମା ପାଇଁ ଟଙ୍କା ପୈଠ କରିଥିଲେ। ହେଲେ ଏକ ବର୍ଷ ବିତି ଯାଇଥିଲେ ସୁଦ୍ଧା ଏମାନେ ତାଙ୍କର ଫସଲ ବୀମା ଟଙ୍କା ପାଇନାହାନ୍ତି । ଏ ସଂପର୍କରେ ଚାଷୀମାନେ ପ୍ରଶାସନଠାରୁ ଆରମ୍ଭ କରି ବ୍ୟାଙ୍କରେ କହିବା ପରେ ମଧ୍ୟ ବିଫଳ ହୋଇଛନ୍ତି ।
ଶେଷରେ କିଛି ଉପାୟ ନ ପାଇ ଚାଷୀମାନେ ଜିଲ୍ଲାପାଳଙ୍କ ମୁଖ୍ୟ କାର୍ଯ୍ୟାଳୟ ସମ୍ମୁଖରେ ମଙ୍ଗଳବାର ଧାରଣା ଦେବା ସହ କୃଷିବୀମା ଅନୁସାରେ ଫସଲହାନିର କ୍ଷତିପୂରଣ ଦାବି କରିଛନ୍ତି। କ୍ଷତିପୂରଣ ବାବଦକୁ ଅର୍ଥ ନ ମିଳିଲେ ଆଗାମୀ ଦିନରେ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।
ବଲାଙ୍ଗୀରରୁ ଏସ. କେ ମହମ୍ମଦ ୱାହିଦ, ଇଟିଭି ଭାରତ
